កីឡាអន្តរជាតិ
អន្តរជាតិ
Turan បញ្ចប់អាជីពពីក្រុមជម្រើសជាតិ ក្រោយវាយអ្នកកាសែតលើយន្តហោះ
× Arda Turan បានប្រកាសចូលនិវត្តន៍ពីក្រុមបាល់ទាត់ជម្រើសជាតិតួកគី បន្ទាប់ពីរូបគេបានវាយគ្នាជាមួយអ្នកកាសែតម្នាក់នៅលើយន្តហោះ នៅពេលធ្វើដំណើរត្រឡប់មកពីប្រកួតមិត្តភាពនៅប្រទេសម៉ាសេដ្វានវិញ។
ប្រធានក្រុមជម្រើសជាតិតួកគេ វ័យ៣០រូបនេះ បានវាយអ្នកកាសែតកីឡារបស់ Milliyet ម្នាក់ឈ្មោះ Bilal Mese នៅលើយន្តហោះ អំឡុងពេលធ្វើដំណើរពីប្រទេសម៉ាសេដ្វាន ត្រឡប់មកតួកគីវិញកាលពីថ្ងៃចន្ទដើមសប្តាហិ៍នេះ។ មូលហេតុដែលនាំឲ្យមានជម្លោះនេះកើតឡើង ដោយសារអ្នកសារព័ត៌មាននោះ ធ្លាប់សរសេររិះគន់ និងជេរមាក់ងាយក្រុមគ្រួសាររបស់គេកាលពីការប្រកួតក្នុងព្រឹត្តិកាណ៍ Euro ឆ្នាំ២០១៦ នៅបារាំងកន្លងមក។
អ្នកកាសែតកីឡាលោក Bilal Mese ដែលត្រូវ Arda Turan វាយនៅលើយន្តហោះ
បើតាម TheGuardian ក្រោយហេតុការណ៍នេះ ខ្សែបម្រើក្រុម Barcelona ក៏បានសារភាពថាពិតជាបានធ្វើទង្វើមិនត្រឹមត្រូវទៅលើអ្នកកាសែតនោះមែន ប៉ុន្តែរូបគេមិនស្តាយក្រោយនូវអ្វីដែលបានប្រព្រឹត្តិនោះឡើយ និងថែមទាំងសប្បាយចិត្តទៀតផង ព្រោះ Bilal Mese ធ្លាប់រិះគន់គេខ្លាំងៗពេក។
អតីតសមាជិកក្រុម Atletico Madrid រូបនេះ បានដើរចេញពីជំរុំហ្វឹកហាត់ក្នុងប្រទេសស្លូវេនី កាលពីថ្ងៃអង្គារទី៦ មិថុនានេះ ហើយក៏បានប្រកាសចាកចេញពីក្រុមជម្រើសជាតិនៅប៉ុន្មានម៉ោងក្រោយមកតែម្តង។
ជុំវិញបញ្ហានេះដែរសមាគមកីឡាអ្នកកាសែតតួកគីក៏បានចេញសេចក្តីថ្លែងការណ៍មួយដែរ ដោយថ្កោលទោសយ៉ាងខ្លាំងក្លាពីការវាយប្រហារទៅលើអ្នកសារព័ត៌មាននេះ៕
Tag:
បាល់ទាត់
Arda Turan
តួកគី
Bilal Mese
វាយអ្នកកាសែត
© រក្សាសិទ្ធិដោយ thmeythmey.com