ជាតិ
ខ្ទង់ចំណាយរបស់គណបក្សនីមួយៗសម្រាប់ការបោះឆ្នោត
× ភ្នំពេញ៖ គណៈកម្មាធិការជាតិរៀបចំការបោះឆ្នោត បានកំណត់ការឃោសនាបោះឆ្នោត មានរយៈពេល១៤ថ្ងៃ គឺចាប់ពីថ្ងៃទី២០ឧសភា ដល់ថ្ងៃទី០២ មិថុនា។ ហើយការបោះឆ្នោតជ្រើសរើសក្រុមប្រឹក្សា ឃុំ-សង្កាត់ នឹងប្រព្រឹត្តទៅនៅថ្ងៃទី០៤ មិថុនា។ មុនយុទ្ធនាការបោះឆ្នោតមកដល់ គណបក្សនយោបាយនីមួយៗ បានត្រៀមថវិកាជាច្រើនសម្រាប់ការឃោសនាបោះឆ្នោត និងការបោះឆ្នោតទាំងមូលតែម្ដង។ ប៉ុន្តែគ្រាន់តែថា គណបក្សធំ មានខ្ទង់ចំណាយច្រើន រីឯគណបក្សតូច មានខ្ទង់ចំណាយតិចប៉ុណ្ណោះ។
ខាងក្រោមនេះគឺជាខ្ទង់ចំណាយរបស់គណបក្សនីមួយៗ ដែលបានឈរឈ្មោះបោះឆ្នោតក្រុមប្រឹក្សា ឃុំ-សង្កាត់ អាណត្តិទី៤នេះ ។
អនុប្រធានគណបក្សសាធារណរដ្ឋប្រជាធិបតេយ្យ លោក ចាន់ យ៉េត៖« យើងគ្រាន់តែមានយុទ្ធនាការដើរចែកខិតប័ណ្ណ ស្លាកសញ្ញាគណបក្សយកបិតនៅតាមដើមឈើ និងចាក់សំឡេងតាមមេក្រូផ្សព្វផ្សាយគោលនយោបាយបក្សតាមម៉ូតូមួយគ្រឿង តាមឃុំៗនីមួយប៉ុណ្ណោះ។ ហើយបើនិយាយពីថវិកាយើងអាចមានលទ្ធភាពចំណាយត្រឹមតែ៨០ម៉ឺនរៀលទេសម្រាប់មួយឃុំ ក្នុងឃុំទាំ១៦ ដែលយើងឈរឈ្មោះបោះឆ្នោតនេះ។ ចំណែកអ្នកសង្កេតការបោះឆ្នោត៨០នាក់ យើងអាចមានលទ្ធភាពជូនថវិកាដោយឡែកពី២ម៉ឺន ទៅ៣ម៉ឺនរៀលទៀត។ ក្នុងចំណោមឃុំទាំងនោះ យើងសង្ឃឹមឈ្នះខ្លះ ដូចជានៅខេត្តកំពង់ឆ្នាំង កំពង់ធំ បាត់ដំបង ប៉ៃលិនជាដើម…»។
ប្រធានគណបក្សយុវជនកម្ពុជា លោក ពេជ្យ ស្រស់៖«ការចំណាយរបស់គណបក្សយុវជនកម្ពុជា ប្រមាណជា៥ម៉ឺនដុល្លារ ទូទាំង១៩ឃុំ សម្រាប់បោះពុម្ភអាវ ពួក និងទង់បក្ស ព្រមទាំងមធ្យោបាយឃោសនាមួយចំនួនទៀត។ ចំពោះកៅអីឃុំ ខ្ញុំអាចសង្ឃឹមបានចាប់ពី១០ក្រុមប្រឹក្សាឡើងទៅ ហើយតំបន់ដែលយើងសង្ឃឹមគឺនៅស្រុកអូរាំងឪ ស្រុកត្បូងឃ្មុំ និងស្រុកដំបែរ។ យើងមិនទាន់វាយតម្លៃបានទេ ដោយហេតុការបោះឆ្នោតមិនទាន់កើតឡើង»។
