អន្តរជាតិ
មេទ័ពណាតូ ចង់បានអាវុធនិងកម្លាំងទ័ពបន្ថែមដើម្បីទប់ទល់រុស្ស៊ី មេបញ្ជាការកំពូលកម្លាំងទ័ពសម្ព័ន្ធយោធាណាតូ ឧត្តមសេនីយ៍ផ្កាយ៤ Curtis M. Scaparrotti (រូបថត AP)
× នារយៈពេលចុងក្រោយ សម្ព័ន្ធយោធាណាតូ បានពង្រាយកងទ័ព និងអាវុធយុទ្ធភណ្ឌជាច្រើនទៅកាន់រដ្ឋជាប់ព្រំដែនរុស្ស៊ី ជាការឆ្លើយតបសកម្មភាពគំរាមកំហែងរបស់រុស្ស៊ី ដែលបានពង្រាយយោធាជាច្រើនដូចគ្នា។ យ៉ាងណាក្ដី មេបញ្ជាការជាន់ខ្ពស់កងកម្លាំងសម្ព័ន្ធយោធាណាតូ ឧត្តមសេនីយ៍ Curtis M. Scaparrotti ស្នើឲ្យបង្កើនវត្តមានទ័ព និងសព្វាវុធគ្រប់ប្រភេទឲ្យបានច្រើនថែមទៀត ដើម្បីទប់ទល់សកម្មភាពរបស់រុស្ស៊ី។
មេទ័ពកំពូលណាតូ ឧត្តមសេនីយ៍ Curtis M. Scaparrotti ស្នើឲ្យមានការបង្កើនវត្តមានយោធានៅតំបន់អឺរ៉ុប ដើម្បីឆ្លើយតបសកម្មភាពយោធារបស់រុស្ស៊ី នៅតាមបណ្ដោយព្រំដែនជាមួយអឺរ៉ុប។ លោក Scaparrotti បានប្រាប់សមាជិកព្រឹទ្ធសភាអាមេរិកនៅថ្ងៃទី២៣ ខែមីនា ថា បំណងរបស់រុស្ស៊ីដែលពង្រាយទ័ពតាមព្រំដែនជាមួយរដ្ឋអឺរ៉ុប គឺចង់បំបែកបំបាក់សម្ព័ន្ធយោធណាតូ ដែលចាំបាច់ត្រូវចាត់វិធានការឲ្យបានឆាប់។
លោកឧត្តមសេនីយ៍ Scaparrotti ស្នើដូចនេះក្នុងកិច្ចប្រជុំជាមួយគណៈកម្មាធិការយោធារបស់ព្រឹទ្ធសភាអាមេរិក ជុំវិញនយោបាយរបស់ប្រធានាធិបតី ដូណាល់ ត្រាំ ចំពោះសកម្មភាពយោធារបស់រុស្ស៊ី។ លោកនិយាយថា ណាតូត្រូវការកងទ័ពបន្ថែម ក៏ដូចជាយុទ្ធោបករណ៍ទំនើបៗដូចជាយន្តហោះ កប៉ាល់ចម្បាំង គ្រាប់រំសេវ និងក្រុមនាវាដឹកយន្តហោះ ដើម្បីបង្កើនសមត្ថភាពការពាររបស់កម្លាំងសម្ព័ន្ធមិត្តក្នុងការទប់ទល់រុស្ស៊ី។
បើតាមគេហទំព័រ Military.com ឧត្តមសេនីយ៍ Scaparrotti ដែលជាមេបញ្ជាការកងទ័ពអាមេរិកប្រចាំទ្វីបអឺរ៉ុបដែរនោះ ក៏ស្នើឲ្យមានការពង្រឹងកិច្ចសហប្រតិបត្តិការជាមួយក្រសួងការបរទេសផងដែរ ខណៈដែលក្រសួងនេះ ត្រូវបានប្រធានាធិបតី ដូណាល់ ត្រាំ កាត់បន្ថយប្រាក់ចំណាយប្រចាំឆ្នាំចំនួន២៨ភាគរយឯណោះ។ លោកពន្យល់ថា ការងាររបស់លោក ត្រូវពឹងផ្អែកជាមួយស្ថាប័នផ្សេងៗរបស់ប្រទេស ហើយវាក៍ជាអ្វីដែលបញ្ជាការអាមេរិកនៅអឺរ៉ុប និងក្រសួងការបរទេស ធ្លាប់ធ្វើរហូតមកដែរ។
ទន្ទឹមគ្នានេះ មេបញ្ជាការទ័ពណាតូខាងលើ ក៏និយាយបញ្ឆិតបញ្ឆៀងឲ្យនយោបាយងាកមកតំបន់អាស៊ីរបស់អតីតប្រធានាធិបតី បារ៉ាក់ អូបាម៉ា ទៀតផង។ លោកបញ្ជាក់ថា នយោបាយងាកមកតំបន់អាស៊ីនេះ ធ្វើឲ្យរអាក់រអួលដល់ការបង្កើនចំនួនទ័ពអាមេរិកនៅអឺរ៉ុប ដើម្បីត្រៀមទប់ទល់រុស្ស៊ី។ លោកបន្តថា នយោបាយនេះ បូករួមទាំងការកាត់បន្ថយថវិកាប្រចាំឆ្នាំ២០១១ បានធ្វើឲ្យកម្លាំងទ័ពអាមេរិកទាំងជើងគោក និងជើងអាកាស ធ្លាក់ចុះគួរឲ្យកត់សម្គាល់។
ប៉ុន្មានខែនេះ អាមេរិក និងសម្ព័ន្ធមិត្តរបស់ខ្លួន បានពង្រាយកងទ័ពចំនួន៤ពាន់នាក់ ទៅកាន់រដ្ឋជាប់រុស្ស៊ីចាប់ពីអឺរ៉ុបខាងកើត ដល់តំបន់បាល់ទិកដូចជាប៉ូឡូញ និងអេស្តូនីជាដើម។ ប៉ុន្តែមេបញ្ជាការកំពូលណាតូ Scaparrotti ព្រមានថា កងកម្លាំងទាំងអស់ ត្រូវតែមានធនធានសម្ភារឲ្យពេញលេញ។ បើមិនដូច្នេះ កងកម្លាំងទ័ពអចិន្ត្រៃយ៍របស់ទីបញ្ជាការអាមេរិកនៅអឺរ៉ុប មិនអាចទប់ទល់យោធារុស្ស៊ីបានឡើយនាថ្ងៃអនាគត៕
Tag:
NATO
រុស្ស៊ី
អាមេរិក
Curtis M. Scaparrotti
© រក្សាសិទ្ធិដោយ thmeythmey.com