ជាតិ
អគ្គនាយកដ្ឋានអន្តោប្រវេសន៍ នឹងស្នើសម្ដេច ស ខេង បណ្តេញលោក ឈាន ពិសិដ្ឋ ចេញពីក្របខ័ណ្ឌ រូបថតលោក ឈាន ពិសិដ្ឋ ពីហ្វេសប៊ុកប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត
×
ភ្នំពេញ៖ អគ្គនាយកដ្ឋានអន្តោប្រវេសន៍ក្រសួងមហាផ្ទៃ នឹងស្នើទៅសម្តេច ស ខេង ដើម្បីសុំ បណ្តេញមន្ត្រីនគរបាលអន្តោប្រវេសន៍ ថ្នាក់វរសេនីយ៍ត្រីម្នាក់ឈ្មោះ ឈាន ពិសិដ្ឋ ចេញពីក្របខ័ណ្ឌនគរបាលជាតិ។
សំណើនេះធ្វើឡើងក្រោយពី លោក ឈាន ពិសិដ្ឋ ដែលគេស្គាល់ថាជាមន្ត្រីប៉ូលិសអន្តោប្រវេសន៍ដែលធ្លាប់មានជម្លោះជាមួយសកម្មជនគណបក្សសង្គ្រោះជាតិ កាលពីចុងឆ្នាំ២០១៦ កន្លងមក នៅបុស្តិ៍ច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យនោះ បានបង្កបញ្ហាផ្ទុះអាវុធមួយគ្រាប់ក្នុងអង្គភាព កាលពីថ្ងៃទី៩ ខែមេសា នេះ។
អ្នកនាំពាក្យអគ្គនាយកដ្ឋានអន្តោប្រវេសន៍ក្រសួងមហាផ្ទៃ លោក កែវ វណ្ណថន បាននិយាយថា អគ្គនាយកដ្ឋានអន្តោប្រវេសន៍កំពុងរៀបចំលិខិតដាក់ទៅរដ្ឋមន្ត្រីក្រសួងមហាផ្ទៃ ស្នើដាក់ពិន័យលោក ឈាន ពិសិដ្ឋ លុបឈ្មោះចេញពីបញ្ជីនគរបាល និងត្រូវទទួលទោសតាមផ្លូវតុលាការ ។ «រាល់មន្ត្រីនគរបាលទាំងអស់ដែលប្រព្រឹត្តល្មើសច្បាប់ត្រូវតែទទួលពិន័យក្របខ័ណ្ឌនគរបាលជាតិ និង ទទួលទោសចំពោះមុខច្បាប់ជាធរមាន»។ លោក កែវ វណ្ណថន បានប្រាប់សារព័ត៌មានថ្មីៗតាមរយៈទូរសព្ទ នៅថ្ងៃទី១០ មេសានេះ ស្របពេលលោក ឈាន ពិសិដ្ឋ ដែលហ៊ានបាញ់នាយកផ្នែករដ្ឋបាលពីក្រោយខ្នងចំស័ក្តិខាងឆ្វេងធ្លាក់ចុះពីលើស្មា កំពុងគេចខ្លួនមិនចូលបំភ្លឺ។
មន្ត្រីនគរបាលជាន់ខ្ពស់រូបនេះ បន្តឲ្យដឹងថា ក្រោយបណ្តេញចេញពីក្របខ័ណ្ឌនគរបាលជាតិ លោក ឈាន ពិសិដ្ឋ ត្រូវប្រឈមមុខនឹងផ្លូវច្បាប់តុលាការ ផ្អែកតាមបណ្តឹងជនរងគ្រោះ។ បើតាមលោក កែវ វណ្ណថន នៅពេលនេះសមត្ថកិច្ចកំពុងតាមចាប់ខ្លួនលោក ឈាន ពិសិដ្ឋ មកដោះស្រាយតាមផ្លូវច្បាប់ផងដែរ។
លោក វណ្ណថន ក៏បានផ្ញើសារដល់សមត្ថកិច្ចអន្តោប្រវេសន៍ទូទាំងប្រទេស ត្រូវប្រកាន់ភ្ជាប់នូវវិន័យនគរបាល និងច្បាប់ជាធរមាន។ បើមិនដូច្នេះទេ ពួកគេដែលប្រព្រឹត្តខុសច្បាប់នោះ ក៏នឹងត្រូវទទួលទោសតាមច្បាប់ជាដាច់ខាតដែរ។
ពាក់ព័ន្ធនឹងបញ្ហាខាងលើ នាយកប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានឲ្យដឹងថា កាលពីថ្ងៃទី៧ មេសា លោក ឈាន ពិសិដ្ឋ ប្រើអាវុធបាញ់នាយរដ្ឋបាលម្នាក់ឈ្មោះ សេម មករា ដែលបម្រើការងារក្នុងអង្គភាពជាមួយគ្នា បណ្ដាលឲ្យរបួសត្រង់ស្មា តែមិនប៉ះពាល់ដល់អាយុជីវិតទេ ។ ដើមចមដែលបណ្ដាឲ្យមានការបាញ់លោក សេម មករា នេះគឺដោយសារតែនៅថ្ងៃកើតហេតុនោះ គឺលោក មករា បានហៅបុគ្គលដែលមានជម្លោះនឹងគ្នា ដែលមានលោក ឈាន ពិសិដ្ឋ និងមន្ត្រីបំពេញបែបបទឆ្លងដែន លោក គឹម កែវរក្សា មកសម្របសម្រួល ។ ប៉ុន្តែក្រោយចេញពីបន្ទប់សម្របសម្រួលភាគីជម្លោះហើយនោះ ឈ្មោះ ឈាន ពិសិដ្ឋ បានជិះរថយន្តមកដល់ ហើយស្រែកជេរខ្លាំងៗ ទៅលើលោក សេម មករា ដោយបានយកកាំភ្លើងភ្ជង់គាត់ នឹងបានបាញ់ពីក្រោយនាយករដ្ឋបាលរូបនេះ បណ្ដាលឲ្យរងរបួសតែម្ដង ។ នេះបើតាមលិខិតរបស់ប៉ុស្តិនគរបាលច្រកទ្វារព្រំដែនអន្តរជាតិប៉ោយប៉ែត ។
គួររម្លឹកថា ប៉ូលិស ឈាន ពិសិដ្ឋ ធ្លាប់មានរឿងក្តីក្ដាំជាមួយលោក ឌិន ពុទ្ធី សកម្មជនគណបក្សសង្គ្រោះជាតិ ដែលបានល្បីល្បាញពេញបណ្តាញសង្គមហ្វេសប៊ុក កាលពីថ្ងៃទី២២ ខែធ្នូ ឆ្នាំ២០១៦ ម្ដងហើយ ដោយកាលនោះ លោក ឌិន ពុទ្ធី ត្រូវបានសមត្ថកិច្ចចាប់ខ្លួន ក្រោមការចោទប្រកាន់ថា បានបើករថយន្តបុកលោក ឈាន ពិសិដ្ឋ ដែលកំពុងឈរស្ទាក់ពីមុខរថយន្ត។ ដោយសារបញ្ហានេះលោក ឌិន ពុទ្ធី ត្រូវបានតុលាការសម្រេចឲ្យឃុំខ្លួនមួយរយៈផងដែរ ៕
Tag:
ឈាន ពិសិដ្ឋ
បោយប៉ែត
ព្រំដែន
មហាផ្ទៃ
© រក្សាសិទ្ធិដោយ thmeythmey.com