កីឡាជាតិ
ជាតិ
ពាន KBZ Cup៖ U22 កម្ពុជាបន្តចាញ់ក្រុមនិស្សិតជប៉ុន ៥-១ នាជំនួបលើកទី២
× ក្រុមកីឡាករជម្រើសជាតិអាយុក្រោម២២ឆ្នាំកម្ពុជាបានបន្តប្រកួតចាញ់ក្រុមនិស្សិតជប៉ុន ៥-១ នាជំនួបលើកទី២នៃពានរង្វាន់ KBZ Cup 2017 នៅរសៀលថ្ងៃទី៣០ ខែមិថុនា នៅកីឡដ្ឋានThuwunna Stadium។ ការបរាជ័យនេះ អាចធ្វើឲ្យក្រុម U22 កម្ពុជាបាត់បង់ឱកាសប្រជែងនៅវគ្គបន្ត។
គ្រាន់តែ១២នាទីដំបូងក្នុងដើមវគ្គទី១ក្រុម U22 កម្ពុជាមានឱកាសមាសពីរដងលើក្រុមជម្រើសនិស្សិតរបស់ជប៉ុន ដោយកីឡាករ សារី ម៉ាត់ណូរ៉ូទីន បានអូសបាល់ដាច់ម្នាក់ឯកជាមួយអ្នកចាំទី តែស៊ុតខុសគោលដៅ។ នៅនាទី១២ឱកាសមាសបានកើតឡើងម្តងទៀតសម្រាប់ U22 កម្ពុជាដោយកីឡាករ ម៉ាត់ ណូរ៉ូទីន បានបញ្ជូនបាល់យ៉ាងល្អនៅប្រអប់គ្រោះថ្នាក់របស់ជប៉ុនដល់កីឡាករ ស៊ុន វ៉ាន់ដេត តែឱកាសនេះបានកន្លងផុតម្តងទៀត។
ក្រោយឱកាសមាសទាំងពីររបស់ U22 កម្ពុជាបាន៨នាទីកីឡាករ Haraoka Tsubasa បានរកគ្រាប់បាល់នាំមុខ ១-០ ឲ្យក្រុម Universiade របស់ជប៉ុន មុនកីឡាករ Matsuzaki Kai សម្រេចគ្រាប់ទី២ឲ្យជប៉ុននៅនាទី៤៤ មុនបញ្ចប់វគ្គទី១។
នៅវគ្គទី២ក្រុមកីឡាករជម្រើសនិស្សិតរបស់ជប៉ុន Universiade រកបាន៣គ្រាប់បន្ថែម ដើម្បីជួយក្រុមនាំមុខក្រុម U22 កម្ពុជាក្នុងលទ្ធផល ៥-០។ តែនៅចុងវគ្គទី២កីឡាករ U22 កម្ពុជាបានរកគ្រាប់បាល់តាមពី ៥-១ ឲ្យក្រុម U22 កម្ពុជាមុនចប់ការប្រកួត។
ការប្រកួតបន្ទាប់ ក្រុម U22 កម្ពុជាត្រូវជួបប្រកួតជាមួយក្រុម U22 ហុងកុង ដែលជាជំនួបចុងក្រោយនាវេលាម៉ោង៣រសៀលថ្ងៃទី២ ខែកក្កដា មុនក្រុមម្ចាស់ផ្ទះមីយ៉ាន់ម៉ាស្វាគមន៍ក្រុមនិស្សិតរបស់ជប៉ុន Universiade នាវេលាម៉ោង៦:៣០នាទី នៅកីឡដ្ឋាន Thuwunna Stadium ដូចគ្នា។
ជម្រើស១១នាក់ដំបូង៖ អោម ឧត្តម (អ្នកចាំទី), នេន សុធារដ្ឋ, នួន បូរី, សឿយ វិសាល (ប្រធានក្រុម), ហូយ ផល្លីន, សារី ម៉ាត់ណូរ៉ូទីន, ណុប តុលា, ច្រឹង ពលរដ្ឋ, ស៊ិន កក្កដា, ឆេង ម៉េង។
Tag:
បាល់ទាត់
U22 កម្ពុជា
KBZ Cup 2017
© រក្សាសិទ្ធិដោយ thmeythmey.com