លោក កែ គឹមយ៉ាន កំណត់គោលដៅបង្ក្រាបគ្រឿងញៀន ទៅលើសិស្សដែលមិនចូលសាលារៀន

ជាតិ

សង្គមជាតិ

លោក កែ គឹមយ៉ាន កំណត់គោលដៅបង្ក្រាបគ្រឿងញៀន ទៅលើសិស្សដែលមិនចូលសាលារៀន

11, Mar 2017 , 9:30 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ប្រធានអាជ្ញាធរជាតិប្រយុទ្ធប្រឆាំងគ្រឿងញៀន លោក កែ គឹមយ៉ាន បានកំណត់គោលដៅចំនួន៨កន្លែង ដើម្បីបន្តយុទ្ធនាការបោសសម្អាតគ្រឿងញៀនទូទាំងប្រទេស ក្នុងរយៈពេល៦ខែនេះ។ ប៉ុន្តែគោលដៅបង្ក្រាបគ្រឿងញៀន ដែលលោក កែ គឹមយ៉ាន បានបញ្ជាឲ្យមន្ត្រីជំនាញចុះបង្ក្រាបឲ្យខាងតែបាននោះ គឺទីតាំងដែលសិស្សនិយមមិនចូលសាលារៀន យកធ្វើជាកន្លែងជួបជុំគ្នា។ បើតាមលោក កែ គឹមយ៉ាន សិស្សដែលមិនសូវចូលសាលារៀននេះហើយ ភាគច្រើនអាចជាប់ពាក់ព័ន្ធនឹងការប្រើប្រាស់គ្រឿងញៀន។

ក្រៅពីកំណត់គោលដៅបង្ក្រាបគ្រឿងញៀន ទៅលើសិស្សដែលមិនចូលសាលារៀននេះ លោក គឹមយ៉ាន ក៏បញ្ជាឲ្យអាជ្ញាធរអនុវត្តការបង្ក្រាបទីតាំងដែលសង្ស័យថា មានការលួចប្រើប្រាស់គ្រឿងញៀនផងដែរ រួមមានផ្ទះសំណាក់ ,សណ្ឋាគារ ,ក្លឹបកម្សាន្ត និងកន្លែងម៉ាស្សាជាដើម។

សូមស្ដាប់ការលើកឡើងរបស់លោក កែ គឹមយ៉ាន់ នៅក្នុងពិធីប្រជុំផ្សព្វផ្សាយ ផែនការសកម្មភាព នៃយុទ្ធនាការប្រឆាំងគ្រឿងញៀន កាលពីថ្ងៃទី៧ ខែមីនា ឆ្នាំ២០១៧៖

កន្លងមកអ្នកនាំពាក្យក្រសួងអប់រំ លោក រស់ សាលីន បានឲ្យដឹងថា ក្រសួងបានសម្រេចបង្កើតក្រុមការងាររួចរាល់ហើយ សម្រាប់អនុវត្តវិធានការទៅលើសិស្សនៅតាមសាលារៀន ដែលសង្ស័យថាប្រើប្រាស់គ្រឿងញៀន។ ប៉ុន្តែត្រូវការពេលពិនិត្យមើលលទ្ធភាពអនុវត្តឲ្យបានច្បាស់លាស់សិន។ លោក រស់ សាលីន បានថ្លែងប្រាប់សារព័ត៌មានថ្មីៗ ដូច្នេះថា៖«ក្រុមការងារក្រសួងនឹងប្រជុំបន្តទៀត ដើម្បីរៀបចំវិធានការ និងបែងចែកការងារអនុវត្តវិធានការនេះ ។ ហើយក្រសួងត្រូវការពេលសិក្សាថា តើការអនុវត្តវិធានការនេះ មានផលល្អអ្វីខ្លះដល់សិស្ស ហើយអនុវត្តបែបណា កុំឲ្យប៉ះពាល់ដល់ការសិក្សារបស់សិស្ស។ នៅពេលដែលយើងសិក្សាច្បាស់លាស់ហើយ ក្រសួងនឹងផ្សព្វផ្សាយជាសាធារណៈ»។

ចាប់ពីថ្ងៃទី១ ខែមករា រហូតដល់ថ្ងៃទី៦ ខែមីនា ឆ្នាំ២០១៧ កម្លាំងសមត្ថកិច្ចចម្រុះ បានអនុវត្តន៍នូវយុទ្ធនាការ ប្រយុទ្ធប្រឆាំងគ្រឿងញៀន ដោយបានបង្ក្រាបបទល្មើស ជួញដូរចែកចាយ និងប្រើប្រាស់គ្រឿងញៀន បានចំនួន ២២១១ករណី ឃាត់ខ្លួនជនសង្ស័យបាន ៥១៤១នាក់ (ស្រី ៥១៤នាក់) ។ ក្នុងនោះដកហូតវត្ថុតាង សារធាតុញៀនបានជាង ១៧គីឡូក្រាម ថ្នាំកញ្ចប់ ២៨៨៤កញ្ចប់តូច និង១១ធំ កញ្ឆាក្រៀមជាង ៧គីឡូក្រាម និងកញ្ឆាដើម ៩៧៥៦០ដើម ។ នេះបើតាមរបាយការណ៍អាជ្ញាធរជាតិប្រយុទ្ធប្រឆាំងគ្រឿងញៀន៕