លោក ប្រាក់ សុខុន កត់សម្គាល់ថា វៀតណាមអភិវឌ្ឍគ្រប់វិស័យ

ជាតិ

លោក ប្រាក់ សុខុន កត់សម្គាល់ថា វៀតណាមអភិវឌ្ឍគ្រប់វិស័យ

16, Mar 2017 , 5:12 pm

រូបភាព

ដោយ:

ភ្នំពេញ៖ រដ្ឋមន្ត្រីការបរទេស និងសហប្រតិបត្តិការអន្តរជាតិលោក ប្រាក់ សុខុន បានសរសើររដ្ឋាភិបាលវៀតណាមថា បាន និងកំពុងដឹកនាំប្រទេសជាប់ព្រំប្រទល់កម្ពុជាមួយនេះ រីកចម្រើនលើគ្រប់វិស័យ ចាប់តាំងពីឆ្នាំ ១៩៨៩ រហូតមកបច្ចុប្បន្ន។

លោកទេសរដ្ឋមន្ត្រី ប្រាក់ សុខុន បានកត់សម្គាល់ថា រដ្ឋាភិបាលវៀតណាម បាន និងកំពុងដឹកនាំប្រទេសលើមាគ៌ារីកចម្រើនលើគ្រប់វិស័យ តាមរយៈកំណែទម្រង់របស់រដ្ឋាភិបាលវៀតណាមដែលបានអនុវត្តចាប់ពីឆ្នាំ១៩៨៦ រហូតមកបច្ចុប្បន្ន។ លោកបានលើកឡើងចំពោះមុខលោក ផាម ប៊ិញ មិញ (Pham Binh Minh)ឧបនាយករដ្ឋមន្ត្រី និងជារដ្ឋមន្ត្រីការបរទេសនៃសាធារណរដ្ឋសង្គមនិយមវៀតណាមថា រដ្ឋាភិបាលវៀតណាមបានរក្សាស្ថិរភាពនយោបាយ សន្តិសុខសង្គម និងលំនឹងម៉ាក្រូសេដ្ឋកិច្ចដែលជាកម្លាំងចលករដ៏សំខាន់ ដើម្បីជំរុញកំណើនសេដ្ឋកិច្ចដែលប្រែក្លាយប្រទេសវៀតណាម ទៅជាទីផ្សារដ៏មានសក្តានុពលសម្រាប់វិនិយោគិនបរទេស។

ថ្លែងសុន្ទរកថាក្នុងកិច្ចប្រជុំគណៈកម្មការចម្រុះកម្ពុជា-វៀតណាមលើកទី១៥ ស្តីពីកិច្ចសហប្រតិបត្តិការសេដ្ឋកិច្ច វប្បធម៌ វិទ្យាសាស្ត្រ និងបច្ចេកទេស កាលពីថ្ងៃទី១៥ ខែមីនា ឆ្នាំ២០១៧នេះ លោក ប្រាក់ សុខុន ថ្លែងដូច្នេះថា៖«ក្រោមការដឹកនាំដ៏ឈ្លាសវៃ និងគោលនយោបាយដ៏ត្រឹមត្រូវរបស់បក្សកុម្មុយនីស្ត និងរដ្ឋាភិបាលវៀតណាម កិត្យានុភាព និងតួនាទីរបស់វៀតណាមត្រូវបានលើកកម្ពស់ជាបន្តបន្ទាប់ ទាំងនៅក្នុងតំបន់ និងនៅលើឆាកអន្តរជាតិ»។

ទន្ទឹមគ្នា លោកក៏បានលើកឡើងពីការអភិវឌ្ឍសេដ្ឋកិច្ចប្រទេសកម្ពុជាផងដែរ ក្នុងឱកាសខួបលើកទី ៥០ ថ្ងៃបង្កើតទំនាក់ទំនងការទូតកម្ពុជា-វៀតណាមក្នុងឆ្នាំ២០១៧នេះ។ លោករដ្ឋមន្ត្រី បានថ្លែងថា កម្ពុជាបានចាកចេញពីឋានៈប្រទេសដែលមានចំណូលទាប ទៅជាប្រទេសដែលមានចំណូលមធ្យមកម្រិតទាប តាមរយៈការអនុវត្តយុទ្ធសាស្ត្រចតុកោណដំណាក់កាលទី៣ របស់រដ្ឋាភិបាល។

