អន្តរជាតិ
បើផ្តល់ថវិកាមិនគ្រប់ ចំនួននាវាចម្បាំងអាមេរិកដែលល្បាតពាសពេញពិភពលោកនឹងថយចុះ
× កងទ័ពជើងទឹកអាមេរិកបានព្យាយាមស្នើសុំឲ្យមានការបង្កើនថវិកាប្រចាំឆ្នាំ ២០១៧ ដើម្បីប្រើប្រាស់ជួសជុលថែទាំងនិងបង្កើនសមត្ថភាពនាវាចម្បាំងដែលកំពុងបំពេញប្រតិបត្តិការរក្សាផលប្រយោជន៍អាមេរិកនៅបរទេសនោះ។ គេព្រមានថា បើសិនសភាមិនបង្កើនថវិកាទេ នាវាដឹកយន្តហោះចម្បាំងចំនួនពីរគ្រឿងនឹងត្រូវបញ្ឈរជើង ហើយនាវាបីគ្រឿងផ្សេងទៀតនឹងត្រូវបន្ថយសមត្ថភាពបំពេញប្រតិបត្តិការឲ្យដល់អប្បបរមា។ នេះមានន័យថា អាមេរិកនឹងមាននាវាល្បាតសមុទ្រទូទាំងពិភពលោកកាន់តែតិច ហើយអំណាចទ័ពជើងទឹកអាមេរិកកាន់តែធ្លាក់ចុះថែមទៀត។
ក្តីបារម្ភចំពោះការថយចុះនៃអំណាចយោធាជើងទឹកអាមេរិកកើនឡើង ខណៈដែលក្រុមមន្ត្រីយោធាជាន់ខ្ពស់កងទ័ពជើងអាមេរិកបន្តតស៊ូមតិដើម្បីឲ្យសភាបង្កើនលុយសម្រាប់ផ្គត់ផ្គង់លើការថែទាំនិងបង្កើនសមត្ថភាពនាវាចម្បាំងអាមេរិកនោះ។ បើសិនជាកញ្ចប់លុយមិនត្រូវសមាជិកសភាបង្កើនទេ បញ្ហាធំនឹងកើតឡើងនៅពេលខាងមុខ។ នាវាដឹកយន្តហោះចម្បាំងខ្លះដែលតំណាងឲ្យអំណាចយោធានិងការពារប្រយោជន៍អាមរិកនៅបរទេសនឹងត្រូវផ្អាកដំណើរការ។
យោងតាមសារព័ត៌មាន Military មេបញ្ជាការរងកងទ័ពជើងទឹកលោក Joseph Mulloy បានអះអាងក្នុងការផ្តល់ចម្លើយទៅកាន់គណៈកម្មាធិការការពារជាតិ ស្ថាប័នលោកបន្តតស៊ូមតិនិងសុំឲ្យបណ្តាសមាជិកសភាពិចារណាឲ្យបានដិតដល់និងសម្រេចអនុម័តបង្កើនកញ្ចប់ថវិកាឲ្យបានពេញលេញដើម្បីគាំទ្រគម្រោងជួសជុលថែទាំងនាវាចម្បាំងដែលមាន។
ការលើកឡើងនេះ គឺជាការគាំទ្រចំពោះសម្តីអនុប្រធានផ្នែកប្រតិបត្តិការកងទ័ពជើងទឹក Bill Moran ដែលបានរៀបរាប់ប្រាប់សមាជិកព្រឹទ្ធសភាកាលពីខែកុម្ភៈពីផលប៉ះពាល់និងការខ្វះចន្លោះក្នុងការរក្សាវត្តមាននាវាចម្បាំងអាមេរិកលើដែនសមុទ្រអន្តរជាតិ ដែលនឹងកើតមានឡើង ប្រសិនបើកញ្ចប់ថវិកាយោធាមិនត្រូវបានដំឡើងឲ្យបានសមរម្យទេនោះ។
