អង្គការអន្តរជាតិមួយសុំឲ្យទម្លាក់ការចោទប្រកាន់លើលោក នី សុខា ដែលជាប់ឃុំព្រោះរឿងស្រីមុំ

ជាតិ

អង្គការអន្តរជាតិមួយសុំឲ្យទម្លាក់ការចោទប្រកាន់លើលោក នី សុខា ដែលជាប់ឃុំព្រោះរឿងស្រីមុំ

27, Jun 2017 , 9:59 pm

រូបភាព

លោក នី សុខា មន្រ្តីអាដហុកមួយរូប ដែលជាប់ឃុំព្រោះរឿងស្រីមុំ កំពុងតែដើរចូលបន្ទប់សវនាការ កាលពីពេលកន្លងទៅ។

ដោយ: ថ្មីៗ

ភ្នំពេញ៖ អង្គការ Front Line Defenders ដែលមានទីតាំងនៅសាធារណរដ្ឋអៀរឡងើ បានស្នើឲ្យអាជ្ញាធរកម្ពុជា បញ្ចប់ការចោទប្រកាន់លើមន្ត្រីអាដហុកមួយរូប ដែលកំពុងជាប់ឃុំក្នុងពន្ធនាគារ ដោយសារតែងរឿងអាស្រូវរបស់ស្រីមុំ តាំងពីឆ្នាំ២0១៦មក។ ការស្នើរបស់អង្គការអន្តរជាតិ ដែលមានបេសកកម្មចម្បងក្នុងការការពារសិទ្ធិមនុស្សមួយនេះ គឺធ្វើឡើង បន្ទាប់ពីទទួលដំណឹងថា លោក នី សុខា ដែលជាមន្ត្រីអាដហុកមួយរូប កំពុងតែមានបញ្ហាផ្នែកសុខភាព នៅក្នុងពន្ធនាគារ។

តាមរយៈសេចក្តីថ្លែងការណ៍របស់ខ្លួន ដែលបានចេញកាលពីពេលថ្មីៗនេះ អង្គការ Front Line Defenders ដែលទទួលដំណឹងពីក្រុមគ្រួសាររបស់លោក នី សុខា បានអះអាងថា លោក នី សុខា បានដើរដួល នៅក្នុងបន្ទប់ទឹក ហើយចាប់ពីពេលនោះមក សុខភាពរបស់លោក រឹតតែមានសភាពទន់ខ្សោយ ពីមួយថ្ងៃទៅមួយថ្ងៃ។ អង្គការ Front Line Defenders បានឲ្យដឹងទៀត ថា លោក នី សុខា មើលទៅហាក់ដូចជាស្លេកស្លាំង ហើយដៃរបស់លោក តែងតែញ័រ។

អង្គការ Front Line Defenders បានអំពាវនាវទៅកាន់អាជ្ញាធរកម្ពុជាយ៉ាងដូច្នេះ៖«អង្គការ Front Line Defenders ព្រួយបារម្ភចំពោះសុខភាពរបស់លោកនី សុខា។ ហេតុដូច្នេះ អង្គការ Front Line Defenders សុំឲ្យអាជ្ញាធរកម្ពុជាទម្លាក់ចោលនូវបទចោទទាំងអស់ ដែលប្រឆាំងនឹងលោក នី សុខា និងមន្ត្រីអាដហុកទាំងបីរូបទៀត ព្រមទាំងមន្ត្រីគ.ជ.ប ផងដែរ»។

លោក សំ សុគង់ មេធាវីមួយរូប ដែលការពារក្តីឲ្យមន្ត្រីអាដហុកនិងមន្ត្រីគ.ជ.ប ក៏បានសុំឲ្យតុលាការ ពន្លឿននីតិវិធីលើសំណុំរឿងនេះ ដែរ។ លោកមេធាវីរូបនេះ ចង់ឲ្យតុលាការ ធ្វើសេចក្តីសម្រេចឲ្យបានលឿន ថាត្រូវដោះលែងកូនក្តីរបស់លោក ឬក៏បញ្ជូនទៅជំនុំជម្រះ។

យ៉ាងណាក៏ដោយ តុលាការ មិនទាន់សម្រេចនៅឡើងទេ ចំពោះការស្នើសុំរបស់លោកមេធាវីខាងលើ។ រហូតមកដល់ពេលនេះ សំណុំរឿងមន្ត្រីអាដហុកនិងមន្ត្រីគ.ជ.ប ត្រូវបានបញ្ចប់ក្នុងដំណាក់កាលនៃការស៊ើបសួរហើយ ហើយក៏បានបង្វែរទៅឲ្យព្រះរាជអាជ្ញា ដើម្បីធ្វើសេចក្តីសន្និដ្ឋានស្ថាពរ។ ជាទូទៅ សេចក្តីសន្និដ្ឋានស្ថាពររបស់ព្រះរាជអាជ្ញា តែងមានខ្លឹមសារពីរយ៉ាង គឺសុំឲ្យ ទម្លាក់ការចោទប្រកាន់លើជនត្រូវចោទ ឬក៏សុំឲ្យយកជនត្រូវចោទ ទៅជំនុំជម្រះ។

ជានីតិវិធី បន្ទាប់ពីធ្វើសេចក្តីសន្និដ្ឋានស្ថាពររួចហើយ ព្រះរាជអាជ្ញា ត្រូវបញ្ជូនសំណុំរឿងទៅ កាន់ចៅក្រមស៊ើបសួរវិញ ដើម្បីសម្រេចថា ត្រូវទម្លាក់ការចោទប្រកាន់លើជនត្រូវចោទ ឬក៏យកជនត្រូវចោទ ទៅជំនុំជម្រះ។

សូមបញ្ជាក់ថា រហូតមកដល់ពេលនេះ មន្ត្រីអាដហុកបួនរូប ដែលរួមមាន លោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុន្នី ព្រមទាំងលោក នី ចរិយា អគ្គលេខាធិការរងគ.ជ.ប បានជាប់ឃុំជាងមួយឆ្នាំហើយ។ មន្ត្រីអាដហុក ត្រូវបានចោទពីបទ «សូកប៉ាន់សាក្សី» ហើយមន្ត្រីគ.ជ.ប ត្រូវបានចោទពីបទ «សមគំនិតក្នុងអំពើសូកប៉ាន់សាក្សី»។ តុលាការ រកឃើញថា អ្នកទាំងប្រាំ បានជាប់ពាក់ព័ន្ធនឹងរឿងអាស្រូវរបស់ស្រីមុំ និងឯកឧត្តម កឹម សុខា ប្រធានគណបក្សប្រឆាំង៕