ជាតិ
សេដ្ឋកិច្ច
កម្ពុជាសម្ពោធមជ្ឈមណ្ឌលហ្វឹកហ្វឺនអាកាសចរស៊ីវិលតម្លៃជាង ១០លានដុល្លារអាមេរិក
× ភ្នំពេញ៖ រដ្ឋលេខាធិការដ្ឋានអាកាសស៊ីវិល បានបើកសម្ពោធមជ្ឈមណ្ឌលហ្វឹកហ្វឺនអាកាសចរណ៍ស៊ីវិល (CATC) តម្លៃជាង ១០លាន ដែលជាជំនួយរបស់រដ្ឋាភិបាលសាធារណរដ្ឋកូរ៉េ នៅថ្ងៃទី២២ ខែមីនា។ មជ្ឈមណ្ឌលនេះ មានទីតាំងនៅក្នុងបរិវេណអាកាសយានដ្ឋានអន្តរជាតិភ្នំពេញ។
រដ្ឋលេខាធិការដ្ឋានអាកាសចរស៊ីវិល លោក ម៉ៅ ហាវណ្ណាល់ បានចាត់ទុកថា មជ្ឈមណ្ឌលនេះ ពិតជាមានសារៈសំខាន់ ក្នុងការបណ្តុះធនធានមនុស្សជំនាន់ក្រោយ ដើម្បីឆ្លើយតបនឹងកំណើនតម្រូវផ្នែកអាកាសចរ នាពេលបច្ចុប្បន្ន និងថ្ងៃអនាគត។
ក្រៅពីការបំពាក់ឧបករណ៍សម្ភារបរិក្ខារបណ្តុះបណ្តាល និងផែនការបណ្តុះបណ្តាលធនធានមនុស្សផ្នែកអាកាសចរស៊ីវិល លោក វណ្ណាល់ បានបន្តរៀបរាប់ពីអត្ថប្រយោជន៍មជ្ឈមណ្ឌលអាកាសចរលើកដំបូងនេះទៀតថា វាមានតួនាទីបណ្តុះបណ្តាលធនធានមនុស្ស និងសហប្រតិបត្តិការបច្ចេកទេសអាកាសចរស៊ីវិល ជាមួយប្រទេសតំបន់ និងសកលលោក ដើម្បីពង្រឹងផែនការមេ សម្រាប់ការអភិវឌ្ឍធនធានមនុស្ស និងផែនការសម្រាប់ប្រតិបត្តិការ CATC ។
ថ្លែងក្នុងពិធីសម្ពោធមជ្ឈមណ្ឌលហ្វឹកហ្វឺនអាកាសចរស៊ីវិលដែលជាជំនួយកូរ៉េ នៅទី២២ថ្ងៃនេះ លោកបានបន្តថ្លែងដូច្នេះថា៖«មជ្ឈមណ្ឌលគ្រោងបើកវគ្គបណ្តុះបណ្តាលចំនួន ១៤វគ្គ ដែលមានសិក្ខាកាមចំនួន ២៧៤នាក់ និងជំនាញការកូរ៉េចំនួន ១១នាក់ មកជួយផ្នែកបច្ចេកទេស បណ្តុះបណ្តាលគ្រូបង្គោល ដល់មន្ត្រីរដ្ឋលេខាធិការអាកាសចរស៊ីវិល»។
លោកបានទទួលស្គាល់ថា មជ្ឈមណ្ឌលនេះ នឹងជួយពង្រឹងវិស័យអាកាសចរស៊ីវិល និងការពង្រឹងក្របខណ្ឌបច្ចេកទេសច្បាប់ ឲ្យកាន់តែប្រសើរថែមទៀត ដើម្បីការពារសន្តិសុខ សុវត្ថិភាព តាមផ្លូវអាកាស ស្របពេលភ្ញៀវទេសចរជាតិ និងអន្តរជាតិបាន និងកំពុងចេញចូលកម្ពុជា កាន់តែច្រើន។ «ការកែលម្អអាកាសយានដ្ឋានអន្តរជាតិភ្នំពេញ ខេត្តសៀមរាប និងអាកាសយានដ្ឋានអន្តរជាតិខេត្តព្រះសីហនុបាន ដែលធ្វើដំណើរតាមផ្លូវកើនឡើងគួរឲ្យកត់សម្គាល់ និងការកើនឡើងចំនួនអ្នកធ្វើដំណើរ អន្តរជាតិតាមផ្លូវអាកាសជាមធ្យម ៨ភាគរយ ក្នុងមួយឆ្នាំពីឆ្នាំ ២០០៨ ដល់២០១៦ ចំនួនសរុបកើនឡើង ពី២,៥លាននាក់ ដល់៧លាននាក់»។ លោក វណ្ណាល់ បញ្ជាក់បន្ថែម។
ក្នុងឱកាសនោះដែរ លោកបានឆ្លៀតអំពាវនាវមន្ត្រីអាកាសចរស៊ីវិល ក្រុមហ៊ុនអាកាសយានដ្ឋានកម្ពុជា (Cambodia Airport) ក្រុមហ៊ុនសេវាកម្មនាំផ្លូវហោះហើរកម្ពុជា (CATS) និងក្រុមហ៊ុនដឹកជញ្ជូនផ្លូវអាកាសទាំងអស់ ឲ្យបញ្ជូនបុគ្គលិកដែលចង់សិក្សាជំនាញអាកាសចរស៊ីវិល និងបង្កើនចំណេះដឹងបន្ថែម មកសិក្សានៅមជ្ឈមណ្ឌលហ្វឹកហ្វឺន ដែលសាងសង់លើផ្ទៃដី៨ពាន់ម៉ែត្រការ៉េ នៅអាកាសយានដ្ឋានអន្តរជាតិភ្នំពេញ តាមតម្រូវការរបស់ពួកគេផង។
គួរបញ្ជាក់ថា មជ្ឈមណ្ឌលហ្វឺកហ្វឺនអាកាសចរស៊ីវិល ដែលបង្កើតឡើងក្រោមកិច្ចព្រមព្រៀង រវាងទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងទីស្តីការគណៈរដ្ឋមន្ត្រីនេះ ចំណាយថវិកាសង់ចំនួន ១០លាន ១០០ពាន់ ដុល្លារអាមេរិក និងចំណាយពេលសង់រយៈពេល ៤ឆ្នាំ ចាប់ពីឆ្នាំ ២០១៣ ដល់ឆ្នាំ ២០១៧នេះ។ បច្ចុប្បន្ននេះ ក្រុមហ៊ុនអាកាសចរណ៍អន្តរជាតិជាង ៣០ និងក្រុមហ៊ុនអាកាសចរណ៍ក្នុងស្រុក៤ កំពុងបម្រើសេវានៅកម្ពុជា៕
Tag:
ម៉ៅ ហាវណ្ណាល់
អាកាសចរ
អាកាសយានដ្ឋាន
KOICA
© រក្សាសិទ្ធិដោយ thmeythmey.com