ស្ពានហាលមុខប្រាសាទអង្គរវត្ត បិទបណ្ដោះអាសន្នរហូតដល់ឆ្នាំ២០២០

ជាតិ

ស្ពានហាលមុខប្រាសាទអង្គរវត្ត បិទបណ្ដោះអាសន្នរហូតដល់ឆ្នាំ២០២០

02, May 2017 , 8:59 am

រូបភាព

ដោយ: ញឹក ស្រីល័ក្ខ (Nhek Sreyleak)

សៀមរាប៖ ស្ពានហាលមុខប្រាសាទអង្គរវត្ត នឹងត្រូវបិទដំណើរការបណ្ដោះអាសន្ន រហូតដល់ការជួសជុលរួចរាល់ក្នុងឆ្នាំ២០២០ ទើបបើកឲ្យដំណើរការឡើងវិញ។ ស្ពានហាលនេះ នឹងជួសជុលផ្នែកខាងជើងចំហៀងខាងលិច មានប្រវែង៩០ម៉ែត្រ។

ស្ពានហាលមុខប្រាសាទអង្គរវត្ត ត្រូវបានជួសជុលឡើងវិញ ក្នុងដំណាក់កាលទី៣ ដោយអាជ្ញាធរជាតិអប្សរា និងសាកលវិទ្យាល័យសូហ្វីយ៉ាប្រទេសជប៉ុន។ ដើម្បីសម្រួលដល់ដំណើរការជួសជុល និងបញ្ចៀសគ្រោះថ្នាក់ដោយយថាហេតុ អាជ្ញាធរបានផ្អាកការធ្វើដំណើរបណ្ដោះអាសន្នរហូតដល់ឆ្នាំ២០២០។

លោក សុខ សង្វារ អគ្គនាយករងនៃអាជ្ញាធរជាតិអប្សរា បានបញ្ជាក់ថា៖ «ស្ពានហាល នឹងត្រូវបិទបណ្ដោះអាសន្នរហូតដល់ការជួសជុលរួចរាល់ក្នុងឆ្នាំ២០២០ ទើបឲ្យសាធារណជនធ្វើដំណើរឆ្លងកាត់ឡើងវិញ»។ នេះបើតាមទំព័រហ្វេសប៊ុកផ្លូវការរបស់អាជ្ញាធរជាតិអប្សរា។

ស្ពានហាលមុខប្រាសាទអង្គរវត្ត គិតចាប់ពីទសវត្សឆ្នាំ១៩៥០មក ស្ពានហាលនេះ ត្រូវបានជួសជុលឡើងវិញ៣ដំណាក់កាលហើយ។ ដោយដំណាក់កាលទី១ គឺនៅឆ្នាំ១៩៥៣ ជួសជុលដោយប្រទេសបារាំង នៅចំហៀងខាងជើងផ្នែកខាងកើត និងដើមទសវត្សទី៦០ នៅពាក់កណ្ដាលផ្នែកខាងត្បូងទាំងស្រុង។ ចំណែក ដំណាក់កាលទី២ ពីឆ្នាំ១៩៩៦-២០០៧ ជួសជុលដោយសាកលវិទ្យាល័យសូហ្វីយ៉ានៃប្រទេសជប៉ុន រួមនឹងអាជ្ញាធរជាតិអប្សរាផ្នែកខាងជើងក្នុងជំហានទី១។

សម្រាប់ដំណាក់កាលទី៣ គឺអាជ្ញាធរជាតិអប្សរាសហការនឹងសាកលវិទ្យាល័យសូហ្វីយ៉ា បន្តជំហានទី២ ជួសជុលផ្នែកខាងជើងចំហៀងខាងលិច មានប្រវែង៩០ម៉ែត្រ ដែលបើកដំណើរការជួសជុលតាំងពីឆ្នាំ២០១៦ ហើយនឹងបញ្ចប់នៅឆ្នាំ២០២០ខាងមុខ។

គួរបញ្ជាក់ថា ដើម្បីជំនួសស្ពានហាលនេះ អាជ្ញាធរបានសាងសងស្ពានអណ្ដែតទឹក សម្រាប់ភ្ញៀវទេសចរជាតិ និងអន្តរជាតិ ធ្វើដំណើរ។ ស្ពានអណ្ដែតទឹក អាចទ្រទម្ងន់ជាង៤០០តោនក្នុងពេលតែមួយ ហើយស្ពាននេះ នឹងដាក់ឲ្យដំណើរការនៅដើមខែឧសភានេះ។ នេះបើតាមទំព័រហ្វេសប៊ុកផ្លូវការរបស់អាជ្ញាធរជាតិអប្សរាដដែល៕