ភ្នំពេញ៖ អង្គការជនពិការអន្តរជាតិ បានផ្ដល់ជំនួយថវិកា ៦ម៉ឺនដុល្លារ ដល់ប្រធានក្រុមប្រឹក្សាឃុំ-សង្កាត់ ចំនួន១៦ ដើម្បីធានានូវការផ្ដល់សេវាបរិយាប័ន្នមុខរបរដល់ពលរដ្ឋងាយរងគ្រោះ និងជនពិការ។
គម្រោងផ្ដល់សេវាមុខរបរដល់ពលរដ្ឋងាយរងគ្រោះនេះ នឹងអនុវត្តចាប់ពីខែមិថុនា ឆ្នាំ២០១៧នេះ ក្រោមកិច្ចព្រមព្រៀងភាពជាដៃគូរវាងអង្គការជនពិការអន្តរជាតិ និងប្រធានក្រុមប្រឹក្សាឃុំសង្កាត់ចំនួន១៦ ក្រុមការងារគ្រប់គ្រងមូលនិធិសេវាបរិយាប័ន្នក្នុងស្រុកចំនួនបួន នៃខេត្តកំពង់ចាម និង ខេត្តត្បូងឃ្មុំ ។ នេះបើតាមសេចក្ដីថ្លែងការណ៍រួមរបស់សហភាពអឺរ៉ុប និងអង្គការជនពិការអន្តរជាតិ។
បើតាមសេចក្ដីថ្លែងការណ៍រួមដដែល យន្តការនៃការផ្តល់ជំនួយនេះ គឺជាផ្នែកមួយនៃគម្រោងរយៈពេលបីឆ្នាំរបស់សហភាពអឺរុប ដើម្បីលើកកម្ពស់កិច្ចសហប្រតិបត្តិការរវាងសង្គមស៊ីវិល និងអាជ្ញាធរមូលដ្ឋាន ក្នុងការផ្តល់សេវាបរិយាប័ន្នទៅដល់ប្រជាពលរដ្ឋងាយរងគ្រោះ ដែលអនុវត្តដោយអង្គការជនពិការអន្តរជាតិ ។ គម្រោងរយៈពេលបីឆ្នាំរបស់សហភាពអឺរុប ក្រោមមូលនិធិសរុបជាង ៧៤៦,០០០ អឺរូ (ជិត៨៤ម៉ឺនដុល្លារ)។ គម្រោងនេះអនុវត្តយុទ្ឋសាស្ត្រអភិបាលកិច្ចល្អនិងគណនេយ្យភាពសង្គម ផ្អែកទៅលើយន្តការ «ផអ៣» ដំណាក់កាលទី២ ( ២០១៥-២១០៧) របស់រាជរដ្ឋាភិបាលកម្ពុជា។
អង្គការជនពិការអន្តរជាតិ និងអង្គការជនពិការកម្ពុជា បានគាំទ្រការផ្តល់សេវាកម្មផែ្នកមុខរបរចំនួន៦ ក្នុងការសម្របសម្រួលសេវាឲ្យសមស្របទៅនឹងតម្រូវការជនពិការ។ អង្គការផ្តល់សេវាកម្មផែ្នកមុខរបរទាំងនេះ នឹងតម្រូវឲ្យដេញថ្លៃលើទៅឃុំទាំង១៦ខាងលើ ដើម្បីទទួលយកថវិកាក្នុងការផ្តល់សេវាប្រកបដោយបរិយាប័ន្ន។
ឃុំទាំង១៦ ដែលត្រូវទទួលបានសេវាផ្នែកបរិយាប័ន្ននេះ រួមមាន ឃុំស្រឡប់ ,ជប់ ,ជីរ៉ូ២ ,ទន្លេបិទ ,បុសខ្នុរ ,ស្វាយទៀប ,ស្ពឺ ,តាប្រុក ,មៀន ,បឹងណាយ ,សូសែន ,ល្វា ,ព្រៃឈរ ,សូទិព្វ ,ស្តើងជ័យ និងឃុំសំពងជ័យ៕