ពីនេះ ពីនោះ
ព័ត៍មានសុខភាព
ផ្កាខាត់ណា និង ប្រូខូលី មួយណាល្អជាង?
× បើសិនជាគេឲ្យអ្នកជ្រើសរើស រវាងផ្កាខាត់ណា និងប្រូខូលី តើអ្នកជ្រើសរើសយកមួយណាទៅ? សម្រាប់ប្រទេសកម្ពុជាយើង ផ្កាខាត់ណា គឺជាបន្លែចាស់វស្សាហើយ ហើយក៏មានមនុស្សជាច្រើនស្គាល់ និងទទួលទានយ៉ាងសាំហើយដែរ ខណៈពេលដែលប្រូខូលីទើបតែលេចមុខក្នុងប្រទេសយើងរយៈពេលប៉ុន្មានឆ្នាំមុននេះទេ។ ថ្វីបើបន្លែទាំងពីរមុខនេះមានរសជាតិផ្សេងគ្នាក៏ដោយ ក៏មានមនុស្សជាច្រើនតែងយល់ និងគិតថា ប្រូខូលីមានលក្ខណៈមិនខុសគ្នានឹងផ្កាខាត់ណាទេ ទាស់តែមានពណ៌បៃតងប៉ុណ្ណោះ។ យ៉ាងណាមិញ នៅពេលយើងនិយាយដល់ជីវជាតិរបស់វាវិញ ទើបដឹងថាមានភាពខុសគ្នាច្រើន។
ប្រូខូលី និងផ្កាខាត់ណា សុទ្ធតែជារុក្ខជាតិស្ថិតក្នុងត្រកូលតែមួយ តែជីវជាតិដែលវាមានគឺខុសគ្នា។ ប្រូខូលី មានវីតាមីន A, C, K, Folate និងជាតិរ៉ែដូចជា កាលស្យូម ដែក ម៉ាញ៉េស្យូម និងផូស្វ័រច្រើនជាងផ្កាខាត់ណា។ អ្វីដែលបន្លែទាំងពីរនេះមានដូចគ្នាគឺ មានជាតិសរសៃ និងអង់ទីអុកស៊ីដង់ខ្ពស់។ ផ្កាខាត់ណា និងប្រូខូលីត្រូវបានគេស្គាល់ថា ល្អសម្រាប់សុខភាពបេះដូងដោយសារតែវត្តមានជាតិប៉ូតាស្យូម។ ជាតិសរសៃដ៏ខ្ពស់របស់បន្លែទាំងពីរនេះ មិនត្រឹមតែជួយសម្រួលដល់ផ្លូវរំលាយអាហារទេ តែក៏អាចជាផ្នែកមួយដល់ការសម្រកទម្ងន់ដែរ។ យ៉ាងណាមិញ បើសិនជាអ្នកត្រូវការជ្រើសរើសមួយក្នុងចំណោមពីរ ប្រូខូលីគឺផ្តល់សុខភាពល្អច្រើនជាងផ្កាខាត់ណា ដោយសារតែមានជីវជាតិច្រើនជាង។ តែបើសិនជាអ្នកជាមនុស្សគិតគូរអំពីកាឡូរីវិញ ផ្កាខាត់ណាគឺល្អជាង ដោយសារតែវាមានកាឡូរីទាបជាងប្រូខូលី។ ផ្កាខាត់ណា ១០០ក្រាមមាន ២៥កាឡូរី ខណៈពេលដែលប្រូខូលីក្នុងទម្ងន់ដូចគ្នាមានតែ ៣៤កាឡូរីប៉ុណ្ណោះ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com