ជាតិ
សេដ្ឋកិច្ច
រោងចក្រចម្រាញ់ប្រេងកាតតម្លៃ ៦២០ លានដុល្លារ ចាប់ផ្ដើមសាងសង់ រូបភាពពីក្រសួង រ៉ែនិងថាមពល
× ភ្នំពេញ៖ បន្ទាប់ពីពន្យារពេលជាច្រើនលើក គម្រោងសាងសង់រោងចក្រចម្រាញ់ប្រេងកាតរបស់ក្រុមហ៊ុនក្នុងស្រុក Cambodian Petrochemical Company (CPC) បានចាប់ផ្ដើមនៅថ្ងៃទី៤ខែឧសភា។
ក្រុមហ៊ុន CPC ដែលចាប់ដៃគូជាមួយក្រុមហ៊ុនចិន Sinomach China Perfect Machinery Industry Corp ទទួលបានអាជ្ញាបណ្ណសាងសង់រោងចក្រចម្រាញ់ប្រេងកាតពីរដ្ឋាភិបាល កាលពីឆ្នាំ២០១២ ។ រហូតដល់ខែឧសភាឆ្នាំ២០១៦ ក្រុមហ៊ុនបានជ្រើសរើសក្រុមហ៊ុនចិន CNPC North East Refining & Chemical Engineering សម្រាប់អនុវត្តការសាងសង់រោងចក្រចម្រាញ់ប្រេងកាតដំណាក់កាលទី១ មានតម្លៃ ៦២០លានដុល្លារ ដែលស្ថិតនៅក្នុងស្រុកព្រៃនុប ខេត្តព្រះសីហនុ ។ គម្រោងទាំងមូល ដែលមាន២ដំណាក់កាល មានតម្លៃសរុប ១,៦២ ពាន់លានដុល្លារ។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានអញ្ជើញជាអធិបតីក្នុងពិធីបើកការដ្ឋានសាងសង់រោងចក្រចម្រាញ់ប្រេងកាតដំណាក់កាលទី១ នេះ។ បើតាមព័ត៌មានដែលផ្សព្វផ្សាយលើទំព័រហ្វេសប៊ុកផ្លូវការរបស់ក្រសួងរ៉ែ និងថាមពល រោងចក្រចម្រាញ់ប្រេងកាតដំណាក់កាលទី១នេះ គ្រោងនឹងបញ្ចប់ការសាងសង់នៅឆ្នាំ ២០១៩ ហើយគម្រោងដំណាក់កាលទី២ គ្រោងសាងសង់នៅឆ្នាំ២០២២ ដែលគម្រោងទាំងមូលមានសមត្ថភាពផលិតប្រេង ៥លាន តោនក្នុងមួយឆ្នាំ។ ក្រសួងឲ្យដឹងទៀតថា រោងចក្រនេះនឹងផលិតប្រេងម៉ាស៊ូត ហ្គាស និងប្រេងសាំងគុណភាពស្ដង់ដារ EURO-5 ដែលបច្ចុប្បន្នមិនទាន់មាននៅលើទីផ្សារក្នុងតំបន់នៅឡើយ។
នេះគឺជារោងចក្រចម្រាញ់ប្រេងដំបូងគេនៅកម្ពុជា បើគិតចាប់ពីសម័យកាលក្រោយរបបខ្មែរក្រហមមក៕
Tag:
សេដ្ឋកិច្ច
ប្រេងកាត
© រក្សាសិទ្ធិដោយ thmeythmey.com