កីឡាជាតិ
ជាតិ
AFF U15 Girls៖ កម្ពុជា ត្រៀមជួបថៃនៅវគ្គ១/២នាថ្ងៃទី១៨ ខែឧសភា ខ្សែបម្រើថៃ Pattaranan Aupachai និងខ្សែប្រយុទ្ធកម្ពុជាលឹម សុខជា។ រូបថត FFC និង Lao Football
× ក្រុមកីឡាការិនីបាល់ទាត់ជម្រើសជាតិកម្ពុជាអាយុក្រោម១៥ឆ្នាំ នឹងត្រូវប្រកួតតទល់ជាមួយក្រុមកីឡាការិនីថៃនៅវគ្គពាក់កណ្តាលផ្តាច់ព្រ័ត្រនៃពានរង្វាន់ AFF U16 Girls Championship នៅទីក្រុងវៀងចន្ទន៍ប្រទេសឡាវ នាថ្ងៃទី១៨ ខែឧសភា ឆ្នាំ២០១៧ ខាងមុខនេះ។
ក្រុមកីឡាការិនី U15 កម្ពុជា ដែលស្ថិតក្រោមការដឹកនាំបង្វឹករបស់លោក មាស សំអឿន ទទួលចំណាត់ថ្នាក់លេខ២ពូល B ក្រោយឈ្នះសិង្ហបុរី ២-១ ចាញ់ហ្វីលីពីន ៣-០ និងស្មើឥណ្ឌូណេស៊ី ១-១ ។ រីឯក្រុមថៃទើបបញ្ចប់ការប្រកួតចុងក្រោយរបស់ខ្លួននៅក្នុងពូល A ដោយឈ្នះទាំង៤ប្រកួតក្នុងលទ្ធផលជាបន្តបន្ទាប់លើ វៀតណាម ១-០ មីយ៉ាន់ម៉ា ១-០ ម៉ាឡេស៊ី ៧-០ និងម្ចាស់ផ្ទះឡាវ ៣-០ កាលពីថ្ងៃអាទិត្យ។
ខណៈកម្ពុជា ក្រុមលេខពីរ ពូល B ត្រូវប៉ះថៃក្រុមលេខ១ពូល A សម្រាប់ការប្រកួតវគ្គពាក់កណ្តាលផ្តាច់ព្រ័ត្រនាថ្ងៃទី១៨ ខែឧសភា នៅកីឡដ្ឋាន KM16 នោះ ហ្វីលីពីន ក្រុមលេខមួយពូល B កំពុងរង់ចាំអ៊ុតមើលគូប្រជែងរបស់ខ្លួនមកពីពូល A ។
ពូល A នៅសល់ការប្រកួត២គូទៀតនាថ្ងៃទី១៦ ខែឧសភា ដោយមីយ៉ាន់ម៉ាដែលមានភាគរយខ្ពស់ក្នុងការកាន់កាប់តំណែងលេខ២ក្នុងពូល ជាមួយនឹង៦ពិន្ទុក្នុងដៃ ត្រូវតទល់ជាមួយម៉ាឡេស៊ី ដែលជាក្រុមហាលអាវ។ ជំនួបបន្ទាប់គឺជាការប៉ះគ្នារវាងវៀតណាម និងម្ចាស់ផ្ទះឡាវ ដែលទើបតែមាន៣ពិន្ទុដូចគ្នា៕
© រក្សាសិទ្ធិដោយ thmeythmey.com