ជាតិ
សង្គមជាតិ
×![]()
ដោយ: ថ្មីៗ
ភ្នំពេញ៖ តំណាងទីប្រឹក្សាបច្ចេកទេសលើវិស័យមីននៃអង្គការUNDP បានប្រកាសផ្ដល់ថវិកា ១១,៧ លានដុល្លារបន្ថែមទៀត ដើម្បីបន្ដការគាំទ្រដល់សកម្មភាពអាជ្ញាធរមីនកម្ពុជា ក្នុងការបោសសម្អាតមីន និងគ្រាប់មិនទាន់ផ្ទុះដែលនៅសេសសល់ក្នុងប្រទេសកម្ពុជា។
លោក Edwin Faigmane ទីប្រឹក្សាបច្ចេកទេសនៃអង្គការ UNDPប្រចាំកម្ពុជា បានបញ្ជាក់ថា អង្គការរបស់លោក នឹងយកបទពិសោធន៍ ដែលធ្លាប់បម្រើការងារនៅប្រទេសនានា មកជួយបណ្ដុះបណ្ដាល និងពង្រឹងសមត្ថភាពដល់មន្ត្រីជំនាញបន្ថែម ទាក់ទងនឹងការបោសសម្អាតមីននៅកម្ពុជានេះ។ លោកបន្ថែមថា UNDP ក៏នឹងបន្ដជួយដល់អាជ្ញាធរមីនក្នុងការរៀបចំយុទ្ធសាស្ត្រគៀរគរជំនួយបន្ថែមទៀត ដើម្បីឲ្យកម្ពុជា អាចបោសសម្អាតមីន សម្រេចបានតាមផែនការដែលបានរំពឹងទុកនោះ។
អនុប្រធានទី២អាជ្ញាធរមីនកម្ពុជា និងជាអគ្គនាយកមជ្ឈមណ្ឌលជាតិរក្សាសន្តិភាព លោក សែម សុវណ្ណនី បាននិយាយថា អាជ្ញាធរមីនត្រូវការថវិកា ចំនួន៤០៥លានដុល្លារអាមេរិកបន្ថែមទៀត ដើម្បីបោសសម្អាតមីន និងគ្រាប់មិនទាន់ផ្ទុះ នៅលើផ្ទៃដី១៩៤៦គីឡូម៉ែត្រការ៉េ សម្រាប់ផែនការយុទ្ធសាស្ត្រជាតិ សកម្មភាពមីនឆ្នាំ ២០១៧-២០២៥។
លោក សែម សុវណ្ណ បានបន្ដថា ផ្ទៃដីដែលបានបោសសម្អាតមីន និងសំណល់ជាតិផ្ទុះពីសង្គ្រាមចាប់ពីឆ្នាំ ១៩៩២ មកដល់ខែមករា ឆ្នាំ២០១៧ មានប្រមាណ១,៥៤៦គីឡូម៉ែត្រការ៉េ។ ចំណែកផ្ទៃដីដែល មិនទាន់បានបោសសម្អាតមាន ចំនួន១៩៤៦គីឡូម៉ែត្រការ៉េ ក្នុងនោះផ្ទៃដីសង្ស័យ មានមីនចំនួន៩៧០គីឡូម៉ែត្រការ៉េ និងផ្ទៃដីសង្ស័យថាមានគ្រាប់មិនទាន់ផ្ទុះមានចំនូន៩៧៦ គីឡូម៉ែត្រការ៉េ។
គិតចាប់ពីឆ្នាំ ២០០៦ ដល់ឆ្នាំ២០១៦មក អង្គការសហប្រជាជាតិ UNDP បានផ្ដល់ជំនួយដល់សកម្មភាពអាជ្ញាធរមីនកម្ពុជា មានចំនួន៥២,៥លានដុល្លារអាមេរិកហើយ។ សម្រាប់ថវិកាចំនួន១១,៧លានបន្ថែមទៀត ដែល UNDP នឹងបន្ដផ្តល់មកអាជ្ញាធរមីនកម្ពុជានេះ គឺសម្រាប់បោសសម្អាតមីន នៅខេត្តប៉ៃលិន និងតំបន់មួយចំនួនទៀត ក្នុងទិសដៅបោសសម្អាតមីន ចាប់ពីឆ្នាំ២០១៦ ដល់ឆ្នាំ២០១៩៕
ប្រភពពីAKP
© រក្សាសិទ្ធិដោយ thmeythmey.com
