អន្តរជាតិ
រុស្ស៊ី បាញ់មីស៊ីលអន្តរទ្វីបពីតំបន់អឺរ៉ុបខាងជើងទៅគោលដៅក្បែរជប៉ុន
× រុស្ស៊ី បានទទួលជោគជ័យក្នុងការបាញ់មីស៊ីលអន្តរទ្វីបពីនាវាមុជទឹកកំពុងឈរជើងនៅសមុទ្រ Berent នៅភាគខាងជើងអឺរ៉ុបទៅកាន់គោលដៅនៅឧបទ្វីប Kamchatka ដែលស្ថិតនៅតំបន់ចុងបូព៌ាជាប់មហាសមុទ្រប៉ាស៊ីហ្វិកឯណោះ។ ក្រសួងការពារជាតិរុស្ស៊ីប្រកាសថា ការបាញ់មីស៊ីលរយៈចម្ងាយឆ្ងាយនេះ គឺធ្វើទៅតាមផែនការសមយុទ្ធរបស់ខ្លួន ហើយមីស៊ីលនេះក៏បានបាញ់ចំគោលដៅតាមការរៀបចំផងដែរ។
នាវាមុជទឹកយុទ្ធសាស្ត្រ Yuri Dolgoruky បានបាញ់មីស៊ីលអន្តរទ្វីប Bulava ចេញពីសមុទ្រ Berent ក្បែរន័រវ៉េសនៅខាងជើងអឺរ៉ុប ឆ្ពោះទៅគោលដៅ Kura នៅឯតំបន់ Kamchatka ដែលស្ថិតនៅភាគខាងកើតបំផុតរបស់រុស្ស៊ី។ បើតាមសេចក្ដីថ្លែងការណ៍ក្រសួងការពារជាតិរុស្ស៊ី មីស៊ីលអន្តរទ្វីប Bulava ត្រូវបានបាញ់ចេញពីក្នុងទឹកតែម្ដង ហើយក៏ហោះសំដៅគោលដៅនៅឯឧបទ្វីប Kamchatka ដែលស្ថិតនៅចន្លោះមហាសមុទ្រប៉ាស៊ីហ្វិក និងសមុទ្រ Okhotsk ។
សារព័ត៌មានរុស្ស៊ី RT ផ្សាយថា បើយោងតាមលទ្ធផលបង្ហាញដោយស្ថានីយ៍គ្រប់គ្រងការបាញ់នេះ មីស៊ីលអន្តរទ្វីប Bulava មិនមានបញ្ហាពេលហោះហើរឡើយ រួចក៏បានធ្លាក់ចំគោលដៅដែលកំណត់រួចស្រេចដោយជោគជ័យតែម្ដង។ មីស៊ីលអន្តរទ្វីបនេះ ទំនងហោះបានចម្ងាយយ៉ាងហោចណាស់ក៏៤៦០០គីឡូម៉ែត្រដែរ ព្រោះវាបានហោះរំលងទឹកដីរុស្ស៊ីស្ទើរទាំងអស់ទៅហើយពីលិចទៅកើតនោះ ខណៈមីស៊ីលនេះអាចវាយប្រហារគោលដៅ៩៣០០គីឡូម៉ែតឯណោះ។
ដោយឡែក នាវាមុជទឹកយុទ្ធសាស្ត្រ Yuri Dolgoruky ដែលជានាវាបាញ់មីស៊ីល Bulava ត្រូវបានដាក់ប្រើប្រាស់ក្នុងឆ្នាំ២០០៨ និងជានាវាធុន Borey ជំនាន់ទីបួនដើរដោយថាមពលនុយក្លេអ៊ែរ។ នាវាមុជទឹកនេះត្រូវបានបញ្ចូលទៅក្នុងកងទ័ពជើងទឹករុស្ស៊ីប្រចាំតំបន់ខាងជើង។ ដោយសារតែដើរដោយថាមពលនុយក្លេអ៊ែរ នាវានេះអាចផ្ទុកមីស៊ីលអន្តរទ្វីប Bulava ចំនួន១៦ដើម។ នាវាទំនើបនេះនឹងដើរតួនាទីសំខាន់សម្រាប់ទ័ពជើងទឹករុស្ស៊ីនៅពេលអនាគតទៀតផង។
បន្ថែមពីលើនាវា Yuri Dolgoruky ទ័ពជើងទឹករុស្ស៊ី នឹងដាក់ឲ្យប្រើប្រាស់នាវាធុន Borey នេះចំនួនពីរគ្រឿងបន្ថែមទៀត ខណៈ៥គ្រឿងទៀតកំពុងស្ថិតក្នុងដំណើរការអភិវឌ្ឍ។ ក្រុងមូស្គូមានគោលដៅពង្រាយនាវាមុជទឹកធុន Borey ដើរដោយថាមពលនុយក្លេអ៊ែរឲ្យបាន៨គ្រឿងនៅត្រឹមឆ្នាំ២០២០ ដើម្បីពង្រឹងសមត្ថភាពកងទ័ពជើងទឹករបស់ខ្លួន។
ការបាញ់មីស៊ីលចេញពីតំបន់ភាគខាងជើង ក៏ជាសញ្ញាបង្ហាញពីអានុភាពរបស់កងទ័ពរុស្ស៊ីប្រចាំតំបន់មហាសមុទ្រអាក់ទិកដែរ ខណៈរុស្ស៊ីកំពុងមានជម្លោះទឹកដីនៅតំបន់នេះជាមួយប្រទេសបួនទៀត គឺកាណាដា អាមេរិក ន័រវេស និងដាណឺម៉ាក។ ក្នុងគោលដៅពង្រឹងអំណាចរបស់ខ្លួន រុស្ស៊ីក៏បានបង្កើនសមត្ថភាពកងទ័ពរបស់ខ្លួនតាមរយៈការពង្រាយសព្វាវុធទំនើបៗ ក៏ដូចជាបានបង្កើតទីបញ្ជាការរួមប្រចាំអាក់ទិក ដើម្បីងាយស្រួលចាត់ចែងការងារទៀតផង៕
Tag:
រុស្ស៊ី
អឺរ៉ុប
ជប៉ុន
© រក្សាសិទ្ធិដោយ thmeythmey.com