កីឡាអន្តរជាតិ
អន្តរជាតិ
Kiatisak Senamuang លាឈប់ពីតំណែងគ្រូបង្វឹកជម្រើសជាតិថៃ
×
Kiatisak Senamuang បានលាលែងពីតំណែងជាគ្រូបង្វឹកក្រុមកីឡាបាល់ទាត់ជម្រើសជាតិថៃហើយ បន្ទាប់ពីដឹកនាំក្រុមធ្លាក់ក្នុងព្រឹត្តិការណ៍ជម្រុះ World Cup ២០១៨ នៅរុស្ស៊ី។
ក្រោយដឹកនាំក្រុមជម្រើសជាតិថៃមិនបានល្អ ក្នុងការប្រកួតវគ្គជម្រុះជុំទី៣នៅតំបន់អាស៊ី នៃពានរង្វាន់ពិភពលោក FIFA World Cup ឆ្នាំ២១០៨ លោក Kiatisak Senamuang ឬ Zico បានសម្រេចលាលែងពីតំណែងជាគ្រូបង្វឹកជម្រើសជាតិថៃតែម្តង។ ៧ប្រកួតក្រោមការដឹកនាំរបស់លោកក្នុងព្រឹត្តិការណ៍ជម្រុះនេះ ថៃដែលស្ថិតក្នុងពូលB រកបានតែមួយពិន្ទុប៉ុណ្ណោះ ដោយស្មើម្តង និងចាញ់៦ដង។
បើតាមការចុះផ្សាយរបស់ការសែតបាងកកប៉ុស្តិ៍ គ្រូបង្វឹកវ័យ៤៣ឆ្នាំបានសរសេនៅក្នុងបណ្តាញសង្គម Instagramកាលពីថ្ងៃអង្គារម្សិលមិញ ថា៖«ខ្ញុំចង់បញ្ចប់តួនាទីរបស់ខ្ញុំជាគ្រូបង្វឹកក្រុមជម្រើសជាតិថៃ ហើយនឹងជម្រះការងាររបស់ខ្ញុំនៅទីនេះក្នុងរយៈពេល៩០ថ្ងៃ។ ខ្ញុំចង់អរគុណដល់កីឡាករទាំងអស់ បុគ្គលិកគ្រូបង្វឹករបស់ខ្ញុំ ក៏ដូចជាក្រុមអ្នកគាំទ្របាល់ទាត់ និងក្រុមគ្រួសាររបស់ខ្ញុំដែលតែងតែនៅពីក្រោយខ្ញុំ»។
អតីតកីឡាករបាល់ទាត់ល្អបំផុតប្រចាំតំបន់អាស៊ីអាគ្នេយ៍ បានយល់ព្រមបន្តកិច្ចសន្យាដឹកនាំក្រុមដំរីនេះរយៈពេលមួយឆ្នាំទៀត ជាមួយនឹងសហព័ន្ធកីឡាបាល់ទាត់ថៃកាលពីថ្ងៃទី២៧ ខែកុម្ភៈ ២០១៧។ ដូច្នេះមានន័យថា Zico លាលែងពីតំណែងទាំងនៅជាប់កិច្ចសន្យារហូតដល់១១ខែទៀតឯណោះ។
ក្រោមការដឹកនាំរបស់អតីតកីឡាករ Huddersfield Town ថៃធ្លាប់ឈ្នះពាន AFF Championship ពីរដងក្នុងឆ្នាំ២០១៤ និងឆ្នាំ២០១៦។ ជាមួយនឹងការចាកចេញរបស់ Zico សហព័ន្ធកីឡាបាល់ទាត់ថៃក៏កំពុងតែរកគ្រូបង្វឹកថ្មីដែរ ហើយគ្រូថ្មីនេះទំនងជាគ្រូបបរទេសថែមទៀតផង៕
Tag:
បាល់ទាត់
Zico
World Cup
Kiatisak Senamuang
© រក្សាសិទ្ធិដោយ thmeythmey.com