ជាតិ
សេដ្ឋកិច្ច
ចូលឆ្នាំខ្មែរ៖ អាស៊ាន ជាគោលដៅទេសចរណ៍ទី១ដែលពលរដ្ឋខ្មែរទៅកម្សាន្ត លោក ហូ វណ្ឌី អគ្គលេខាធិការសម្ព័ន្ធទេសចរណ៍ជាតិកម្ពុជា
× ភ្នំពេញ៖ ក្នុងឱកាសចូលឆ្នាំថ្មីឆ្នាំ ២០១៧នេះ ពលរដ្ឋខ្មែរមួយចំនួនបានចេញទៅកម្សាន្តនៅក្រៅប្រទេស។ ប្រទេសក្នុងតំបន់អាស៊ាន នៅតែគោលដៅទេសចរណ៍លំដាប់ទី១របស់ប្រជាពលរដ្ឋខ្មែរទៅកម្សាន្ត ខណៈប្រទេស ជប៉ុន ចិន និងកូរ៉េខាងត្បូងស្ថិតនៅលំដាប់ទី២ បន្ទាប់មកគឺក្រុងឌូបៃ នៃប្រទេសអារ៉ាប់រួម និងប្រទេសមួយចំនួននៅតំបន់អឺរ៉ុប។
លោក ហូ វណ្ឌី អគ្គលេខាធិការសម្ព័ន្ធទេសចរណ៍ជាតិកម្ពុជា បានថ្លែងប្រាប់សារព័ត៌មានថ្មីៗថា តំបន់អាស៊ាន ជាគោលដៅទី១ ដែលពលរដ្ឋខ្មែរទៅកម្សាន្តក្នុងឱកាសចូលឆ្នាំខ្មែរនេះ។ ប្រទេសទាំងនោះ មានប្រទេសថៃ វៀតណាម ម៉ាឡេស៊ី និងប្រទេសសឹង្ហបុរីជាដើម។ ក្រៅពីតំបន់អាស៊ាន ពលរដ្ឋខ្មែរចេញទៅកម្សាន្តនៅប្រទេសជប៉ុន កូរ៉េ ចិន ក្រុងឌូបៃប្រទេសអារ៉ាប់ និងតំបន់អឺរ៉ុប។ នេះបើតាម លោក ហូ វណ្ឌី ដែលបន្តបញ្ជាក់មូលហេតុថា ដំណើរកម្សាន្តក្នុងតំបន់អាស៊ាន ពលរដ្ឋខ្មែរចំណាយតិច និងងាយស្រួលជាងការទៅកម្សាន្តទៅប្រទេសផ្សេងទៀត។
លោក ខៀវ វឌ្ឍនា បុគ្គលិកផ្នែកបម្រើសេវាអតិថិជននៃក្រុមហ៊ុន World Pop បានឲ្យដឹងថា ក្រុមហ៊ុនលោក បានលក់កញ្ចប់ទេសចរណ៍ទៅប្រទេសជប៉ុនដាច់ជាងកញ្ចប់ទេសចរណ៍ដទៃទៀត ដោយសារនៅពេលនេះជារដូវផ្កាសាគូរ៉ារីក ដែលទាក់ទាញទេសចរឲ្យទៅកម្សាន្តនៅប្រទេសជប៉ុន។ លោកបន្ថែមថា ប្រទេសក្នុងតំបន់អាស៊ាន ក៏ជាគោលដៅទេសចរណ៍ខ្លាំងណាស់ដែរ សម្រាប់ពលរដ្ឋខ្មែរក្នុងឱកាសចូលឆ្នាំខ្មែរឆ្នាំនេះ។
ដោយឡែកគោលដៅទេសចរណ៍ក្នុងស្រុកវិញ ខេត្តសៀមរាប តំបន់ឆ្នេរ និងភាគឦសាន ពិសេស ខេត្តមណ្ឌលគិរី និងរតនគិរី បានស្រូបទាញអ្នកទេសចរ ក្នុងកំឡុងពេលចូលឆ្នាំថ្មីនេះ។ អគ្គលេខាធិការសម្ព័ន្ធទេសចរណ៍ជាតិកម្ពុជា លើកឡើងថា ខេត្តសៀមរាបទាក់ទាញទេសចរច្រើនបំផុត ដោយសារខេត្តនេះរៀបចំព្រឹត្តិការណ៍អង្គរសង្ក្រាន្ត៕
Tag:
ហូ វណ្ឌី
ទេសចរណ៍
ចូលឆ្នាំខ្មែរ
© រក្សាសិទ្ធិដោយ thmeythmey.com