អនុប្រធានគណបក្សជនជាតិដើមប្រជាធិបតេយ្យ លោក ស្រួយ ខេត៖«គណបក្សជនជាតិដើមខ្ញុំគ្មានប្រាក់សម្រាប់ការបោះឆ្នោតឃុំ សង្កាត់នោះទេ គឺសកម្មជនតាមឃុំនីមួយៗត្រូវលះបង់តាមដែលអាចធ្វើបាន សម្រាប់ឃោសនា តាមឃុំ។ ចំណែកសម្ភារឃោសនា ក៏មិនមានគ្រប់គ្រាន់នោះទេ។ ប៉ុន្តែខ្ញុំគិតថាមិនអីទេ ដោយសារសកម្មជនតាមឃុំនីមួយៗបានពន្យល់ប្រាប់ទៅអ្នកគាំទ្ររបស់គណបក្សជនជាតិដើមច្បាស់លាស់ណាស់ ហើយសកម្មជនគណបក្សជនជាតិដើមទាំង១៧ឃុំសង្កាត់បានត្រៀមខ្លួនរួចហើយ។ ហើយខ្ញុំអាចសង្ឃឹមឈ្នះកៅអីខ្លះ នៅតំបន់មណ្ឌលគិរី និងក្រចេះ»។
អគ្គលេខាគណបក្សប្រជាធិបតេយ្យមូលដ្ឋាន លោក សាម អ៊ីន៖«គណបក្សបានកំណត់ថវិកាចំណាយ១ពាន់ដុល្លារក្នុងមួយឃុំ ដែលយើងឈរឈ្មោះទាំង២៧ឃុំនេះ ដោយថវិកាទាំងនោះយើងចំណាយលើការបោះខិតបណ្ណ អាវយឺត ស្លាកសញ្ញាបក្ស ទិញមេក្រូ រួមអ្នកសង្កេតរបស់យើងជាង៣០០នាក់ផងដែរ។ ថវិកាទាំងនេះ បានមកពីសមាជិក អ្នកគាំទ្របក្ស និងពីខ្មែររស់នៅក្រៅប្រទេសដែលគាំទ្រគោលនយោបាយបក្សមូលដ្ឋានយើង។ ហើយយើងមានផែនការយុទ្ធសាស្ត្រអភិវឌ្ឍភូមិគំរូ ដូច្នេះទាល់តែយើងឈ្នះឆ្នោតដឹកនាំឃុំសង្កាត់សិន។ ដូច្នេះគណបក្សខ្ញុំសង្ឃឹមអាចយកឈ្នះដឹកនាំឃុំសង្កាត់ យ៉ាងតិចបាន១០ឃុំ ដើម្បីរៀបចំឃុំគំរូ ក្នុងផ្តល់សេវាសាធារណៈ ជីកប្រឡាយទឹក និងទំនប់ទឹកជូនពលរដ្ឋជាដើម…»។
ប្រធានគណបក្សអំណាចខ្មែរ លោក សួន សេរីរដ្ឋា៖«គណបក្សឥតមានចំណាយលើការឃោសនាទេ គឺបេក្ខជនឃុំ សង្កាត់ អ្នកឈរឈ្មោះ គាត់ជាអ្នកចំណាយក្នុងឃុំ សង្កាត់ ដែលគាត់ឈរឈ្មោះ ។ ហើយ គណបក្សផ្គត់ផ្គង់តែសម្ភារៈយុទ្ធនាការប៉ុណ្ណោះ។ហើយគណបក្សយើងមិនកំណត់ខ្ទង់ចំណាយទេ ព្រោះបេក្ខជនម្នាក់ៗចាក់សាំងម៉ូតូជិះខ្លួនឯង។ យើងក៏មិនមានការព្រួយបារម្ភថា ឲ្យពួកគេចំណាយថវិកាខ្លួននេះ វាអាចប៉ះពាល់ដល់អារម្មណ៍បេក្ខជនទេ ព្រោះបេក្ខជនទាំងនេះ គណបក្សមិនបានតែងតាំង ពួកគាត់ទេ គឺ ពលរដ្ឋអ្នកស្នើបេក្ខភាពរបស់ពួកគាត់ ហើយពួកគាត់ស្ម័គ្រចិត្តឈរឈ្មោះដើម្បីជួយពលរដ្ឋ។យើងមិនអាចនិយាយពីការសង្ឃឹម ឬរំពឹងទុកទេ តែយើងធ្វើដើម្បីយកលទ្ធផល»។
