ជាតិ
ក្រសួងអប់រំពុំទាន់ចុះពិនិត្យសិស្សដែលសង្ស័យប្រើប្រាស់គ្រឿងញៀន លោក ហង់ ជួន ណារ៉ុន កំពុងផ្តល់បទសម្ភាសន៍ប្រាប់អ្នកសារព័ត៌មាន នៅសាលាតិចណូ
× ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន បានឲ្យដឹងថា ក្រសួងអប់រំពុំទាន់ចុះពិនិត្យទឹកនោមសិស្សដែលសង្ស័យប្រើប្រាស់គ្រឿងញៀន នៅតាមសាលារៀនទូទាំងប្រទេសនៅឡើយ។ លោកនិយាយថា ក្រសួងមានវិធានការអប់រំ និងបង្ការការពារច្រើនជាង ឲ្យក្រុមការងារទទួលបន្ទុកគ្រប់គ្រងគ្រឿងញៀនចុះត្រួតពិនិត្យសិស្ស។
ថ្លែងក្នុងសន្និបាតបូកសរុបការងារអប់រំ យុវជន និងកីឡាឆ្នាំសិក្សា ២០១៥-២០១៦ និងទិសដៅឆ្នាំសិក្សា ២០១៦-២០១៧ នៅថ្ងៃទី២១ ខែមីនានេះ លោក ហង់ ជួន ណារ៉ុន និយាយថា ក្រសួងបាន និងកំពុងផ្សព្វផ្សាយអំពីគ្រោះថ្នាក់ នៃការប្រើប្រាស់គ្រឿងញៀននៅតាមគ្រឹះស្ថានសិក្សា។ បន្ថែមលើសពីនេះ លោកបន្តបញ្ជាក់ថា ក្រសួងបានបញ្ជូលខ្លឹមសារអប់រំប្រឆាំងគ្រឿងញៀនទៅក្នុងកម្មវិធីសិក្សាសម្រាប់ក្រុមប្រឹក្សាកុមារ និងក្រុមប្រឹក្សាយុវជនជាដើម។
នៅពេលអ្នកសាររព័ត៌មានសួរថា តើក្រុមការងារទទួលបន្ទុកគ្រប់គ្រងគ្រឿងញៀនរបស់ក្រសួង បានចុះត្រួតពិនិត្យទឹកនោមសិស្សតាមសាលាយ៉ាងណាមកទល់ពេលនេះ? លោកបានបដិសេធភ្លាមៗថា ក្រសួងពុំបានចុះធ្វើត្រួតពិនិត្យរកសារធាតុញៀនសិស្សទេ។ «យើងមានវិធានការបង្ការការពារ និងផ្សព្វផ្សាយច្រើន»។ លោករដ្ឋមន្ត្រីអប់រំបញ្ជាក់ប្រាប់អ្នកសារព័ត៌មានពីវិធានប្រឆាំងសិស្សដែលញៀនគ្រឿងញៀន នៅថ្ងៃនេះ ក្នុងសាលាតិចណូ។
យ៉ាងណា លោកបានបង្ហើបឲ្យដឹងថា ក្រសួងនឹងចុះត្រួតពិនិត្យសិស្សដែលជាប់សង្ស័យនឹងគ្រឿងញៀន ប្រសិនបើលោកគ្រូ អ្នកគ្រូរាយការណ៍ប្រាប់ក្រសួងអំពីបញ្ហាសិស្សទាំងនោះ។ «ចឹង! មានន័យថា យើងមិនធ្វើតេស្ត សិស្សទាំងអស់ទេ»។ លោករដ្ឋមន្ត្រីបន្ថែម។
ប្រធានអាជ្ញាធរប្រយុទ្ធប្រឆាំងគ្រឿងញៀន លោក កែ គឹមយ៉ាន ធ្លាប់ថែ្លងថា លោកបានផ្ដល់សម្ភារត្រួតពិនិត្យទឹកនោមទៅដល់ក្រសួងអប់រំ យុវជន និងកីឡា ដើម្បីដាក់ឲ្យប្រើប្រាស់នៅតាមសាលារៀនទូទាំងប្រទេសកម្ពុជា សម្រាប់ត្រួតពិនិត្យទៅលើសិស្ស ដែលសង្ស័យថាប្រើប្រាស់គ្រឿងញៀន។
ក្រៅពីការត្រួតពិនិត្យសារធាតុញៀននៅតាមសាលារៀននេះ អាជ្ញាធរប្រយុទ្ធប្រឆាំងគ្រឿងញៀន នឹងសហការជាមួយក្រសួងសាធារណៈការ និងដឹកជញ្ជូន និងក្រសួងពាក់ព័ន្ធផ្សេងទៀត ដើម្បីទប់ស្កាត់ការប្រើប្រាស់គ្រឿងញៀនខុសច្បាប់នេះផងដែរ។ លោក គឹមយ៉ាន បានថ្លែងក្នុងពិធីប្រជុំផ្សព្វផ្សាយផែនការស្តីពី យុទ្ធនាការប្រយុទ្ធប្រឆាំងគ្រឿងញៀនខុសច្បាប់ កាលថ្ងៃទី២២ ធ្នូ ឆ្នាំ២០១៦កន្លងមកនេះ។
ប៉ុន្តែ ក្រសួងអប់រំ និងអាជ្ញាធរប្រយុទ្ធប្រឆាំងគ្រឿងញៀនពុំទាន់ត្រួតពិនិត្យរកឃើញសិស្ស ដែលសង្ស័យ ប្រើប្រាស់គ្រឿងញៀន នៅតាមសាលារៀនទូទាំងប្រទេសនោះទេ។ យុទ្ធនាការប្រឆាំងគ្រឿងញៀនតាមសាលានេះធ្វើឡើង ស្របពេលក្រសួងមហាផ្ទៃ និងអាជ្ញាធរជាតិប្រយុទ្ធប្រឆាំងគ្រឿងញៀន បើកយុទ្ធនាការបង្ក្រាបគ្រឿងញឿនលើកទី១ រយៈពេល៦ខែ ចាប់ពីថ្ងៃទី១ ខែមករា ដល់ថ្ងៃទី៣០ ខែមិថុនា ឆ្នាំ២០១៧ នៅទូទាំងប្រទេស៕
Tag:
ហង់ ជួន ណារ៉ុន
អប់រំ
គ្រឿងញៀន
© រក្សាសិទ្ធិដោយ thmeythmey.com