Ronaldo ជួយ Real និងខ្លួនឯងដើម្បីបង្កើតកំណត់ត្រាថ្មី ក្រោយឈ្នះពាន UCL លើកទី១២

កីឡាអន្តរជាតិ

អន្តរជាតិ

Ronaldo ជួយ Real និងខ្លួនឯងដើម្បីបង្កើតកំណត់ត្រាថ្មី ក្រោយឈ្នះពាន UCL លើកទី១២

04, Jun 2017 , 3:58 pm

រូបភាព

ដោយ: ទេព ពិទូរ្យ

ម្ចាស់ជើងឯកចាស់ Real Madrid អាចការពារតំណែងរបស់ខ្លួនបានក្រោយផ្ដួល Juventus ៤-១ ក្នុងការប្រកួតវគ្គផ្តាច់ព្រ័ត្រ UEFA Champions League នៅរាត្រីថ្ងៃទី០៣ ខែមិថុនា នាកីឡដ្ឋាន Millennium Stadium ក្រុង Cardiff ប្រទេសវេលស៍។ ២គ្រាប់របស់ Cristiano Ronaldo ក្នុងការរួមចំណែកជួយក្រុមអធិរាជសរ ឈ្នះជើងឯកពានលំដាប់កំពូលអឺរ៉ុបជាលើកទី១២ បានបង្កើតកំណត់ត្រាជាច្រើនសម្រាប់ក្លិប និងរូបគេថែមទៀតផង។

ក្រោយរកបាន២គ្រាប់ ខ្សែប្រយុទ្ធអន្តរជាតិព័រទុយហ្គាល់ វ័យ៣២ឆ្នាំ បានក្លាយជាកីឡាករដំបូងគេដែលទាត់បញ្ចូលទីនៅវគ្គផ្ដាច់ព្រ័ត្រ Champions League នេះដល់ទៅ៣លើក។ កាលពីឆ្នាំ២០០៨ CR7 ធ្លាប់ស៊ុតបានមួយគ្រាប់ជួយក្រុម Manchester United ឈ្នះ Champions League ខណៈលើកទី២ នៅពេល Real Madrid ឈ្នះពាននេះជាលើកទី១០ នៅក្នុងឆ្នាំ២០១៤។

Real Madrid ជាក្រុមដំបូងគេបំផុតដែលអាចការពារតំណែងជើងឯកបានក្នុងប្រវត្តិសាស្ត្រ និងឈ្នះជើងឯកពានកំពូលអឺរ៉ុបនេះច្រើនជាងគេរហូតដល់ទៅ១២ដង។

ជាមួយគ្នានេះ Ronaldo ក៏អាចរកបានគ្រាប់ទី១០៥ នៅគ្រប់ការប្រកួតក្នុងក្របខណ្ឌ UCL រួមទាំងអាចនាំមុខគេក្នុងនាមជាអ្នកស៊ុតបញ្ចូលទីច្រើនដាច់គេក្នុងមួយរដូវកាលទៀតផងពោលគឺរកបាន១២គ្រាប់ លើសដៃគូប្រជែង Lionel Messi រកបាន១១គ្រាប់។ លើសពីនេះទៅទៀតនោះ ២គ្រាប់យប់មិញក៏ធ្វើឲ្យរូបគេក្លាយជាកីឡាករដែលទាត់ចូលទីច្រើនជាងគេដល់ទៅ៦០០គ្រាប់ ពីគ្រប់កម្មវិធីទាំងអស់ផងដែរ៕