ជាតិ
សេដ្ឋកិច្ច
ទូតអាមេរិក ជំរុញរដ្ឋាភិបាលសម្រួលការធ្វើពាណិជ្ជកម្មដល់វិស័យឯកជន តាមរយៈកិច្ចព្រមព្រៀង TFA រូបភាពពីហ៊េសប៊ុកក្រសួងពាណិជ្ជកម្ម
× ភ្នំពេញ៖ ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក William A. Heidt បានជំរុញរដ្ឋាភិបាលកម្ពុជាស្វែងរកយន្តការអនុវត្ត និងចាប់យកឱកាសពីបទបញ្ញត្តិនៃកិច្ចព្រមព្រៀងសម្រួលពាណិជ្ជកម្ម (Trade Facilitation Agreement, TFA) សម្រាប់ជាប្រយោជន៍ដល់សហគ្រិនកម្ពុជា។
កម្ពុជាបានផ្ដល់សច្ចាប័នលើកិច្ចព្រមព្រៀង TFA នៅឆ្នាំ២០១៥ ។ កិច្ចព្រមព្រៀងសម្រួលពាណិជ្ជកម្ម (Trade Facilitation Agreement, TFA) គឺជាកិច្ចព្រមព្រៀងពហុភាគីរបស់អង្គការពាណិជ្ជកម្មពិភពលោក (WTO) ដែលបានចូលជាធរមាននៅខែកុម្ភៈឆ្នាំ២០១៧ ។ កិច្ចព្រមព្រៀង TFA ផ្ដោតសំខាន់លើការសម្រួលនីតិវិធីបែបបទនៃការដោះដូរទំនិញ និងសេវាពីប្រទេសមួយទៅប្រទេសមួយ ដែលការសម្រួលនេះនឹងជួយកាត់បន្ថយថ្លៃចំណាយ និងបង្កភាពងាយស្រួលដល់ពាណិជ្ជករ។ បើតាមអង្គការ OECD ការអនុវត្តកិច្ចព្រមព្រៀង TFA នឹងជួយកាត់បន្ថយថ្លៃចំណាយលើការធ្វើពាណិជ្ជកម្មចំនួន ១២,៥ភាគរយ ទៅ១៧,៥ភាគរយ ហើយប្រទេសអភិវឌ្ឍន៍តិចតួចនឹងទទួលបានអត្ថប្រយោជន៍នេះច្រើនជាងគេបំផុត។
លោក William A. Heidt បានចាត់ទុក TFA ជាច្រកមួយអាចពង្រឹងការប្រកួតប្រជែងរបស់កម្ពុជាលើទីផ្សារអន្តរជាតិ។ ថ្លែងសន្ទរកថាបើកសិក្ខាសាស្ដីពីការអនុវត្តកិច្ចព្រមព្រៀងសម្រួលពាណិជ្ជកម្មរបស់អង្គការពាណិជ្ជកម្មពិភពលោក កាលពីថ្ងៃទី៤ មេសា ឯកអគ្គរដ្ឋទូតអាមេរិក បានបញ្ជាក់ដូច្នេះ៖«ការកាត់បន្ថយបន្ថយថ្លៃនាំចេញ-ចូលទំនិញ និងសេវា និងការបង្កលក្ខណៈងាយស្រួលដល់លំហូរពាណិជ្ជកម្មទៅទីផ្សាអន្តរជាតិរបស់កម្ពុជា នឹងជំរុញដោយផ្ទាល់នូវភាពប្រកួតប្រជែងកម្រិតតំបន់ និងពិភពលោករបស់កម្ពុជា និងបន្តបាននូវកំណើនសេដ្ឋកិច្ច»។
ទន្ទឹមនឹងជំរុញកម្ពុជាលើការសម្រួលពាណិជ្ជកម្ម លោក William A. Heidt បានកត់សំគាល់ពីបញ្ហានានាដែលបង្កការលំបាក់ដល់វិស័យឯកជន។ លោកប្រាប់ថា បើទោះបីកម្ពុជាបានធ្វើកំណែទម្រង់សំខាន់ៗមួយចំនួនក្នុងរយៈពេល១០ចុងក្រោយនេះក្ដី ប៉ុន្តែការធ្វើពាណិជ្ជកម្មនៅកម្ពុជានៅតែជួបក្ដីកង្វល់ជុំវិញបញ្ហាការិយាល័យធិបតេយ្យ, ការធ្វើសេចក្ដីសម្រេចចិត្តរបស់រដ្ឋាភិបាលខ្វះតម្លាភាព និងការអនុវត្តបទបញ្ញត្តិមួយចំនួនគ្មាននិរន្តរភាព។ លោកបន្តថា បញ្ហាទាំងនេះជះឥទ្ធិពលជាពិសេសដល់សហគ្រាសខ្នាតតូចនិងមធ្យម (SME) ។
អគ្គរដ្ឋទូតអាមេរិករូបនេះបន្តថ្លែងថា រដ្ឋាភិបាលកម្ពុជាគួរក្ដាប់យកឱកាសពីការអនុវត្តបញ្ញតិនៃកិច្ចព្រមព្រៀង TFA ដែលកិច្ចព្រមព្រៀងនេះតម្រូវឲ្យសមាជិករបស់ខ្លួនលុបបំបាត់នីតិវិធីស្មុគស្មាញ និងគ្មានតម្លាភាព ដើម្បីជំរុញកម្មវិធីកំណែតម្រង់ដែលមានគោលដៅធ្វើឲ្យប្រតិបត្តិការពាណិជ្ជកម្មមានភាពងាយស្រួល និងតម្លៃសមរម្យសម្រាប់សហគ្រិនកម្ពុជា។
លើសពីនេះទៀត កិច្ចព្រមព្រៀង TFA នឹងជួយដោះស្រាយលើបញ្ហាស្ដង់ដារអនាម័យ និងភូតគាមអនាម័យ ដែលអ្នកនាំចេញកសិផលកម្ពុជាជួបការលំបាកនាពេលកន្លងមក ប្រសិនបើរដ្ឋាភិបាលរកយន្តការផ្នែកជំនាញបច្ចេកទេស បទដ្ឋានច្បាប់ និងប្រព័ន្ធនានា អនុលោមតាមបញ្ញត្តិនៃ TFA នេះ។ លោកលើកឡើងថា កន្លងមក កម្ពុជានាំចេញកសិផលទៅទីផ្សារក្រៅប្រទេសតិចតួចណាស់ ដោយសារតែប្រព័ន្ធស្ដង់ដារអនាម័យ និងភូតគាមអនាម័យនេះឯង។
ម្យ៉ាងវិញទៀត ការសហការរវាងរដ្ឋាភិបាល និងវិស័យឯកជន គឺភាពចាំបាច់។ លោក William A. Heidt មានប្រសាសន៍ថា ប្រទេសដែលជោគជ័យលើសកម្មភាពពាណិជ្ជកម្ម បានទទួលស្គាល់វិស័យឯកជនថា ជាកត្តាជំរុញកំណើនសេដ្ឋកិច្ចដ៏សំខាន់ ហើយប្រទេសទាំងនោះសហការជាមួយវិស័យឯកជននៅពេលធ្វើសេចក្ដីសម្រេចចិត្តណាដែលទាក់ទងនឹងប្រតិបត្តិការរបស់ផ្នែកឯកជន ជាពិសេសលើវិស័យគយ៕
Tag:
TFA
William A. Heidt
© រក្សាសិទ្ធិដោយ thmeythmey.com