ជាតិ
សេដ្ឋកិច្ច
សហព័ន្ធស្រូវអង្ករ និងក្រុមហ៊ុនឯកជន សហការវិនិយោគលើឃ្លាំងស្តុកស្រូវ រូបភាពពីសហព័ន្ធស្រូវអង្ករកម្ពុជា
× ភ្នំពេញ៖ សហព័ន្ធស្រូវអង្ករកម្ពុជា និងក្រុមហ៊ុនចំនួន៣ បានព្រមព្រៀងសហការវិនិយោគលើគម្រោងសាកល្បងឃ្លាំងស្តុកស្រូវ និងឡសម្ងួត។ នេះបើតាមព័ត៌មានដែលបង្ហោះលើទំព័រហ្វេសប៊ុករបស់សហព័ន្ធ។
ក្នុងពិធីចុះកិច្ចព្រមព្រងនៅក្នុងសន្និសីទសេដ្ឋកិច្ច និងពាណិជ្ជកម្មរវាងកម្ពុជា និងខេត្តជីលីន ប្រទេសចិន កាលពីថ្ងៃទី២៩ខែមិថុនា នៅរាជធានីភ្នំពេញ លោក សុខ ពុទ្ធីវុធ ប្រធានសហព័ន្ថស្រូវអង្ករកម្ពុជា និងជាអគ្គនាយកក្រុមហ៊ុនសោម៉ាគ្រុប បានថ្លែងថា កិច្ចព្រមព្រៀងនេះនឹងបើកផ្លូវឲ្យមានដំណោះស្រាយថ្មីបន្ថែមទៀតដល់វិស័យស្រូវអង្កររបស់កម្ពុជា ដោយអ្នកពាក់ព័ន្ធក្នុងខ្សែសង្វាក់ផលិតកម្ម នឹងទទួលបានអត្ថប្រយោជន៍ពីគម្រោងនេះ។
ភាគីក្រុមហ៊ុននៃកិច្ចព្រមព្រៀងនេះ រួមមាន ក្រុមហ៊ុនសោម៉ាគ្រុប ,ក្រុមហ៊ុន Jilin Province Investment និងក្រុមហ៊ុន Jinlin Tianzhong Agriculture Development ។
ទោះយ៉ាងណាព័ត៌មានលម្អិតជុំវិញគម្រោងអនុវត្តសាកល្បងឃ្លាំងស្តុកស្រូវ និងឡសម្ងួតនេះ ព្រោះភាគីនៃគម្រោងមិនទាន់បានសិក្សាស៊ីជម្រៅនៅឡើយ។ លោក មូល សារិទ្ធី អគ្គលេខាធិការសហព័ន្ធស្រូវអង្ករកម្ពុជា មិនអាចបញ្ជាក់បានពីទំហំទឹកប្រាក់វិនិយោគ ទីកន្លែង និងវិសាលភាពរបស់ម្រោងនេះឡើយ។
លោក សារិទ្ធី បន្ថែមថា ភាគីទាំងអស់នឹងសិក្សាបន្ថែមទៀតលើគម្រោងនេះ បន្ទាប់ពីមានកិច្ចព្រមព្រៀង។ បើតាមអគ្គលេខាធិការសហព័ន្ធស្រូវអង្ករកម្ពុជា គម្រោងនេះនឹងចាប់ផ្ដើមអនុវត្តនៅមុនបំណាច់ឆ្នាំ២០១៧ ហើយវាជាការសាកល្បងមុននឹងឈានទៅដល់គម្រោងវិនិយោគលើឃ្លាំងស្តុក និងឡសម្ងួតតម្លៃរាប់រយលានដុល្លារដែលមានប្រភពហិរញ្ញវត្ថុពីភាគីចិន៕
Tag:
អង្ករ
សហព័ន្ធស្រូវអង្ករ
© រក្សាសិទ្ធិដោយ thmeythmey.com