ជាតិ
សេដ្ឋកិច្ច
ជប៉ុននឹងបើកស្ថានកុងស៊ុលនៅខេត្តសៀមរាប
×
ភ្នំពេញ៖ រដ្ឋាភិបាលជប៉ុនគ្រោងបើកស្ថានកុងស៊ុលនៅខេត្តសៀមរាបនៅដើមឆ្នាំ២០១៨ ដើម្បីឆ្លើយតាមនឹងកំណើនភ្ញៀវទេសចរជប៉ុនមកកម្សាន្តនៅកម្ពុជា។ នេះបើតាម លោក ជុំ សន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ដែលត្រូវបានទីភ្នាក់ងារសារព័ត៌មានកម្ពុជា ដកស្រង់សំដី នៅថ្ងៃទី២ខែឧសភា។
លោក ជុំ សន្ទរី បានថ្លែងប្រាប់ក្រុមអ្នកសារព័ត៌មាននៅក្រោយជំនួបរវាងលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និង លោក Nobuo Kishi អនុរដ្ឋមន្ត្រីការបរទេសជប៉ុន នៅថ្ងៃទី២ខែឧសភាថា អនុរដ្ឋមន្ត្រីជប៉ុនបានលើកឡើងថារដ្ឋាភិបាលជប៉ុននឹងបើកការិយាល័យកុងស៊ុលជប៉ុនប្រចាំខេត្តសៀមរាបក្នុងអំឡុងខែមករាឆ្នាំ២០១៨ ខាងមុខ ដើម្បីឆ្លើយតបនឹងការរីកចម្រើននូវវិស័យទេសចរណ៍របស់ប្រទេសទាំងពីរ។
លោក ជុំ សន្ទរី បន្តប្រាប់អ្នកសារព័ត៌មានទៀតថា រដ្ឋមន្ត្រីការបរទេស លោក ប្រាក់ សុខុន បានស្វាគមន៍ចំពោះការបើកការិយាល័យកុងស៊ុលជប៉ុនប្រចាំនៅខេត្តសៀមរាបនេះ ដោយលោករំពឹងថាការិយាល័យកុងស៊ុលនេះ នឹងរួមចំណែកជំរុញកំណើនភ្ញៀវទេសចរជប៉ុនមកកម្ពុជា ក៏ដូចជាបង្កើនការផ្លាស់ប្ដូរពាណិជ្ជកម្មរវាងប្រទេសទាំងពីរផងដែរ។
ភ្ញៀវទេសចរជប៉ុនបានឈរនៅលេខរៀងទី៧ ក្នុងចំណោមទេសចរអន្តរជាតិមកទស្សនាកម្ពុជានៅឆ្នាំ២០១៦ ។ នៅឆ្នាំមុននេះ កម្ពុជាបានស្រូបទាញទេសចរជប៉ុនចំនួនជាង ១៩ម៉ឺននាក់ ក្នុងចំណោភ្ញៀវទេសចរសរុបជាង ៥លាននាក់៕
Tag:
ទេសចរណ៍
កុងស៊ុល
ជប៉ុន
© រក្សាសិទ្ធិដោយ thmeythmey.com