អន្តរជាតិ
Brexit៖ នាយករដ្ឋមន្ត្រីអង់គ្លេស ផ្ញើលិខិតជូនដំណឹងនៃការចាកចេញទៅឲ្យអឺរ៉ុប នាយករដ្ឋមន្ត្រី Theresa May ចុះហត្ថលេខាលើលិខិតជូនដំណឹងនៃការចាកចេញពីសហភាអឺរ៉ុប (រូបភាព AFP)
× នាយករដ្ឋមន្ត្រីចក្រភពអង់គ្លេស Theresa May បានចុះហត្ថលេខាលិខិតជូនដំណឹងស្តីពីចាកចេញពីសហភាពអឺរ៉ុបហើយនៅថ្ងៃទី២៨ ខែមីនា។ លិខិតជូនដំណឹងនេះ ត្រូវបញ្ជូនទៅឲ្យប្រធានក្រុមប្រឹក្សាអឺរ៉ុប Donald Tusk ដើម្បីចាប់ផ្ដើមការចរចាចែកផ្លូវគ្នា ដោយអនុវត្តតាមមាត្រា៥០ សន្ធិសញ្ញា Lisbon ។ ចក្រភពអង់គ្លេស និងសហភាពអឺរ៉ុប នឹងមានពេល២ឆ្នាំដើម្បីចរចាលែងលះគ្នា ដែលធ្វើឲ្យចក្រភពនេះ ក្លាយជារដ្ឋទី១ ចាកចេញពីអង្គការអន្តររដ្ឋាភិបាលដ៏ធំនេះ។
ក្រោយរង់ចាំអស់ពេល៩ខែ ចក្រភពអង់គ្លេស បានចាប់ផ្ដើមដំណើរការចាកចេញពីសហភាពអឺរ៉ុបហើយ។ នាយករដ្ឋមន្ត្រី Theresa May បានចុះហត្ថលេខាលើលិខិតជូនដំណឹងនៃការចាកចេញនេះ ក្រោយសភាអង់គ្លេសផ្ដល់អំណាចឲ្យលោកស្រីចរចាជាមួយសភាអឺរ៉ុប។ បន្ទាប់មក លិខិតលែងលះនេះ ត្រូវបញ្ជូនទៅកាន់សហភាពអឺរ៉ុប ដើម្បីប្រាប់ពីបំណងនៃការចាកចេញ អនុលោមតាមមាត្រា៥០ សន្ធិសញ្ញា Lisbon ។
២ឆ្នាំបន្ទាប់មក ចក្រភពអង់គ្លេស និងសហភាពអឺរ៉ុប នឹងចាប់ផ្ដើមការចរចាលើលក្ខខណ្ឌនៃការលែងលះគ្នា ដែលទំនងជាធ្វើឡើងនៅខែឧសភា ឬមិថុនា។ នៅថ្ងៃទី២៩ ខែមីនា នាយករដ្ឋមន្ត្រី ចូលរួមប្រជុំរបស់រដ្ឋសភា ដែលនៅទីនោះលោកស្រី នឹងសន្យាស្វែងរកលទ្ធផលដែលល្អសម្រាប់ប្រជាជនចក្រភពអង់គ្លេសទាំងអស់ នៅពេលចរចាជាមួយសហភាពអឺរ៉ុប។ ការចរចានេះ នឹងក្លាយជាវិញ្ញាសាថ្មីសម្រាប់អឺរ៉ុប ដែលមានអាយុ៦០ឆ្នាំមកហើយ។
