អន្តរជាតិ
×![]()
ដោយ: ធីតា
Timmy និងអ្នកស្រី Linda ជាម្តាយ បានកើតជំងឺ Holt-Oram ដែលជាជំងឺមួយប៉ះពាល់ដល់ការរីកលូតលាស់អវៈយវៈផ្នែកខាងលើ និងបេះដូង។ ទោះបីជាកើតមកគ្មានដៃដូចគេក៏ដោយ តែម្តាយ និងកូន រួមទាំងគ្រួសារ មានជីវិតដ៏រីករាយ ដោយបណ្តោយឲ្យពិការភាពរាំងស្ទះដំណើរទៅមុខនោះឡើយ។
រស់នៅក្នុងទីក្រុង Chicago សហរដ្ឋអាមេរិក Timmy Bannon អាយុ១២ឆ្នាំ និងអ្នកស្រី Linda Bannon អាយុ៣៨ឆ្នាំ ដែលជាម្តាយ ផ្តល់គំរូយ៉ាងអស្ចារ្យសម្រាប់មនុស្សជាតិ។ ដោយសារជំងឺ Holt-Oram ដ៏កម្រ ពួកគាត់កើតមកមិនមានដៃដូចគេនោះឡើយ ប៉ុន្តែពួកគេមិនដែលចាត់ទុកវាជាបញ្ហានោះដែរនៅក្នុងជីវិត។
ម្តាយកូនមានសមត្ថភាពអ្វីគ្រប់យ៉ាងដូចមនុស្សធម្មតា ដោយគ្រាន់តែប្រើជើងជំនួសប៉ុណ្ណោះ។ អ្នកទាំងពីរទទួលបានការយកចិត្តទុកដាក់យ៉ាងកក់ក្តៅពីសំណាក់លោក Richard ដែលជាស្វាមី និងជាឪពុក។ យោងតាមការផ្សាយរបស់ ABC Timmy ទៅរៀននៅសាលា ដោយគេមិនដែលទទួលរងនូវការសើចចំអកនោះឡើយ។
អ្នកស្រី Linda គឺជាគ្រូបង្រៀនថ្នាក់មតេយ្យ ហើយក៏បង្រៀនជំនាញផ្នែកពាណិជ្ជកម្មបន្ថែមផងដែរ។ ក្នុងបទសម្ភាសដែលផ្សាយនៅលើ Barcroft TV កាលពីឆ្នាំ២០១៤ អ្នកស្រី Linda ចង់បង្កើតអង្គការមិនរកប្រាក់ចំណេញមួយដើម្បីផ្តល់ក្តីសង្ឃឹមដល់គ្រួសារដែលមានសមាជិកជួបបញ្ហាអវៈយវៈ ដូចជារូបគាត់ និង Timmy។
អ្នកស្រី Linda មានបំណងប្រាថ្នាធំពីរសម្រាប់ Timmy។ ទីមួយគាត់រំពឹងថា កូនប្រុសខ្លួនបន្តរឹងមាំ និងទទួលស្គាល់ភាពពិតរបស់ខ្លួន។ ទីពីរ គាត់មានក្តីស្រមៃមួយថា Timmy អាចរកបានមនុស្សដែលស្រឡាញ់ខ្លួន ដូចជាលោក Richard ដែលស្រឡាញ់គាត់ និង Timmy យ៉ាងដូច្នោះដែរ៕
Tag:
Holt-Oram
ជីវិត
© រក្សាសិទ្ធិដោយ thmeythmey.com
