ក្រសួងទេសចរណ៍៖ អ្នកទេសចររាប់លាននាក់ រើសអង្គរវត្តឲ្យជាប់លេខ១ រយៈពេល៤ឆ្នាំជាប់គ្នា

ជាតិ

ក្រសួងទេសចរណ៍៖ អ្នកទេសចររាប់លាននាក់ រើសអង្គរវត្តឲ្យជាប់លេខ១ រយៈពេល៤ឆ្នាំជាប់គ្នា

04, Jul 2017 , 8:19 am

រូបភាព

ដោយ:

ឆ្នាំ២០១៧នេះ ប្រាសាទអង្គវត្ត បានជាប់ចំណាត់ថ្នាក់លេខ១ ជាសំណង់ប្រវត្តិសាស្ត្រដ៏អស្ចារ្យបំផុតលើលោក (World’s Number 1 Landmark) តាមរយៈការបោះឆ្នោតពីភ្ញៀវទេសចរបរទេសរាប់លាននាក់នៅជុំវិញពិភពលោក លើគេហទំព័រ TripAdvisor ។ ចំណាត់ថ្នាក់ថ្មីនេះ ធ្វើឲ្យប្រាសាទអង្គរវត្តរបស់កម្ពុជា ជាប់ជាគោលដៅទេសចរណ៍ល្អបំផុតលើលោក ៤ឆ្នាំជាប់គ្នា។ សូមបញ្ជាក់ថា នៅឆ្នាំ២០១៤ អង្គរវត្ត ជាប់លេខ១ ជាទីបុរាណវិទ្យា និងប្រវត្តិសាស្ត្រដ៏ល្បីល្បាញបំផុត ជាប់ចំណាត់ថ្នាក់លេខ១ ជាទីប្រវត្តិសាស្ត្រល្បីល្បាញបំផុតនៅឆ្នាំ២០១៥ និងជាប់លេខ១ ជារមណីយដ្ឋានវប្បធម៌ដ៏ល្បីល្បាញបំផុតលើពិភពលោកក្នុងឆ្នាំ២០១៦ ។

ប្រាសាទអង្គវត្តរបស់កម្ពុជា បានជាប់ចំណាត់ថ្នាក់លេខ១ ជាសំណង់ប្រវត្តិសាស្ត្រដ៏អស្ចារ្យបំផុតលើពិភពលោក (World’s Number 1 Landmark) សម្រាប់ឆ្នាំ២០១៧ ពីការបោះឆ្នោតរបស់ភ្ញៀវទេសចរបរទេសរាប់លាននាក់នៅជុំវិញពិភពលោក តាមរយៈគេហទំព័ររបស់ក្រុមហ៊ុនប្រឹក្សាយោបល់អំពីការធ្វើដំណើរ (TripAdvisor Co. Inc.)។ គេហទំព័រនេះ បានចេញតារាងចំណាត់ថ្នាក់ទីតាំងទេសចរណ៍ កាលពីអំឡុងខែឧសភាកន្លងទៅ។

នេះជាឆ្នាំទី៤ហើយ ដែលភ្ញៀវទេសចរជុំវិញពិភពលោក បានបោះឆ្នោតតាមរយៈគេហទំព័រល្បីល្បាញផ្សេងៗគ្នា គាំទ្រឲ្យប្រាសាទអង្គវត្តបានជាប់លេខ១ ។ សេចក្ដីប្រកាសព័ត៌មានរបស់ក្រសួងទេសចរណ៍ នៅថ្ងៃទី២៩ ខែមិថុនា បញ្ជាក់ថា កាលពីឆ្នាំ២០១៤ សម្បត្តិបេតិកភណ្ឌពិភពលោកមួយនេះ បានជាប់ចំណាត់ថ្នាក់លេខ១ ជាទីបុរាណវិទ្យា និងប្រវត្តិសាស្ត្រដ៏ល្បីល្បាញបំផុតលើពិភពលោក តាមរយៈគេហទំព័រ ArchaeoMadnes។ នៅដើមឆ្នាំ២០១៥ ប្រាសាទអង្គវត្តបានជាប់ចំណាត់ថ្នាក់លេខ១ ជាទីប្រវត្តិសាស្ត្រល្បីល្បាញបំផុតលើពិភពលោក តាមរយៈគេហទំព័រ TripAdvisor។ ដោយឡែកនៅឆ្នាំ២០១៦ អង្គវត្តរបស់កម្ពុជា បានជាប់លេខ១ ជារមណីយដ្ឋានវប្បធម៌ដ៏ល្បីល្បាញបំផុតលើពិភពលោក តាមរយៈគេហទំព័រ Lonely Planet។

ក្រសួងទេសចរណ៍បានឲ្យដឹងទៀតថា កាលពីខែឧសភាឆ្នាំ២០១៦ កន្លងទៅ លោកAnton Caragea ប្រធានក្រុមព្រឹក្សាទេសចរណ៍ និងពាណិជ្ជម្មអឺរ៉ុប(European Council on Tourism and Trade) និងលោក Mircea Constaninescu ប្រធានបណ្ឌិតសភាទេសចរណ៍អឺរ៉ុប (European Council Academy) បានប្រកាសថា ប្រទេសកម្ពុជាជាគោលដៅទេសចរណ៍ល្អបំផុតលើពិភពលោក សម្រាប់ឆ្នាំ២០១៦ (World’s Best Tourist Destination for 2016) និងជាគោលដៅទេសចរណ៍វប្បធម៌ដ៏ពេញនិយម សម្រាប់ឆ្នាំ២០១៦(Favorite Cultural Tourist Destination for 2016)។

ប្រធានក្រុមប្រឹក្សាទេសចរណ៍ និងប្រធានបណ្ឌិតសភាទេសចរណ៍អឺរ៉ុប បានចាត់ទុកប្រទេសកម្ពុជា ជាព្រះរាជាណាចក្រអច្ឆរិយ ផ្អែកលើ៥ចំណុចរួមមាន ទី១ អច្ឆរិយវប្បធម៌ ដែលមានប្រាសាទអង្គរវត្តដែលជាស្នាដៃរបស់ខ្មែរ តំណាងឲ្យមនុស្សជាតិទាំងមូល និងអច្ឆរិយភាពខាងធម្មជាតិ។ ទី២ បឹងទន្លេសាបដ៏ធំនៅអាស៊ី ដែលមានទឹកហូរត្រលប់គ្មានពីរលើលោក។ ទី៣. ភាពពិសេសនៃព្រះពុទ្ធសាសនានៅកម្ពុជា ដែលអប់រំមនុស្សទូទៅឲ្យក្លាយជាពុទ្ធសាសនិកប៉ុណ្ណោះផង និងអប់រំមនុស្សឲ្យធ្វើអំពើល្អផង។ ទី៤. ភាពញញឹមរួសរាយ រាក់ទាក់របស់ប្រជាជនកម្ពុជា។ និងទី៥ ការបញ្ចូលវិស័យទេសចរណ៍ និងវប្បធម៌រួមគ្នា សម្រាប់ការអភិវឌ្ឍប្រទេសជាតិ។

ក្រៅពីនេះក្រសួងទេសចរណ៍ បានអំពាវនាវដល់សាធារណជន ទេសចរជាតិ និងអន្តរជាតិ ចូលរួមរក្សាសន្តិភាព និងការការបេតិកភណ្ឌរបស់ដូនតាខ្មែរមួយនេះឲ្យគង់វង្ស៕