ជាតិ
នយោបាយជាតិ
លោក ដា ឈាន ពីមេឃុំតែម្នាក់របស់ហ្វ៊ុនស៊ិនប៉ិច បន្តជាប់ជាមេឃុំតែម្នាក់របស់ខ្មែររួបរួមជាតិ លោក ដា ឈាន និងលោក ញឹក ប៊ុនឆៃ។ រូបថត ហ្វេសប៊ុក
× កាលពីឆ្នាំ២០១២ លោក ដា ឈាន បានជាប់ឆ្នោតជាមេឃុំថ្មពួក ស្រុកថ្មពួក ខេត្តបន្ទាយមានជ័យ ដែលជាកៅអីមេឃុំតែមួយគត់ដែលគណបក្សហ្វ៊ុនស៊ិនប៉ិចទទួលបាន។ យោងតាមលទ្ធផលបណ្តោះអាសន្ននាការបោះឆ្នោតជ្រើសរើសក្រុមប្រឹក្សាឃុំសង្កាត់អណត្តិទី៤ កាលពីថ្ងៃអាទិត្យ ទី៤ ខែមិថុនា បុរសវ័យ៤៧ឆ្នាំដែលស្មោះស្ម័គ្រនឹងលោក ញឹក ប៊ុនឆៃ រូបនេះ អាចមានលទ្ធផលបន្តអណត្តិរបស់ខ្លួន ក្នុងនាមបេក្ខជនគណបក្សខ្មែររួបរួមជាតិ។
លទ្ធផលក្រៅផ្លូវការនាអំឡុងការបោះឆ្នោតក្រុមប្រឹក្សាឃុំសង្កាត់អណត្តិទី៤ កាលពីថ្ងៃអាទិត្យ បានបង្ហាញថា គណបក្សខ្មែររួបរួមជាតិ របស់លោក ញឹក ប៊ុនឆៃ បានឈ្នះកៅអីមេឃុំ១នៅឃុំថ្មពួក ស្រុកថ្មពួក ខេត្តបន្ទាយមានជ័យ និងជាជោគជ័យតែមួយគត់ដែលគណបក្សផ្សេងទទួលបាន ក្រៅពីគណបក្សប្រជាជនកម្ពុជា និងគណបក្សសង្គ្រោះជាតិ។
ឃុំថ្មពួក ស្រុកថ្មពួក ខេត្តបន្ទាយមានជ័យ បានក្លាយមូលដ្ឋានដ៏រឹងមាំរបស់លោក ញឹក ប៊ុនឆៃ អតីតថ្នាក់ដឹកនាំគណបក្សហ្វ៊ុនស៊ិនប៉ិច ដែលចាកចេញទៅបង្កើតគណបក្សខ្មែររួបរួមជាតិ។ ថ្មពួក គឺស្រុកកំណើតផ្ទាល់របស់លោក ញឹក ប៊ុនឆៃ តែលោកកើតនៅឃុំស្វាយចេក។
កាលពីឆ្នាំ២០១២ គណបក្សហ្វ៊ុនស៊ិនប៉ិច ដែលមានលោក ញឹក ប៊ុនឆៃ ជាថ្នាក់ដឹកនាំកំពូលម្នាក់ បានឈ្នះកៅអីមេឃុំតែមួយគត់គឺនៅក្នុងឃុំថ្មពួក ស្រុកថ្មពួក ខេត្តបន្ទាយមានជ័យ។ ក្នុងចំណោមអាសនៈចំនួន៧ បក្សហ្វ៊ុនស៊ិនប៉ិច កាន់តំណែងមេឃុំ (លោក ដា ឈាន) ជំទប់ទី១ និងសមាជិកក្រុមប្រឹក្សា២នាក់ទៀត រីឯគណបក្សប្រជាជនកម្ពុជា កាន់តំណែងជំទប់ទី២ និងសមាជិកក្រុមប្រឹក្សា២នាក់។
សម្រាប់ការប្រកួតប្រជែងការបោះឆ្នោតឃុំសង្កាត់ឆ្នាំ២០១៧នេះ លោក ដា ឈាន បានដើរតាមលោក ញឹក ប៊ុនឆៃ ហើយបន្តប្រជែងយកកៅអីមេឃុំថ្មពួកដដែល។ យោងតាមក្រៅផ្លូវការ ក្នុងចំណោមសន្លឹកឆ្នោតសរុបបានការចំនួន៤៣១៤សន្លឹក គណបក្សខ្មែររួបរួមជាតិ ទទួលបាន២២៦១សំឡេង គណបក្សប្រជាជនកម្ពុជា ទទួលបាន១១៦៩សំឡេង គណបក្សសង្គ្រោះជាតិ ទទួលបាន៦៩៧សំឡេង គណបក្សហ្វ៊ុនស៊ិនប៉ិចទទួលបាន១០៩សំឡេង និងគណបក្សសម្ព័ន្ធដើម្បីប្រជាធិបតេយ្យទទួលបាន៧៨សំឡេង។
សូមបញ្ជាក់ផងដែរ ក្រៅពីលោក ដា ឈាន ដែលបន្តប្រជែងតំណែងជាមេឃុំ សមាសភាពផ្សេងទៀតដែលបានជាប់ក្នុងកូតាហ្វ៊ុនប៉ិចកាលពី៥ឆ្នាំមុន មានលោក ចុង ជួយ (ជំទប់ទី១) លោក ទឹម ញ៉ាន និងលោក ហែម ប៊ុនថាប់ ដែលជាសមាជិកក្រុមប្រឹក្សាអណត្តិចាស់ ក៏បានឈរនៅលេខរៀងជាបន្តបន្ទាប់ក្នុងកូតាគណបក្សខ្មែររួបរួមជាតិផងដែរ។
បន្ទាប់ពីបានឃើញលទ្ធផលបណ្តោះអាសន្ន លោក ដា ឈាន បានសរសេរនៅលើហ្វេសប៊ុករបស់ខ្លួនថា៖ «ខ្ញុំបាទសូមថ្លែងអំណរគុណយ៉ាងជ្រាលជ្រៅបំផុតដល់បងប្អូន ប្រជាពលរដ្ឋ ឃុំថ្មពួក ដែលបានគាំទ្ររូបខ្ញុំបាទ។ សូម អរគុណ»៕
Tag:
បោះឆ្នោតឃុំ-សង្កាត់
មេឃុំចៅសង្កាត់)
© រក្សាសិទ្ធិដោយ thmeythmey.com