ជាតិ
សេដ្ឋកិច្ច
Worldbridge សម្ពោធតំបន់សេដ្ឋកិច្ចពិសេសនៅភាគខាងត្បូងភ្នំពេញ
× ភ្នំពេញ៖ ឃែរី វើលដ៍ប្រ៊ីដ ជាតំបន់សេដ្ឋកិច្ចពិសេសថ្មីមួយទៀត ត្រូវបានដាក់ឲ្យដំណើរការជាផ្លូវការ នៅថ្ងៃទី៩ខែឧសភានេះ។ ក្រុមហ៊ុន Kerry Worldbridge Logistics ជាអ្នកប្រតិបត្តិការតំបន់សេដ្ឋកិច្ចមួយនេះ ដែលជាការចាប់ដៃគូវិនិយោគរួមគ្នារវាងក្រុមហ៊ុនក្នុងស្រុក Worldbridge International (Cambodia) និងក្រុមហ៊ុន Kerry Logistics ដែលមានមូលដ្ឋាននៅហុងកុង។
ក្រុមហ៊ុន Kerry Worldbridge Logistics បានចាប់ផ្ដើមបើកការដ្ឋានសាងសង់ហេដ្ឋារចនាសម្ព័ន្ធ ដើម្បីបង្កើតជាតំបន់សេដ្ឋកិច្ចពិសេស និងភណ្ឌាគយមានដែនកំណត់ ឃែរី វើលដ៍ប្រ៊ីដ តាំងពីពាក់កណ្ដាលឆ្នាំ២០១៥ លើផ្ទៃដីសរុប ៦៣ហិកតា ដែលមានទីតាំងស្ថិតនៅក្នុងសង្កាត់ព្រែកកំពឹស ខណ្ឌដង្កោ ភ្នំពេញ តាមបណ្ដោយផ្លូវជាតិលេខ២ ។
លោក សៀ ឫទ្ធី ប្រធានក្រុមហ៊ុន Kerry Worldbridge Logistics បានថ្លែងក្នុងពិធីសម្ពោធនេះថា គម្រោងអភិវឌ្ឍន៍នេះ មានមុខងារចំនួនពីរគឺ ជាតំបន់សេដ្ឋកិច្ចពិសេស ដែលជាកន្លែងជួលដីសម្រាប់ការវិនិយោគផ្ទាល់ពីបរទេស និងជាភណ្ឌាគារគយមានដែនកំណត់ (Customs Bonded Warehouse) និងអគារតាំងបង្ហាញផលិតផល។ លោកបញ្ជាក់ថា គម្រោងនេះវិនិយោគទឹកប្រាក់សរុបប្រមាណជាង ១០០លានដុល្លារ។
លោក សៀ ឫទ្ធី បន្ថែមថា ការសម្ពោធតំបន់សេដ្ឋកិច្ចពិសេស និងភណ្ឌាគយមានដែនកំណត់នេះ គឺជាសក្ខីភាពបញ្ជាក់ថា កម្ពុជាកំពុងអភិវឌ្ឍន៍វិស័យសេវាកម្មផ្នែកភ័ស្ដុភារ ដឹកជញ្ជូន និងភណ្ឌាគារគយមានដែនកំណត់ ក្នុងកម្រិតស្ដង់ដារអន្តរជាតិ ដូចបណ្ដាប្រទេសនានាក្នុងតំបន់ និងពិភពលោក ដែលអាចទ្រទ្រង់ និងលើកស្ទួយ សុវត្ថិភាព ប្រសិទ្ធិភាពក្នុងការដឹកជញ្ជូន ការចល័ត ការផ្ទេរ និងរក្សាទុកទំនិញរបស់អ្នកវិនិយោគ។
លោកគូសបញ្ជាក់ទៀតថា តាមរយៈគម្រោងមួយនេះ កម្ពុជានឹងអាចទាក់ទាញវិនិយោគផ្ទាល់ពីបរទេស ពិសេសលើវិស័យផលិតកម្ម ឧស្សាហកម្ម គ្រឿងយន្ត និងបរិក្ខារអេឡិចត្រូនិក ដែលត្រូវបានប៉ាន់ស្មានថានឹងមានលំហូរសាច់ប្រាក់វិនិយោគមិនតិចជាង ៣០០លានដុល្លារនោះទេ។ លោកបន្តថា គម្រោងនេះក៏នឹងផ្ដល់ការងារថ្មីមិនតិចជាងពីរម៉ឺនកន្លែង។
លោក សៀ ឫទ្ធី បានថ្លែងប្រាប់អ្នកសារព័ត៌មាននៅក្រោយពិធីសម្ពោធថា ក្រុមហ៊ុនរបស់លោកនឹងផ្ដល់ទីតាំង និងសេវាកម្មសម្រាប់តែការវិនិយោគលើផលិតផលដែលមានតម្លៃបន្ថែមប៉ុណ្ណោះ។ លោកបញ្ជាក់ថា មកទល់ពេលនេះ មានក្រុមហ៊ុនបរទេសចំនួន ៧ហើយដែលបានចុះកិច្ចព្រមព្រៀងជាមួយក្រុមហ៊ុនលោក ដើម្បីវិនិយោគក្នុងតំបន់សេដ្ឋកិច្ចពិសេសនេះ៕
Tag:
តំបន់សេដ្ឋកិច្ចពិសេស
សៀ ឫទ្ធី
© រក្សាសិទ្ធិដោយ thmeythmey.com