Zlatan Ibrahimovic ខ្សែប្រយុទ្ធរបស់ក្រុមបិសាចក្រហម Manchester United ជាប់ឈ្មោះក្នុងបញ្ជីជាអ្នកកីឡាដែលមានទ្រព្យច្រើនជាងគេបំផុតលំដាប់ទី២ នៅចក្រភពអង់គ្លេស តាមពីក្រោយកីឡាករប្រណាំងរថយន្ត Lewis Hamilton ដែលមានប្រាក់ ១៣១ លានផោន ប្រហែល១៧០ លានដុល្លារអាមេរិក។
ខ្សែប្រយុទ្ធចាស់វស្សាសញ្ជាតិស៊ុយអែត វ័យ ៣៥ ឆ្នាំ បានប្រជែងឈ្នះមិត្តរួមក្រុមកីឡាករ Wayne Rooney ដើម្បីក្លាយជាអ្នកមានទ្រព្យសម្បត្តិច្រើនជាងគេបំផុតក្នុងបញ្ជីកីឡាករបាល់ទាត់នៅអង់គ្លេស (Sunday Times Sport Rich List) ក្រោយផ្លាស់មក Man Utd កាលពីខែកក្កដាឆ្នាំមុន។ ប៉ុន្តែ Zlatan ស្ថិតក្នុងចំណាត់ថ្នាក់ទី២ប៉ុណ្ណោះ ក្រោមអ្នកបើករថយន្ត Formular 1 កីឡាករ Lewis Hamilton សម្រាប់អត្តពលិកដែលមានទ្រព្យច្រើនជាងគេនៅចក្រភពអង់គ្លេស។
ក្នុងចំណោមកីឡាករដែលមានជាងគេបំផុតទាំង១០រូបនៅចក្រភពអង់គ្លេស មាន ៥ រូបជាកីឡាករបាល់ទាត់ ២ រូបជាគ្រូបង្វឹក រួមទាំងកីឡាករវាយកូនបាល់ Andy Murray កីឡាករវាយកូនហ្គោល Rory McIlroy និងកីឡាករបាល់បោះ Luol Deng។
ខាងក្រោមនេះជាកីឡាករទាំង១០រូបដែល Sunday Times ដាក់បញ្ចូលក្នុងបញ្ជីអ្នកមានទ្រព្យច្រើនបំផុតក្នុងឆ្នាំ២០១៧ នេះ៖
១. Lewis Hamilton កីឡាករប្រណាំងរថយន្ត Formula One មានទ្រពសម្បត្តិ ១៣១ លានផោន ប្រមាណ១៧០ដុល្លារ។
២. Zlatan Ibrahimovic កីឡាករបាល់ទាត់ មានទ្រព្យសម្បត្តិ ១១០លានផោន ប្រមាណ១៤២លានដុល្លារ។
៣. Wayne Rooney កីឡាករបាល់ទាត់ មានទ្រព្យសម្បត្តិ ៩៣ លានផោន ប្រមាណ ១២០លានដុល្លារ។
៤. Jenson Button អតីតកីឡាករប្រណាំងរថយន្ត Formula One មានទ្រព្យសម្បត្តិ ៨៦លានផោន ប្រមាណ១១១លានដុល្លារ។
៥. Rory McIlroy កីឡាករវាយកូនហ្គោល មានទ្រព្យសម្បត្តិ ៨២លានផោន ប្រមាណ ១០៦លានដុល្លារ។
៦. Sir Andy Murray កីឡាករវាយកូនបាល់ មានទ្រព្យសម្បត្តិ ៧៧ លានផោន ប្រមាណជិត ១០០លានដុល្លារ។
៧. Jose Mourinho អ្នកចាត់ការក្រុមបាល់ទាត់ មានទ្រព្យសម្បត្តិ ៦១ លានផោន ប្រមាណ ៧៩លានដុល្លារ។
៨. Gareth Bale កីឡាករបាល់ទាត់ មានទ្រព្យសម្បត្តិ ៥៤ លានផោន ប្រមាណ ៧០លានដុល្លារ។
៩. Luol Deng កីឡាករបាល់បោះ មានទ្រព្យសម្បត្តិ ៥០លានផោន ប្រមាណជិត ៦៥លានដុល្លារ
១០. Pep Guardiola អ្នកចាត់ការក្រុមបាល់ទាត់ មានទ្រព្យសម្បត្តិ ៥០លានផោន ប្រមាណជិត ៦៥លានដុល្លារ។