បន្ថែមលើសពីនេះ លោកបន្តថា កម្ពុជាទទួលបានចំណាត់ថ្នាក់ល្អដែលមានកំណើនសេដ្ឋកិច្ចដ៏រឹងមាំ ដោយសម្រេចបានអត្រាជាមធ្យម ៧,៧ភាគរយ ក្នុងមួយឆ្នាំ ក្នុងរយៈពេលជាង ២ ទសវត្សរ៍កន្លងមក។

«សម្រាប់ឆ្នាំ២០១៧ កម្ពុជា នឹងឈរលើគោលនយោបាយច្បាស់លាស់ ដើម្បីធានាការរក្សាឱ្យបានកំណើនក្នុងរង្វង់ ៧ភាគរយ ដោយជំរុញការអភិវឌ្ឍលើវិស័យនានា ដូចជា ឧស្សាហកម្ម កសិកម្ម ពាណិជ្ជកម្ម ទេសចរណ៍ សំណង់ ហិរញ្ញវត្ថុ និងហេដ្ឋារចនាសម្ព័ន្ធ»។ លោក ប្រាក់ សុខុន បន្ថែម។

មិនខុសគ្នាដែរ លោក ផាម ប៊ិញ មិញ (Pham Binh Minh) បានកត់សម្គាល់ឃើញថាប្រទេសទាំងពីរ មានទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការល្អលើគ្រប់វិស័យ។ លោកបានស្នើកម្ពុជាឲ្យបន្តកិច្ចសហប្រតិបត្តិការទ្វេភាគីលើច្រើនវិស័យ ក្នុងនោះ រួមមាន អភិវឌ្ឍន៍ធនធានមនុស្ស ផ្នែកវិនិយោគ ទេសចរណ៍ និងពាណិជ្ជកម្មជាដើម ។

តាមប្រសាសន៍លោក ប្រាក់ សុខុន កាលពីឆ្នាំ ២០១៦ កន្លងទៅ វៀតណាម បានវិនិយោគនៅកម្ពុជាចំនួនជាង ៨១លានដុលា្លរអាមេរិក។ ហើយថា ចំនួននេះ បានធ្លាក់ចុះ បើធៀបនឹងឆ្នាំ ២០១៥ ដែលមានចំនួន ជាង៨៩លានដុល្លាអាមេរិក។ រីឯទំហំពាណិជ្ជកម្មកម្ពុជា-វៀតណាម មានចំនួន ២.៩២៥លានដុល្លាអាមេរិក។ ភាគីទាំងពីរ បាននិងកំពុងជម្រុញវិស័យពាណិជ្ជកម្មឲ្យកាន់តែប្រសើរឡើង តាមរយៈកិច្ចសម្របសម្រួលពាណិជ្ជកម្មទ្វេភាគី សម្រាប់ឆ្នាំ២០១៦-២០១៧ ដើម្បីសម្រេចទិសដៅពាណិជ្ជកម្មទ្វេភាគី ៥ពាន់លានដុល្លារ នាឆ្នាំខាងមុខ។ ចំពោះវិស័យទេសចរណ៍វិញ ក្នុងឆ្នាំ២០១៦ នេះដែរ ភ្ញៀវទេសចរវៀតណាមចំនួន ៩៥៩.៦៦៣នាក់ បានមកទស្សនានៅកម្ពុជា ហើយវាបន្តឈរនៅលំដាប់ទី១ ក្នុងរយៈពេល ៨ឆ្នាំជាប់គ្នា ចំណោមចំនួនភ្ញៀវទេសចរបរទេសដែលមកទស្សនាកម្ពុជា៕