បើកបរមិនពាក់មួក ឬខ្សែក្រវ៉ាត់សុវត្ថិភាព និងប្រើប្រាស់ទូរសព្ទគ្មានឧបករណ៍ភ្ជាប់សំឡេង ត្រូវរងពិន័យ

ជាតិ

បើកបរមិនពាក់មួក ឬខ្សែក្រវ៉ាត់សុវត្ថិភាព និងប្រើប្រាស់ទូរសព្ទគ្មានឧបករណ៍ភ្ជាប់សំឡេង ត្រូវរងពិន័យ

24, Mar 2017 , 8:19 am

រូបភាព

ដោយ:

ភ្នំពេញ៖ អ្នកបើកបរយានយន្តត្រូវរងពិន័យប្រាក់ពី ១ម៉ឺន៥ពាន់ ដល់៥ម៉ឺនរៀល ប្រសិនបើពួកគេមិនបានមិនពាក់មួក ឬខ្សែក្រវ៉ាត់សុវត្ថិភាព និងប្រើប្រាស់ទូរសព្ទគ្មានឧបករណ៍សម្លេងភ្ជាប់ទំនាក់ទំនង នៅពេលបើកបរយានយន្ត។ នេះបើតាមមាត្រា៦ នៃអនុក្រឹត្យស្តីពី ការពិន័យអន្តរការណ៍ចំពោះអំពើល្មើសនឹងច្បាប់ស្តីពី ចរាចរណ៍ផ្លូវគោក។

រដ្ឋាភិបាលបានបង្គាប់សមត្ថកិច្ចអនុវត្តច្បាប់តាមអនុក្រឹត្យស្តីពីការពិន័យអន្តរការណ៍ថ្មីឲ្យពិន័យចំពោះអ្នកបើកបរទោចក្រយានយន្ត ឬទោចក្រយានយន្តសណ្តោងរ៉ឺម៉ក ឬត្រីចក្រយានយន្តទឹកប្រាក់ចំនួន ១៥០០០ (មួយម៉ឺនប្រាំពាន់)រៀល, អ្នកបើកបរយានយន្តធុនស្រាលចំនួន ២៥០០០ (ពីរម៉ឺនប្រាំពាន់) រៀល និងអ្នកបើកបរយានយន្តធុនធ្ងន់ចំនួន ៥ ០០០០ (ប្រាំម៉ឺន) រៀល។

ក្រៅករណីល្មើសខាងលើ សមត្ថកិច្ចនឹងពិន័យអ្នកបើកបរយានយន្តចំនួនទឹកប្រាក់ដូចគ្នា ក្នុងករណីពួកគេ បើកបរល្មើស រួមមាន អ្នកបើកបរទោចក្រយានយន្ត និងអ្នករួមដំណើរព្រមទាំងកុមារដែលមានអាយុពី ៣ (បី) ឆ្នាំឡើងទៅមិនពាក់មួកសុវត្ថិភាព ឬពាក់មួកសុវត្ថិភាពមិនត្រឹមត្រូវតាមស្តង់ដាជាតិ ឬពាល់មួក សុវត្ថិភាពដោយមិនដាក់គន្លឹះខ្សែសុវត្ថិភាព។ ត្រង់ចំណុចនេះ អនុក្រឹត្យបញ្ជាក់ថា៖«ការពិន័យអន្តរការណ៍ករណីល្មើសនេះ ត្រូវគិតតាមចំនួនអ្នកប្រព្រឹត្តល្មើសលើកលែងកុមារ»។

បន្ថែមលើសពីនេះ សមត្ថកិច្ចនឹងអ្នកបើកបរត្រីចក្រយានយន្ត ឬអ្នកបើកបរទោចក្រយានយន្តសណ្តោងរ៉ឺម៉កមិនពាក់មួកសុវត្ថិភាព ឬមិនពាក់មួកសុវត្ថិភាពមិនត្រឹមត្រូវតាមស្តង់ដាជាតិ ឬពាក់មួកសុវត្ថិភាពដោយមិនដាក់គន្លឹះខ្សែសុវត្ថិភាពផង។

តាមមាត្រា៦ នៃអនុក្រឹត្យ អ្នកបើកបរនឹងរងការពិន័យចំនួនទឹកប្រាក់ដូចគ្នាក្នុងករណីផ្សេងទៀត រួមមាន អ្នកបើកបរយានយន្តមិនបានភ្ជាប់តាមខ្លួននូវឯកសារដើម បណ្ណបើកបរយានយន្ត វិញ្ញាបនបត្រត្រួតពិនិត្យ លក្ខណៈបច្ចេកទេសយានយន្ត និងលិខិតអនុញ្ញាតធ្វើអាជីវកម្មចំពោះរថយន្តដែលប្រកបអាជីវកម្មដឹកជញ្ជូន, អ្នកបើកបរថយន្តគ្រប់ប្រភេទ ឬអ្នករួមដំណើរជិះកៅអីមុខរថយន្តមិនពាក់ខ្សែក្រវ៉ាត់សុវត្ថិភាព, អ្នកបើកបរយានយន្តឈប់ ឬចតល្មើសនឹងមាត្រា ២៣ នៃច្បាប់ស្តីពី ចរាចរណ៍ផ្លូវគោក, អ្នកបើកបរយានយន្តដែលកុងទ័រល្បឿនមិនដំណើរការ, អ្នកបើកបរយានយន្តប្រើប្រាស់ទូរសព្ទគ្មានឧបករណ៍សម្លេងភ្ជាប់ទំនាក់ទំនង នៅពេលកំពុងបើកបរ, អ្នកបើកបរយានយន្តប្រើសញ្ញាសូរសព្ទមិនត្រឹម ត្រូវតាមបទបញ្ញត្តិច្បាប់, អ្នកបើកបរយានយន្តដឹកអ្នកដំណើរលើសចំណុះល្មើសនឹងចំណុចទី៨ មាត្រា ៨ និងចំណុច ទី៦ មាត្រា ៥៦ និងអំពើល្មើសចំណុចទី៨ មាត្រា៨ នៃច្បាប់ស្តីពី ចរាចរណ៍ផ្លូវគោក លើកលែងករណីដឹកអ្នកជំងឺ។

អនុក្រឹត្យចុះនៅថ្ងៃទី២១ មីនានេះ បានបន្តបញ្ជាក់ថា ឪពុកម្តាយ ឬអាណាព្យាបាល ត្រូវបង់ប្រាក់ពិន័យអន្តរការណ៍ ប្រសិនបើអនីតិជនមានអាយុ ក្រោម ១៥ឆ្នាំ បានប្រព្រឹត្តល្មើសនឹងអនុក្រឹត្យ។ តាមអនុក្រឹត្យដដែល បុគ្គលដែលមិនសុខចិត្តនឹងសេចក្តីសម្រេចរបស់មន្ត្រីមានសមត្ថកិច្ចពេលអនុវត្តច្បាប់ មានសិទ្ធិប្តឹងតវ៉ាទៅប្រធានអង្គភាពដែលគ្រប់គ្រងមន្ត្រីអនុវត្តនោះផ្ទាល់នៅទូទាំងប្រទេស រយៈពេល ៣០ថ្ងៃយ៉ាងយូរ គិតពីថ្ងៃទទួលបង្កាន់ដៃពិន័យអន្តរការណ៍៕