ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
លោក គួច ម៉េងលី សម្ពោធអគារសិក្សាតម្លៃជាង១សែនដុល្លារនៅតំបន់ដាច់ស្រយាល ក្នុងខេត្តកំពង់ចាម
28, Mar 2017 ,
5:20 pm
រូបភាព
×
ដោយ:
ថ្មីៗ
កំពង់ចាម៖ លោកវេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិនៃក្រុមហ៊ុន ម៉េងលី ជេ. គួច អេឌ្យូខេសិន បានផ្តល់អគារសិក្សា ១ខ្នង ២ជាន់ស្មើនឹង ៤បន្ទប់ រួមទាំងជួយកែលម្អបរិស្ថានសិក្សាក្នុងសាលាបឋមសិក្សា គួច ម៉េងលី ទួលបេង ដែលស្ថិតក្នុងតំបន់ដាច់ស្រយាល នៅឃុំក្រឡា ស្រុកកំពង់សៀម ខេត្តកំពង់ចាម។
មូលនិធិ ម៉េងលី ជេ. គួច (Mengly J. Quach Foundation) ដែលជាមូលនិធិសប្បុរសធម៌របស់លោកឧកញ៉ា ម៉េងលី បានចំណាយថវិកាចំនួន ១២០,០០០ដុល្លារអាមេរិកសាងសង់អគារ និងកែលម្អហេដ្ឋារចនាសម្ព័ន្ធក្នុងសាលាបឋមសិក្សា គួច ម៉េងលី ទួលបេង ដើម្បីលើកកម្ពស់បរិយាកាសអប់រំសិស្សានុសិស្សបឋមសិក្សាដែលមានចម្ងាយជាង ១០គីឡូម៉ែត្រពីទីរួមខេត្តកំពង់ចាម។
ថ្លែងក្នុងពិធីសម្ពោធអគារសាលាបឋមសិក្សាថ្មី កាលពីថ្ងៃទី២៧ ខែមីនានេះ លោក ម៉េងលី បានប្រាប់មូលហេតុដែលលោកសម្រេចឧបត្ថម្ភអគារសិក្សាថ្មីនេះ ពីព្រោះលោកបានពិនិត្យឃើញពីបញ្ហាខ្វះខាត អគារបឋមសិក្សាសម្រាប់សិស្សក្នុងមូលដ្ឋានឃុំក្រឡា។ ម្យ៉ាងទៀត លោកបន្តថា វាក៏ជាចំណង់ចំណូលចិត្តជួយរួមចំណែកលើកកម្ពស់វិស័យអប់រំកម្ពុជាដោយខ្លួនលោកផ្ទាល់ផងដែរ។
លោកវេជ្ជបណ្ឌិតបន្តឲ្យដឹងទៀតថា នេះគ្រាន់តែជាសាលាបឋមសិក្សាទី២ដែលមូលនិធិ MJQ បានជួយសាងសង់រួចរាល់ បន្ទាប់ពីសាលាបឋមសិក្សា ថ្មកង្កែបគួច ប៉េងសាំង-ងិនហួយ ដែលស្ថិតនៅឃុំច្រណូក ស្រុកកំពង់លែង ខេត្តកំពង់ឆ្នាំង ដែលចំណាយថវិកាជាង ១០ម៉ឺនដុល្លារ កាលពីឆ្នាំ២០១០ កន្លងទៅ។ ក្រៅពីគម្រោងសាលាទាំងពីរនេះ លោកបង្ហើបឲ្យដឹងថា លោកគ្រោងជួយសង់មួយទៀតក្នុងខេត្តបាត់ដំបង និងសាលាដទៃទៀត ដើម្បីចូលរួមលើកកម្ពស់វិស័យអប់រំជាមួយរដ្ឋាភិបាល។