បើតាមលោក Joseph Mully ផលប៉ះពាល់ដែលនឹងកើតមានដោយសារខ្វះខាតហិរញ្ញវត្ថុនោះមានដូចជា ការឈានទៅបញ្ឈប់ដំណើរការនាវាដឹកយន្តហោះពីរគ្រឿង, បន្ថយសមត្ថភាពឲ្យដល់កម្រិតអប្បបរមាសម្រាប់ដំណើរការនៃនាវាដឹកយន្តហោះចំនួន ៣គ្រឿង និងពន្យាពេលជួសជុលកែលម្អនាវាចម្បាំង ១៤គ្រឿងផ្សេងទៀតផងដែរ។
វាមានន័យថា គម្រោងជួសជុលកែលម្អនាវានឹងមិនចប់សព្វគ្រប់តាមការកំណត់ ហើយមិនត្រឹមតែប៉ុណ្ណោះទេ នាវាដែលធ្លាប់ចេញប្រតិបត្តិការនៅបរទេសត្រូវផ្អាកដំណើរការព្រោះតែការខ្វះខាតហិរញ្ញវត្ថុ។វាប្រាកដណាស់ថា អាមេរិកមិនអាចពង្រាយនាវាធំៗរបស់ខ្លួនទៅល្បាតបានទាន់ពេលវេលាដូចសព្វដង ហើយអាមេរិកក៏មិនអាចធានាថា ចំនួននាវាចម្បាំងអាមេរិកដែលនៅសល់អាចការពារដែនសមុទ្រទូទាំងពិភពលោកគ្រប់គ្រាន់តាមតម្រូវការជាក់ស្តែងដែរ។
ដូចឃើញស្រាប់ កាលពីតុលាឆ្នាំ ២០១៥ គ្រាន់តែកងទ័ពជើងទឹកដកនាវាដឹកយន្តហោះ Theodore Roosevelt ពីឈូងសមុទ្រ ពែក្យមកវិញ គេឃើញថា អាមេរិកមិនមាននាវានៅសេសសល់សម្រាប់ជំនួសកន្លែងនិងបើកប្រតិបត្តិការកម្ទេចក្រុមរដ្ឋឥស្លាមនៅស៊ីរីនិងអ៊ីរ៉ាក់ឡើយ។ នេះក៏ដោយសារ វាពាក់ព័ន្ធនឹងការពន្យារពេលជួសជុលនាវាដឹកយន្តហោះ D. Eisenhower។ ទាល់តែដល់ខែវិច្ឆិកា ទើបគេអាចបញ្ជូនក្រុមនាវាប្រយុទ្ធដឹកនាំដោយនាវាដឹកយន្តហោះ Harry Truman ទៅបំពេញការខ្វះចន្លោះនេះបានវិញ។
មុនឆ្នាំ ២០១៧នេះ ក្រុមកងប្រយុទ្ធដឹកនាំដោយនាវា D. Eisenhower បានត្រឡប់ពីមជ្ឈិមបូព៌ាវិញក្រោយពេលនាវានេះបំពេញប្រតិបត្តិការអស់ពេល ៧ខែ។ បន្ទាប់ពីដកក្រុមនាវានេះមកវិញ គេឃើញថា នាវាដឹកយន្តហោះអាមេរិកមិនមានវត្តមានក្នុងតំបន់ជិតមួយខែពេញ ទម្រាំនាវា George H. W. Bush ត្រូវគេជួសជុលចប់សព្វគ្រប់និងត្រូវបញ្ជូនមកជំនួសនាវា D. Eisenhower នោះ។ បញ្ហាគ្រប់យ៉ាងវាបណ្តាលមកពីការពន្យារពេលជួសជុសនាវាដូចគ្នា៕
Tag:
កងទ័ពជើងទឹកអាមេរិក
នាវាដឹកយន្តហោះអាមេរិក
Joseph Mully
© រក្សាសិទ្ធិដោយ thmeythmey.com