ជាតិ
ពីកាណាដា ប្រធានអាដហុក អំពាវនាវឲ្យតុលាការបន្តផ្ដល់យុត្តិធម៌ដល់មន្ត្រី និងអតីតមន្ត្រីខ្លួន
× ភ្នំពេញ៖ ប្រធានសមាគមការពារសិទ្ធិមនុស្សអាដហុក អំពាវនាវឲ្យតុលាការទម្លាក់បទចោទប្រកាន់លើមន្ត្រីអាដហុក និងគណៈកម្មាធិការរៀបចំការបោះឆ្នោត (គ.ជ.ប) ទាំងស្រុង ដើម្បីឲ្យពួកគេអាចបំពេញការងារឲ្យបានពេញលេញ។ តុលាការសម្រេចដោះលែងមន្ត្រីទាំង៥រូបនេះ ឲ្យនៅក្រៅឃុំបណ្ដោះអាសន្ន ដោយស្ថិតនៅក្រោមការតាមដានរបស់តុលាការ កាលពីថ្ងៃទី២៩ មិថុនា។
លោក ធន់ សារ៉ាយ ដែលកំពុងស្នាក់នៅប្រទេសកាណាដា យល់ឃើញថា ការដោះលែងឲ្យមន្ត្រីខ្លួន នៅក្រៅឃុំបណ្ដោះអាសន្ននេះ វាមិនទាន់មានលក្ខណៈគ្រប់គ្រាន់ ដែលអាចធានាសុវត្ថិភាពពួកគេ ក្នុងការអនុវត្តការងារដោះស្រាយបញ្ហាប្រជាពលរដ្ឋបាននៅឡើយទេ។ ថ្លែងតាមរយៈវីដេអូឃ្លីបជាង២នាទី ប្រធានអង្គការអាដហុករូបនេះ បានបញ្ជាក់ដូច្នេះថា៖ ខ្ញុំសូមអំពាវនាវឲ្យស្ថាប័នមានសមត្ថកិច្ច ជាពិសេសតុលាការឲ្យមានការសម្រេចទម្លាក់រាល់ការចោទប្រកាន់នានាទៅលើពួកគាត់ ដើម្បីឲ្យពួកគាត់អាចមានសេរីភាពពេញលេញ ប្រាសចាកពីការចោទប្រកាន់នានាតទៅទៀត ដើម្បីឲ្យពួកគាត់ត្រឡប់មកក្នុងស្ថានភាពដូចដើមឡើងវិញ។ ហើយខ្ញុំសង្ឃឹមថា នឹងមានការសម្រេចនេះ នាពេលដ៏ខ្លីខាងមុខនេះ»។
តុលាការបានសម្រេចដោះលែងមន្ត្រីអាដហុកបួនរូប ដែលរួមមាន លោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុន្នី ព្រមទាំងលោក នី ចរិយា អតីតមន្ត្រីអាដហុក និងបច្ចុប្បន្នអគ្គលេខាធិការរងគ.ជ.ប កាលពីថ្ងៃទី២៩ មិថុនា ក្រោយពីពួកគេទាំង៥រូបនេះ បានជាប់ឃុំជាងមួយឆ្នាំ (៤២៧ថ្ងៃ) ។ មន្ត្រីអាដហុក ត្រូវបានចោទពីបទ «សូកប៉ាន់សាក្សី» ហើយមន្ត្រីគ.ជ.ប ត្រូវបានចោទពីបទ «សមគំនិតក្នុងអំពើសូកប៉ាន់សាក្សី»។ តុលាការ រកឃើញថា អ្នកទាំងប្រាំ បានជាប់ពាក់ព័ន្ធនឹងរឿងអាស្រូវរបស់ស្រីមុំ និងឯកឧត្តម កឹម សុខា ប្រធានគណបក្សប្រឆាំង។
ចំណែកលោក ធន់ សារ៉ាយ ប្រធានសមាគមអាដហុក ដែលកំពុងរស់នៅក្រៅប្រទេសនេះ ក៏កំពុងជាប់សង្ស័យថា ជាប់ពាក់ព័ន្ធលើករណីខាងលើ ដូចមន្ត្រីខ្លួនទាំង៤រូបដែរ៕
Tag:
អាដហុក
គជប
ធន សារ៉ាយ
© រក្សាសិទ្ធិដោយ thmeythmey.com