កីឡាអន្តរជាតិ
អន្តរជាតិ
អាមេរិក កាណាដា និងម៉ិកស៊ិករួមគ្នាប្រជែងធ្វើម្ចាស់ផ្ទះ World Cup ២០២៦
× ប្រទេសនៅទ្វីបអាមេរិក៣ រួមមានសហរដ្ឋអាមេរិក កាណាដា និងម៉ិកស៊ិកប្រកាស់រួមគ្នាប្រជែងធ្វើជាម្ចាស់ផ្ទះពានរង្វាន់ពិភពលោក FIFA World Cup ឆ្នាំ២០២៦។ នេះបើយោងតាមការលើកឡើងរបស់លោក Victor Montagliani ជាប្រធានសហព័ន្ធកីឡាបាល់ទាត់តំបន់អាមេរិកខាងកើត អាមេរិកកណ្តាល និងការ៉ាអ៊ីប (CONCACAF)។
បើតាមការចុះផ្សាយរបស់សារព័ត៌មាន TheGuardian កាលពីថ្ងៃទី៦ ខែមេសាកន្លងទៅ ប្រទេសដែលស្ថិតក្នុងតំបន់ CONCACAFទាំងបីនេះបានរួមគ្នាដើម្បីស្នើសុំសិទ្ធិធ្វើជាម្ចាស់ផ្ទះព្រឹត្តិការណ៍ World Cup ២០២៦។ ការដេញថ្លៃសុំសិទ្ធិនេះ រំពឹងថានឹងបញ្ចប់នៅមុនឆ្នាំនេះ ហើយការសម្រេចចុងក្រោយនឹងត្រូវធ្វើឡើងរហូតដល់ខែឧសភាឆ្នាំ២០២០។
«កាណាដា អាមេរិក និងម៉ិកស៊ិកមានបំណងដេញថ្លៃរូមគ្នាដើម្បីធ្វើជាម្ចាស់ផ្ទះ World Cup ឆ្នាំ២០២៦ ដែលគំនិតនេះគឺស្ថិតក្នុងការពិភាក្សាគ្នានៅឡើយ ហើយវាក៏ជារឿងគួរឲ្យរំភើបដែរ ប្រសិនបើការស្នើសុំនេះទទួលបានជាផ្លែកផ្កានោះ»។ នេះជាការបញ្ជាក់របស់លោក Montagliani ប្រធានសហព័ន្ធកីឡាបាល់ទាត់តំបន់ CONCACAF។ លោកបានបន្ថែមទៀតថា៖«យើងមិនបានទទួលអ្វីនៅឡើយទេ ខណៈការចរចាក៏មិនទាន់មានលទ្ធផលដែរ ប៉ុន្តែវាជាសញ្ញាដ៏ល្អមួយដែលពួកគេ [ប្រទេសទាំង៣] អាចធ្វើការជាមួយគ្នាតាមរយៈការប្រកួតកីឡាបាល់ទាត់នេះ»។
សូមបញ្ជាក់ថាតាំងពីសហរដ្ឋអាមេរិកធ្វើជាម្ចាស់ផ្ទះពានរង្វាន់ពិភពលោក FIFA World Cup កាលពីឆ្នាំ១៩៩៤មក មិនទាន់មានប្រទេសនៅក្នុងតំបន់ CONCACAF មួយណាមានសិទ្ធិធ្វើជាម្ចាស់ផ្ទះក្នុងព្រឹត្តិការណ៍នេះទៀតនៅឡើយទេ ខណៈដែលរុស្ស៊ីបានទទួលសិទ្ធិនៅឆ្នាំ២០១៨ខាងមុខ មុនពេលប្រទេសកាតាធ្វើជាម្ចាស់ផ្ទះឆ្នាំ២០២២។
© រក្សាសិទ្ធិដោយ thmeythmey.com