«ខ្ញុំមានគោលដៅជួយសិស្ស តាមតំបន់ដាច់ស្រយាល ពិសេសគឺ កន្លែងមានសាលា តែខ្វះបន្ទប់រៀន និងមានបន្ទប់រៀន មានសាលាខ្វះ ហេដ្ឋារចនាសម្ព័ន្ធ ឧបករណ៍ប្រើប្រាស់ជាដើម។ យើងព្យាយាមជួយតាមលទ្ធភាព...។ យើងចង់ពង្រឹងរឹង គ្រឹះអប់រំមូលដ្ឋាន ដើម្បីឲ្យកូនខ្មែរយើងចេះអាន ចេះសរសេរយ៉ាងហោចណាស់ត្រឹមថ្នាក់ទី៦ដែរ ប្រសិន បើគេមិនរៀនដល់ថ្នាក់ទី៩...»។ ឧកញ៉ា ម៉េងលី បញ្ជាក់អ្នកសារព័ត៌មាន មុនបន្ថែមថា លោកមានគោលដៅចូលរួមចំណែកលើកកម្ពស់វិស័យអប់រំ ស្របតាមគោលនយោបាយលើវិស័យអប់រំរបស់រដ្ឋាភិបាល។
បន្ថែមលើសពីនេះ លោកបានអំពាវនាវសប្បុរសជនទាំងក្នុង និងក្រៅប្រទេសឲ្យចូលរួមជួយឧបតម្ភថវិកា និងសម្ភារៈតាមលទ្ធភាព ដើម្បីជួយអភិវឌ្ឍធនធានមនុស្សក្នុងវិស័យអប់រំ និងវិស័យដទៃរបស់កម្ពុជា។ ក្រៅពីការផ្តល់អគារសិក្សាថ្មី លោកក៏បានផ្តល់សម្ភារៈសិក្សា និងកង់ថ្មីចំនួន ៦៦ គ្រឿង រួមទាំងកាបូបសិក្សាចំនួន ២៦៨ ដល់សិស្សានុសិស្សក្នុងសាលាបឋមសិក្សានៅជនបទក្រាលដោយបេតុងអមដោយសួនច្បារបៃតងដ៏ស្រស់បំព្រងនោះផងដែរ។
ជាងនេះទៀត សប្បុរសជនដែលតែងជួយជនក្រីក្រក្នុងសង្គមរូបនេះ បានផ្តាំផ្ញើលោកកគ្រូ អ្នកគ្រូ និងសិស្សានុសិស្សឲ្យ ជួយចូលរួមថែទាំអគារសិក្សាថ្មី ដើម្បីបម្រើប្រយោជន៍ពួកគេយូរអង្វែង។ លោកបានបន្តក្រើនរម្លឹកសិស្សានុសិស្សឲ្យខិតខំសិក្សារៀនសូត្រក្រេបវិជ្ជាផង ដើម្បីទទួលចំណេះដឹងអភិវឌ្ឍខ្លួនគេ គ្រួសារ និងសង្គមជាតិឲ្យកាន់តែប្រសើរឡើង នៅពេលបច្ចុប្បន្ន និងថ្ងៃអនាគត។
ជាមួយគ្នា លោកស្រី ស្រី គឹមឆយ អភិបាល នៃគណៈអភិបាលស្រុកកំពង់សៀម និងលោក ហេង ជារិទ្ធី អនុប្រធានមន្ទីរអប់រំ យុវជន និងកីឡាខេត្តកំពង់ចាម សុទ្ធតែបានអរគុណមូលនិធិសប្បុរសធម៌ MJQ ដែលផ្តល់អគារសិក្សាថ្មីដល់សិស្សានុសិស្សក្នុងមូលដ្ឋានពួកគេ។ ពួកគេជឿជាក់ថា សិស្សានុសិស្សនឹងព្យាយាមសិក្សារៀនថែមទៀត ក្រោយពីពួកគេទទួលបានអគារសិក្សាថ្មី និងមានសួនកម្សាន្តកុមារអមដោយបរិស្ថានស្អាតត្រឹមត្រូវ។
