លោក ជា សុផារ៉ា ស្នើលោក ចម ប្រសិទ្ធ ជួយសម្រួលដកប្រាក់កក់ថ្លៃទឹកស្អាត ជូនពលរដ្ឋប៊ូឌីងវិញ

ជាតិ

សង្គមជាតិ

លោក ជា សុផារ៉ា ស្នើលោក ចម ប្រសិទ្ធ ជួយសម្រួលដកប្រាក់កក់ថ្លៃទឹកស្អាត ជូនពលរដ្ឋប៊ូឌីងវិញ

06, Jun 2017 , 2:59 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង លោក ជា សុផារ៉ា បានស្នើទៅរដ្ឋមន្ត្រីក្រសួងឧស្សាហកម្ម និងសិប្បកម្ម ឲ្យជួយសម្រួលដកប្រាក់ធានា ក្នុងការតភ្ជាប់បណ្ដាញទឹកស្អាតជាលើកដំបូង ជូនពលរដ្ឋអគារប៊ូឌីង «ស» វិញ។

លិខិតលោក ជា សុផារ៉ា ផ្ញើជូនលោក ចម ប្រសិទ្ធ កាលពីថ្ងៃទី៥ មិថុនា បានសរសេរដូច្នេះថា៖«ខ្ញុំសូមស្នើសុំ ឯកឧត្តមទេសរដ្ឋមន្ត្រី ជួយសម្រួលការដកប្រាក់កក់ធានាក្នុងការតភ្ជាប់បណ្ដាញទឹកស្អាតលើកដំបូង ជូនពលរដ្ឋដែលរស់នៅអគារប៊ូឌីង «ស» ដែលបានស្ម័គ្រចិត្តលក់បន្ទប់ស្នាក់នៅរបស់ខ្លួនជូនក្រុមហ៊ុន ARAKAWA ដើម្បីការអភិវឌ្ឍទីតាំងនេះឡើងវិញ»។

បន្ថែមពីលើនេះ លោក ជា សុផារ៉ា ក៏ស្នើឲ្យអាជ្ញាធរពាក់ព័ន្ធ ដកប្រាក់កក់ភ្លើងជូនពលរដ្ឋ ដែលយល់ព្រមទទួលសំណង ជាថ្នូរនឹងការចាកចេញពីអគារប៊ូឌីង នេះដែរ។ នេះបើតាមហ្វេសប៊ុកលោក ជា សុផារ៉ា។

នៅថ្ងៃទី៦ មិថុនានេះ មានពលរដ្ឋរស់នៅអគារប៊ូឌីង ២០០បន្ទប់ បាននាំគ្នារើចេញជាបណ្ដើរហើយ ក្រោយពីពួកគេបានយល់ព្រមទទួលសំណង ពីក្រុមហ៊ុនជប៉ុន ARAKAWA ក្រោមកិច្ចសម្របសម្រួលពីក្រសួងរៀបចំដែនដី នគរូបនីយកម្ម និងសំណង់។ ពលរដ្ឋម្នាក់ ដែលបានផ្ដល់កិច្ចសម្ភាសដល់សារព័ត៌មានថ្មីៗ នៅលើអគារប៊ូឌីងផ្ទាល់នោះ បានឲ្យដឹងថា តាមរយៈសំណងដែលគ្រួសារគាត់បានពីការលក់បន្ទប់នេះ មានចំនួនជាង៤ម៉ឺនដុល្លារ នៃការវាយតម្លៃរបស់ក្រុមហ៊ុនជប៉ុន។ ចំណែកពលរដ្ឋផ្សេងទៀតនឹងទទួលបានសំណងតាមទំហំបន្ទប់របស់ពួកគេដែរ។

ពលរដ្ឋនៅអាគារប៊ូឌីញ នឹងត្រូវរើចេញពីលំនៅស្ថានចាប់ពីថ្ងៃទី០៦ ខែមិថុនា ដល់ថ្ងៃទី៦ ខែកក្កដាខាងមុខ។ នេះបើតាមរដ្ឋមន្ត្រីក្រសួងរៀបចំដែនដី លោក ជា សុផារ៉ា ដែលបានសន្យាជួយថវិកា ១០០ដុល្លារ ក្នុងមួយគ្រួសារបន្ថែមទៀត សម្រាប់ការដឹកជញ្ជូនរបស់ពលរដ្ឋ ព្រមទាំងមិនឲ្យពលរដ្ឋឲ្យបង់ប្រាក់លើថ្លៃរដ្ឋបាល និងបង់ពន្ធដារ ចំពោះប្រាក់ដែលបានមកពីថ្លៃលក់ផ្ទះនៅអាគារប៊ូឌីញនេះឡើយ។

កន្លងមកអ្នកនាំពាក្យក្រសួងដែនដី លោក សេង ឡូត បានប្រាប់អ្នកសារព័ត៌មានក្រោយពីបញ្ចប់កិច្ចប្រជុំថា តួលេខនៃចំនួនពលរដ្ឋព្រមទទួលយកសំណង់ពីក្រុមហ៊ុនជប៉ុន អារ៉ាការវ៉ា នេះមានចំនួន៤៦៤ គ្រួសារ ដែលស្មើ ៩៤,៣០ភាគរយ នៃចំនួនសរុប៤៩២គ្រួសារ។

សូមបញ្ជាក់ថា អគារប៊ូឌីញដែលមានវ័យចំណាស់ និងមានសភាពទ្រុឌទ្រោមនៅកណ្តាលរាជធានីភ្នំពេញ ត្រូវបានក្រុមហ៊ុនជប៉ុនមួយឈ្មោះ អារ៉ាកាវ៉ា ទិញពីពលរដ្ឋក្នុងតម្លៃ១៤០០ដុល្លារអាមេរិក ក្នុងមួយម៉ែត្រការ៉េ។ ទីតាំងអគារប៊ូឌីញនេះ នឹងត្រូវសង់ជាអគារពាណិជ្ជកម្មកម្ពស់៣០ជាន់ ដែលគ្រោងចំណាយទឹកប្រាក់ចន្លោះពី៧០លាន ទៅ៨០លានដុល្លារអាមេរិក៕