Uber ផ្អាកកម្មវិធី «រថយន្តគ្មានមនុស្សបើក» ក្រោយមានករណីគ្រោះថ្នាក់នៅ Arizona

រថយន្ត

អន្តរជាតិ

26, Mar 2017 , 11:03 am

រូបភាព

រថយន្តគ្មានមនុស្សបើកដែលដំណើរការដោយក្រុមហ៊ុន Uber ជួបគ្រោះថ្នាក់កាលពីថ្ងៃទី២៤ ខែមីនា នៅArizona។ រូបថត REUTERS

ដោយ: ថ្មីៗ

ក្រុមហ៊ុនបណ្តាញសេវាកម្មដឹកជញ្ជូន Uber Technologies Inc. របស់សហរដ្ឋអាមេរិក បានប្រកាសផ្អាកកម្មវិធីសាកល្បងរបស់ខ្លួនទាក់ទងនឹងដំណើរការ «រថយន្តដោយគ្មានមនុស្សបើក» (Self-Driving Car) បន្ទាប់ពីមានការគ្រោះថ្នាក់ចរាចរណ៍នៅលើផ្លូវក្នុងរដ្ឋ Arizona កាលពីថ្ងៃសៅរ កន្លងមក។

«គ្រោះថ្នាក់ដែលបង្ករឡើងដោយរថយន្តគ្មានមនុស្សបើក របស់ក្រុមហ៊ុនមួយ មិនបានបង្កគ្រោះថ្នាក់ធ្ងន់ធ្ងរនោះឡើយ»។ នេះបើតាមការបញ្ជាក់របស់តំណាងក្រុមហ៊ុន Uber ដែលត្រូវបានដកស្រង់ដោយសារព័ត៌មាន NBC News។

ក្រុមហ៊ុន Uber បានដាក់កម្មវិធីសាកល្បងលើដំណើរការរថយន្តដោយគ្មានមនុស្សបើកនៅ Arizona, Pittsurgh និង San Francisco។ អ្នកនាំពាក្យ Uber បានបញ្ជាក់ប្រាប់ NBC News ថា៖ «យើងបន្តសិក្សាលើករណីគ្រោះថ្នាក់នេះដើម្បីឲ្យបានដឹងពីមូលហេតុពិតប្រាកដ»។

បើទោះបីជាករណីគ្រោះថ្នាក់នៅ Arizona អាចបង្កឡើងដោយរថយន្តម្ខាងទៀតក៏ដោយ ប៉ុន្តែគ្រោះថ្នាក់ចរាចរណ៍ទៅលើរថយន្តគ្មានមនុស្សបើក មិនមែនទើបតែកើតឡើងជាលើកទីមួយនោះឡើយ។ កាលពីឆ្នាំ២០១៦ ក្រុមហ៊ុនមួយចំនួនដូចជា Tesla Motors Inc Model, Alphabet Inc’s Google ជាដើមនោះ បានបង្កើតប្រតិបត្តិការបែបនេះ ហើយបានបង្កគ្រោះថ្នាក់ចរាចរណ៍រហូតដល់មានមនុស្សស្លាប់ថែមទៀតផង៕