ជាតិ
នយោបាយជាតិ
ព្រះមហាក្សត្រ បញ្ចប់មុខតំណែងលោក ញឹក ប៊ុនឆៃ ពីទីប្រឹក្សារដ្ឋាភិបាល
× ភ្នំពេញ៖ ព្រះមហាក្សត្រ បានបញ្ចប់មុខតំណែងលោក ញឹក ប៊ុនឆៃ ពីទីប្រឹក្សារាជរដ្ឋាភិបាល ដែលមានឋានៈស្មើឧបនាយករដ្ឋមន្ត្រី តាមសំណើរបស់សម្ដេចនាយករដ្ឋមន្ត្រី ហ៊ុន សែន ។ នេះបើតាមព្រះរាជក្រឹត្យចុះថ្ងៃទី៥ មិថុនា។
កាលពីអាណត្តិទី៤ លោក ញឹក ប៊ុនឆៃ មានតំណែងជាឧបនាយករដ្ឋមន្ត្រី ។ ហើយនៅក្នុងអាណត្តិទី៥នេះ លោកទទួលតំណែងជាទីប្រឹក្សារដ្ឋាភិបាល ដែលមានឋានៈស្មើឧបនាយករដ្ឋមន្ត្រី។ នេះបើតាមអ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន ដែលបានបន្ថែមថា ក្រោយពីបញ្ចប់មុខតំណែងនេះ លោក ញឹក ប៊ុនឆៃ នឹងមិនមានតួនាទីអ្វីក្នុងជួររដ្ឋាភិបាលទៀតនោះឡើយ។
គួរបញ្ចាក់ថា បច្ចុប្បន្នលោក ញឹក ប៊ុនឆៃ គឺជាប្រធានគណបក្សខ្មែររួបរួមជាតិ ក្រោយពីបែកគ្នាម្ដងទៀតពីគណបក្សហ្វ៊ុនស៊ិនប៉ិច កាលពីឆ្នាំ២០១៦។ ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ នេះ គណបក្សខ្មែររួបរួមជាតិរបស់លោក ញឹក ប៊ុនឆៃ ក៏ទទួលបានកៅអីមេឃុំ ក្នុងស្រុកថ្មពួក ខេត្តបន្ទាយមានជ័យ មួយផងដែរ ។ ក្រៅពីនេះក៏មានអាសនៈក្រុមប្រឹក្សាផ្សេងទៀត ដែលគណបក្សនេះ អាចទទួលបានទៀតផង ក្នុងចំណោមឃុំ-សង្កាត់ ទាំង៧១៣ ដែលមានបេក្ខជនឈរឈ្មោះបោះឆ្នោត ។ នេះបើតាមលទ្ធផលបឋមរបស់គណបក្សខ្មែររួបរួមជាតិ។
Tag:
ញឹក ប៊ុនឆៃ
ព្រះមហាក្សត្រ
ទីប្រឹក្សារដ្ឋាភិបាល
© រក្សាសិទ្ធិដោយ thmeythmey.com