រដ្ឋមន្ត្រីក្រសួងការងារ នឹងជួបភាគីថៃ ដើម្បីសម្រួលបញ្ញត្តិរឹតបន្តឹងពលករខុសច្បាប់ នៅថ្ងៃទី៦ កក្កដា

ជាតិ

រដ្ឋមន្ត្រីក្រសួងការងារ នឹងជួបភាគីថៃ ដើម្បីសម្រួលបញ្ញត្តិរឹតបន្តឹងពលករខុសច្បាប់ នៅថ្ងៃទី៦ កក្កដា

03, Jul 2017 , 7:59 pm

រូបភាព

រូបពីហ្វេសប៊ុកក្រសួងការងារ និងបណ្ដុះបណ្ដាលវិជ្ជាជីវៈ

ដោយ: រំដួល ចិត្រា (Romdoul Chetra)

ភ្នំពេញ៖ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង នឹងទៅជួបភាគីថៃ ដើម្បីដោះស្រាយបញ្ហាបញ្ញត្តិថ្មី ដែលមានលក្ខណៈដាក់ពិន័យយ៉ាងធ្ងន់ធ្ងរទាំងពលករបរទេសខុសច្បាប់ និងម្ចាស់ក្រុមហ៊ុនថៃ ពេលប្រព្រឹត្តខុសពីខ្លឹមសារក្រឹត្យ ស្ដីពីការគ្រប់គ្រងពលករបរទេសឡើងវិញ។

លោក អ៊ិត សំហេង បានអំពាវនាវឲ្យពលករដែលកំពុងធ្វើការនៅប្រទេសថៃស្ងប់ស្ងាត់សិន ហើយកុំទាន់អាលមានការព្រួយបារម្ភលើបញ្ហានេះ ព្រោះក្រសួងមានវិធានការណ៍ច្រើន សម្រាប់ជួយដល់ពលករកម្ពុជា ។ បើតាមលោក អ៊ិត សំហេង ពលករខ្មែរកំពុងធ្វើការនៅទឹកដី មានចំនួនជាង១លាននាក់ ទាំងពលករស្របច្បាប់ និងខុសច្បាប់។

ថ្លែងក្រោយវេទិកាជាតិ អប់រំបណ្តុះបណ្តាលបច្ចេកទេស និងវិជ្ជាជីវៈ នៅសាលាសន្និសីទកោះពេជ្រ នៅព្រឹកថ្ងៃទី៣ កក្កដានេះ រដ្ឋមន្ត្រីក្រសួងការងារ បានបញ្ជាក់ដូច្នេះថា៖

សូមស្ដាប់សំឡេង៖

ការចេញបញ្ញត្តិថ្មីរបស់រដ្ឋាភិបាលថៃនេះ គឺជាការពង្រឹងតាមច្បាប់អន្តោប្រវេសន៍ ដើម្បីពង្រឹងច្បាប់ការងារនៅក្នុងប្រទេសថៃ។ ភាគីថៃទុករយៈពេល៤ខែ (១២០ថ្ងៃ) សម្រាប់ពលករខុសច្បាប់ ត្រឡប់ទៅប្រទេសពួកគេវិញសិន ដើម្បីរៀបចំឯកសារឲ្យបានត្រឹមត្រូវតាមច្បាប់ សឹមនឹងត្រឡប់ទៅធ្វើការនៅប្រទេសថៃវិញ។

ក្រឹត្យស្ដីពីច្បាប់គ្រប់គ្រងពលករបរទេសដ៏តឹងរ៉ឹង ដែលចូលជាធរមានកាលពីថ្ងៃទី២៣ មិថុនា មានគោលដៅត្រួតពិនិត្យចំនួនពលករចំណាកស្រុកនៅប្រទេសថៃ ក៏ដូចជាពលករបរទេសដែលកំពុងធ្វើការខុសច្បាប់នៅថៃដែរ។ បញ្ញត្តិថ្មីនេះចែងថាជនជាតិថៃដែលជួលពលករបរទេសខុសច្បាប់ ត្រូវរងពិន័យជាប្រាក់ដល់ទៅជាង ២ម៉ឺន ៣ពាន់ដុល្លារសម្រាប់ពលករបរទេសម្នាក់។ ចំណែកជនបរទេសធ្វើការដោយគ្មានច្បាប់អនុញ្ញាតអាចរងពិន័យដល់ទៅជិត៣ពាន់ដុល្លារ និងត្រូវជាប់ពន្ធនាគារដល់ទៅ៥ឆ្នាំ …។

ប៉ុន្តែការចេញក្រឹត្យបែបនេះ មិនមែនតែប្រទេសដែលមានពលករទៅធ្វើការនៅក្នុងប្រទេសថៃ ដូចជាកម្ពុជា ឡាវ មីយ៉ាន់ម៉ា …ជាដើម ដែលមានការព្រួយបារម្ភនោះទេ សូម្បីតែបណ្ដាក្រុមហ៊ុន ម្ចាស់សហគ្រាស និងជួយមន្ត្រីក្នុងរដ្ឋាភិបាលថៃផ្ទាល់ ក៏មានការមិនពេញចិត្តដែរ ដោយសារតែសេដ្ឋកិច្ចថៃ ត្រូវការកម្លាំងពលកម្មច្រើនពីជនបរទេស៕