កីឡាជាតិ
ជាតិ
កម្ពុជាបង្ហាញឈ្មោះកីឡាទាំង២៣ដើម្បីប្រជែងក្នុងព្រឹត្តិការណ៍កីឡាស៊ីហ្គេមនៅម៉ាឡេស៊ី
× ក្រសួងអប់រំ យុវជន និងកីឡា រួមជាមួយគណៈកម្មាធិការជាតិអូឡាំពិកកម្ពុជា(NOCC)បានសម្រេចបញ្ជូនកីឡាចំនួន២៣ប្រភេទ ដើម្បីចូលរួមប្រកួតកីឡាស៊ីហ្គេមលើកទី២៩នៅប្រទេសម៉ាឡេស៊ីនាខែសីហា ខាងមុខ។ ម្ចាស់ផ្ទះម៉ាឡេស៊ីបានកំណត់ដាក់កីឡាចំនួន៣៨ប្រភេទឲ្យចូលរួមប្រកួតប្រជែង។
ក្រសួងអប់រំ យុវជន និងកីឡាកាលពីពេលថ្មៗបានបង្ហាញឈ្មោះប្រភេទកីឡាសក្តានុពលទាំង២៣ប្រភេទដែលត្រូវចូលរួមប្រកួតប្រជែងជាមួយបណ្តាប្រទេស១០ផ្សេងទៀតក្នុងព្រឹត្តិការណ៍កីឡាស៊ីហ្គេមចាប់ពីថ្ងៃទី១៩ ដល់ថ្ងៃទី៣០ ខែសីហា នៅក្នុងទីក្រុងកូឡាឡាំពួរប្រទេសម៉ាឡេស៊ី។ ព្រឹត្តិការណ៍ស៊ីហ្គេមលើកទី២៩នេះ ម្ចាស់ផ្ទះម៉ាឡេស៊ីបានសម្រេចដាក់កីឡាចំនួន៣៨ប្រភេទចូលរួម ដោយបែងចែកជា៤០៥វិញ្ញាសា។
កីឡាទាំង២៣ប្រភេទនោះរួមមាន៖ តេក្វាន់ដូ WTF, ប៉េតង់, ឈិនឡូន, វាយកូនបាល់, ការ៉ាតេដូ, ប្រដាល់គុនខ្មែរ, វូស៊ូ, បាល់ទះលើក្តារ, បាល់ទាត់(U22), អត្តពលកម្ម, កាយសម្ព័ន្ធ, ហែលទឹក, បាល់បោះ, វាយកូនឃ្លីលើតុ, វាយសី, ប្រណាំងទោចក្រយាន, គុនដាវ, វាយកូនហ្គោល, ទ្រីយ៉ាត្លុង, ប្រដាល់សកល, ស្គីទឹកកក, ទូកក្តោង និងកីឡាជិះសេះ។
ប្រទេសដែលចូលរួមការប្រកួតក្របខណ្ឌអាស៊ាននេះរួមមាន៖ ម្ចាស់ផ្ទះម៉ាឡេស៊ី, កម្ពុជា, ឡាវ, ថៃ, វៀតណាម, សិង្ហបុរី, ឥណ្ឌូនេស៊ី, ព្រុយណេ, ហ្វីលីពីន, មីយ៉ាន់ម៉ា និងទីម័រខាងកើត។
គួរបញ្ជាក់ថា ការប្រកួតកីឡាស៊ីហ្គេមលើកទី២៨នៅប្រទេសសិង្ហបុរី កម្ពុជាបានបញ្ជូនកីឡា២៣ប្រភេទឲ្យចូលរួមជាលទ្ធផលកម្ពុជាដណ្តើមបានមេដាយមាស១ ប្រាក់៥ និងសំរឹទ្ធ៩ ដោយឈរលេខរៀងទី៨នៃតារាងចំណាត់ថ្នាក់ក្នុងចំណោម១១ប្រទេស៕
© រក្សាសិទ្ធិដោយ thmeythmey.com