ឱកាសនេះដែរ លោក សេង រី នាយកសាលាបឋមសិក្សា គួច ម៉េងលី ទួលបេង បានរៀបរាប់ពីប្រវត្តិសាលាថា សាលាបឋមសិក្សាទួលបេង ត្រូវបានសង់ឡើងដោយសហគមន៍ពួកគេផ្ទាល់ ក្នុងឆ្នាំ១៩៩៦។ លោករម្លឹកថា ពេលនោះ សាលាមានអគារសិក្សាធ្វើពីឈើចំនួនមួយខ្នង ស្មើនឹងពីបន្ទប់ប៉ុណ្ណោះ។ ក្រោយមកទៀត លោកបន្តថា អង្គការមិនមែនរដ្ឋាភិបាលអន្តរជាតិ បានជួយសាងសង់អគារសិក្សាថ្មីធ្វើពីថ្មចំនួនមួយខ្នងស្មើនឹងពីរបន្ទប់ និងនៅចុងឆ្នាំ២០១៦កន្លងទៅ មូលនិធិ MJQ បានសង់អគារមួយខ្នង ពីរជាន់ ស្មើនឹងបួនបន្ទប់ រហូតមកទល់ពេលបច្ចុប្បន្ន។
លោកបញ្ជាក់ថា៖«យើងធ្លាប់ប្រឈមបញ្ហាខ្វះបន្ទប់សិក្សាខ្លាំង ពេលខ្លះសិស្សរៀនក្រៅបន្ទប់ផង។ តែបច្ចុប្បន្ន សិស្សានុសិស្សមានចាប់ពីកម្រិតមត្តេយ្យសិក្សា រហូតដល់ថ្នាក់ទី៦មានបន្ទប់សិក្សាល្អប្រសើរត្រឹមត្រូវ» ។ លោកបានថ្លែងអំណរគុណចំពោះមូលនិធិ ម៉េងលី ជេ. គួច ហើយប្តេជ្ញាជំរុញគុណភាពអប់រំដល់សិស្សានុសិស្សថែមទៀត។
គួរបញ្ជាក់ថា ដោយឃើញទឹកចិត្តសប្បុរសធម៌លោកឧកញ៉ា ម៉េងលី ពលរដ្ឋរស់នៅតំបន់នេះបានស្នើប្ដូរឈ្មោះសាលាបឋមសិក្សាទួលបេងទៅជា សាលាបឋមសិក្សា គួច ម៉េងលី ទួលបេង វិញ។ ក្រសួងអប់រំ យុវជន និងកីឡា បានទទួលស្គាល់ឈ្មោះសាលាបឋមសិក្សា គួច ម៉េងលី ទួលបេង តាមរយៈប្រកាស លេខ៨៧២ អយក.ប្រក របស់រដ្ឋមន្ត្រីក្រសួងអប់រំ យុវជន និងកីឡា ចុះថ្ងៃទី១២ ខែកញ្ញា ឆ្នាំ២០១៦ ៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
ម៉េងលី ជេ. គួច
Mengly J. Quach Foundation
សប្បុរសធម៌
© រក្សាសិទ្ធិដោយ thmeythmey.com
អត្ថបទពេញនិយម
នាយទាហាន ៨រូប ត្រូវបានព្រះមហាក្សត្រដំឡើងឋានន្តរស័ក្តិផ្កាយ៤
6 ថ្ងៃ
«មជ្ឈការ»មានន័យខុសពី«វិមជ្ឈការ»ដូចម្តេច?
5 ថ្ងៃ
អាចសរសេរបានថា «រួញរា» ឬ «រញ់រា» ប៉ុន្តែមិនមែន «រុញរា» ឡើយ
7 ថ្ងៃ
«ប្រេសិត»មានន័យដូចម្តេច?
6 ថ្ងៃ
គ្រឿងឥស្សរិយាភរណៈ គឺ «មេដាយ» មិនមែន «មេដៃ» ឡើយ
2 ថ្ងៃ
អត្ថបទពេញនិយមបន្ថែម