ប្រធានគណបក្សខ្មែររួបរួមជាតិ លោក ញឹក ប៊ុនឆៃ៖«យើងបានត្រៀមថវិកា៦សែនដុល្លារសម្រាប់ការចំណាយ ទិញសម្ផារឃោសនា និងការចំណាយផ្សេងៗ និងសម្រាប់ការហ្វឹកហ្វឺន អ្នកឃោសនាជាដើម។ ថវិកាទាំងនេះ បានមកពីថ្នាក់ដឹកនាំថ្នាក់ជាតិ និងថ្នាក់មូលដ្ឋាន តាមលទ្ធភាពគឺតាមការស្ម័គ្រចិត្ត អត់មានជំនួយពីបរទេសនោះទេ។ ហើយជាគោលការណ៍ឃុំ សង្កាត់ដែលយើងឈរឈ្មោះ យើងសង្ឃឹមថានឹងអាចទទួលបានអសនៈ២០០ទៅ៣០០ ឃុំ សង្កាត់ ក្នុងចំណោមបេក្ខជនឈរឈ្មោះ៧១៣ឃុំនោះដែរ។ ហើយខេត្តដែលយើងសង្ឃឹមទទួលបានគឺខេត្តកំពង់ស្ពឺ ព្រះសីហនុ សៀមរាម បន្ទាយមានជ័យ…ជាដើម ព្រោះសុទ្ធតែជាខេត្តមានអតីតអ្នកតស៊ូជាមួយយើងចូលរួម»។
ចំណែកគណបក្សសង្គ្រោះជាតិ គ្រោងចំណាយថវិការហូតដល់ទៅ ៣លានដុល្លារឯណោះ នៅក្នុងការឃោសនាបោះឆ្នោតថ្នាក់ឃុំ សង្កាត់ នាពេលខាងមុខនេះ ខណៈដែលគណបក្សប្រជាជនកម្ពុជា អះអាងថា មិនមានកញ្ចប់ថវិកា ដើម្បីចំណាយក្នុងយុទ្ធនាការឃោសនាបោះឆ្នោត ថ្នាក់ឃុំ សង្កាត់ នោះទេ។
ដោយឡែកគណបក្សសំបុកឃ្មុំសង្គមប្រជាធិបតេយ្យ ,គណបក្សសម្ព័ន្ធដើម្បីប្រជាធិបតេយ្យ ,គណបក្សហ្វ៊ុនស៊ិនប៉ិច និងគណបក្សសញ្ជាតិកម្ពុជា សារព័ត៌មានថ្មីៗមិនអាចសុំការលម្អិតជុំវិញការត្រៀមខ្លួនសម្រាប់យុទ្ធនាការបោះឆ្នោតនេះបានទេ។
យោងតាមរបាយការណ៍បណ្តោះអាសន្នពីគណៈកម្មការរាជធានី ខេត្តរៀបចំការបោះឆ្នោត គណបក្សប្រជាជនកម្ពុជា និងគណបក្សសង្គ្រោះជាតិ បានសុំចុះបញ្ជីនៅឃុំ សង្កាត់ទាំង១៦៤៦ នៅក្នុងប្រទេសកម្ពុជា។ គណបក្សហ្វ៊ុនស៊ិនប៉ិច ឈរឈ្មោះ៨០៤ឃុំ-សង្កាត់ គណបក្សសម្ព័ន្ធដើម្បីប្រជាធិបតេយ្យ ៧៨៧ឃុំ-សង្កាត់ គណបក្សខ្មែររួបរួមជាតិ ៧១៣ ឃុំ-សង្កាត់ គណបក្សសំបុកឃ្មុំសង្គមប្រជាធិបតេយ្យ ២២៣ឃុំ-សង្កាត់។
គណបក្សផ្សេងទៀតរួមមាន គណបក្សសញ្ជាតិកម្ពុជា ៥៣ឃុំ-សង្កាត់ គណបក្សអំណាចខ្មែរ ២៩ឃុំ-សង្កាត់ គណបក្សប្រជាធិបតេយ្យមូលដ្ឋាន២៧ ឃុំ-សង្កាត់ គណបក្សយុវជនកម្ពុជា ១៩ឃុំ-សង្កាត់ គណបក្សជនជាតិដើមប្រជាធិបតេយ្យកម្ពុជា ១៨ឃុំ-សង្កាត់ និងគណបក្សសាធារណរដ្ឋប្រជាធិបតេយ្យ ១៦ឃុំ-សង្កាត់៕
© រក្សាសិទ្ធិដោយ thmeythmey.com