កីឡាអន្តរជាតិ
អន្តរជាតិ
ថៃតែងតាំង លោក Milovan Rajevac ជាគ្រូបង្វឹកថ្មីនៃក្រុមជម្រើសជាតិ
× សហព័ន្ធកីឡាបាល់ទាត់ថៃ (FAT) បានប្រកាសតែងតាំងអតីតគ្រូបង្វឹកជម្រើសជាតិហ្គាណាលោក Milovan Rajevac ជាគ្រូបង្វឹកក្រុមបាល់ទាត់ជម្រើសជាតិថៃជាផ្លូវការ ដើម្បីជំនួសតំណែងគ្រូបង្វឹកចាស់លោក Kiatisuk Senamuang។ នេះបើតាមការចុះផ្សាយរបស់ការសែតបាងកកប៉ុស្តិ៍។
គ្រូបង្វឹកសញ្ជាតិសែប៊ី វ័យ៦៣ឆ្នាំរូបនេះ នឹងចាប់ផ្តើមដឹកនាំជម្រើសជាតិថៃពីថ្ងៃទី៤ ខែឧសភានេះតទៅ មុនពេលថៃត្រូវទទួលក្រុមអេមីរ៉ាតអារ៉ាប់រួមជើងទី២ នៅថ្ងៃទី១៣ ខែមិថុនា នៅទីក្រុងបាងកក នៃវគ្គជម្រុះជុំទី៣ World Cup ២០១៨។
Rajevac ធ្លាប់បានដឹកនាំក្រុមហ្គាណាឡើងដល់វគ្គ៨ក្រុមចុងក្រោយ World Cup ឆ្នាំ២០១០ នៅអាហ្វ្រិកខាងត្បូង។ លោកក៏ធ្លាប់ដឹកនាំក្រុមកាតា និងអាល់ហ្សេរីផងដែរ។
បើយោងតាមរបាយការណ៍ Milovan Rajevac ទទួលបានប្រាក់បៀវត្សរ៍ ២លានបាត (ជិត៦ម៉ឺនដុល្លារ) ក្នុងមួយខែ ដែលថ្លៃឈ្នួលនេះស្មើនឹងប្រាក់ដែល FAT ផ្តល់ឲ្យ Kiatisuk ផងដែរ។
សូមបញ្ជាក់ថា ក្រុមជម្រើសជាតិថៃបានអស់ឱកាសទៅរុស្ស៊ីហើយ បន្ទាប់ពីរកបានតែ១ពិន្ទុប៉ុណ្ណោះ ក្នុងចំណោម៦ប្រកួត នៃការប្រកួតវគ្គជម្រុះពូល B នាអំឡុងក្រោមការដឹកនាំរបស់ Kiatisuk Senamuang៕
Tag:
បាល់ទាត់
Kiatisuk Senamuang
Milovan Rajevac
© រក្សាសិទ្ធិដោយ thmeythmey.com