បើគិតពីពេលបោះឆ្នោតប្រជាមតិខែមិថុនា ឆ្នាំ២០១៦ មកដល់ពេលចុះហត្ថលេខាខែមីនា ឆ្នាំ២០១៧ វាមានរយៈពេលយូរគួរសម ដែលធ្វើឲ្យគេឯងឆ្ងល់ថា ហេតុអ្វីបានជារដ្ឋាភិបាលអង់គ្លេសត្រូវការពេលយូរម្ល៉េះ បើគ្រាន់តែត្រូវជូនដំណឹងលែងលះប៉ុណ្ណោះនោះ។ តាមពិត នៅពេលដឹងលទ្ធផលបោះឆ្នោតដែលប្រជាជនអង់គ្លេសជ្រើសរើសការចាកចេញ រដ្ឋាភិបាលក្រុងឡុងដ៍ អាចជូនដំណឹងភា្លម ប៉ុន្តែលោកស្រី May ដែលស្នងតំណែងលោក David Cameron មិនទាន់ចង់ធ្វើដូច្នេះ ព្រោះចង់ត្រៀមខ្លួនឲ្យរួចស្រេចសិន។
ចំណែកខាងអឺរ៉ុបវិញ ប្រធានក្រុមប្រឹក្សាអឺរ៉ុប Donald Tusk នឹងជូនដំណឹងលែងលះគ្នានេះ ព្រមទាំងលក្ខខណ្ឌចរចា ទៅកាន់រដ្ឋសមាជិកទាំង២៧ ផ្សេងទៀត។ បើតាមសារព័ត៌មាន BBC មេដឹកនាំរដ្ឋសមាជិកអឺរ៉ុបទាំង២៧ នឹងបើកកិច្ចប្រជុំនៅខែមេសា ដើម្បីពិនិត្យលក្ខខណ្ឌត្រូវយកទៅចរចាជាមួយអង់គ្លេស ហើយគណៈកម្មការអឺរ៉ុប នឹងធ្វើជាតំណាងក្នុងការចរចានេះ។ គេមិនទាន់ដឹងច្បាស់ពីប្រធានបទសំខាន់នៃការចរចានៅឡើយ ប៉ុន្តែកិច្ចព្រមព្រៀងពាណិជ្ជកម្មទ្វេភាគី អាចត្រូវលើកឡើងក្នុងពេលចរចានេះដែរ។
លទ្ធផលនៃការចរចានេះ នឹងកំណត់វាសនាចក្រភពអង់គ្លេស ដែលមានទំហំសេដ្ឋកិច្ច២,៦ ទ្រីលានដុល្លារ និងជាមហាអំណាចនុយក្លេអ៊ែរទៀតផង។ ការចាកចេញរបស់ចក្រពភអង់គ្លេស ក៏ជាការវាយប្រហារមកលើសហភាពអឺរ៉ុប ដែលកំពុងរងគ្រោះដោយវិបត្តិហិរញ្ញវត្ថុ និងវិបត្តិជនភៀសខ្លួនស្រាប់ផង។ ភាគីទាំងសងខាង សុទ្ធតែសន្យារកលទ្ធផលដែលបម្រើផលប្រយោជន៍រៀងរាល់ខ្លួន ក្នុងរយៈពេល២ឆ្នាំនៃការចរចានេះ។
ជាមួយការជូនដំណឹងលែងលះនៅថ្ងៃទី២៩ ខែមីនា អង់គ្លេស នឹងចាកចេញពីសហភាពអឺរ៉ុបនៅខែមីនា ឆ្នាំ២០១៩ ។ នាយករដ្ឋមន្ត្រី May សន្យាហើយថា ការចរចាលែងលះ និងការចរចាលើកិច្ចព្រមព្រៀងពាណិជ្ជកម្មអាចធ្វើក្នុងដំណាលគ្នាតែម្ដង សំដៅចៀសវាងចំណាយពេលច្រើនសម្រាប់ការចរចាលើកក្រោយ ប៉ុន្តែវាមិនមែនជារឿងងាយស្រួលឡើយ។ ទាំងអឺរ៉ុប ទាំងអង់គ្លេស សុទ្ធតែការពារប្រយោជន៍រៀងខ្លួនពីលក្ខខណ្ឌចរចា។ ដូច្នេះវាមិនមែនជារឿងងាយស្រួលនោះទេ៕
Tag:
Brexit
អឺរ៉ុប
Theresa May
© រក្សាសិទ្ធិដោយ thmeythmey.com