ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
ដំណើរកម្សាន្តសប្បុរសធម៌ឆ្ពោះទៅកាន់តំបន់វត្តបុរាណ «ទួលព្រះស្រីពិជ័យសូរ្យវង្សកំពង់ព្រះ»
04, Jul 2017 ,
10:26 am
រូបភាព
×
ដោយ:
ថ្មីៗ
ស្ថិតក្នុងភូមិកំពង់ព្រះ ឃុំឆ្នុកទ្រូ ស្រុកបរិបូណ៌ ដែលមានចម្ងាយប្រមាណ៤០គីឡូម៉ែត្រពីខេត្តកំពង់ឆ្នាំង វត្ត «ទួលព្រះស្រីពិជ័យសូរ្យវង្សកំពង់ព្រះ» រង់ចាំការសង្គ្រោះ។ ជាការឆ្លើយតប យុវជនស្ម័គ្រចិត្តមួយក្រុមពីរាជធានីភ្នំពេញ កំពុងរៀបចំមូលនិធិសប្បុរសធម៌ដើម្បីស្វែងរកថវិកាជួយទ្រទ្រង់សំណង់បុរាណដែលមានអាយុរាប់រយឆ្នាំ និងកំពុងទ្រុឌទ្រោមមួយនេះ។
គម្រោងដំណើរទស្សនកិច្ចស្ថាបត្យកម្មបែបសប្បុរសធម៌ «Amazing Cambodia» នឹងប្រព្រឹត្តទៅនៅថ្ងៃអាទិត្យ ទី១៣ ខែសីហា ឆ្នាំ២០១៧ ខាងមុខនេះ ដែលរៀបចំដោយយុវជនស្ម័គ្រចិត្តមួយក្រុមដែលមានអាយុក្រោម២៥ឆ្នាំ។ វាដំណើរកម្សាន្តឆ្ពោះទៅកាន់តំបន់វត្ត «ទួលព្រះស្រីពិជ័យសូរ្យវង្សកំពង់ព្រះ» ដែលស្ថិតនៅលើទីទួលបុរាណនៃប្រាសាទកំពង់ព្រះប្របនឹងមាត់បឹងទន្លេសាប ក្នុងភូមិកំពង់ព្រះ ឃុំឆ្នុកទ្រូ ស្រុក បរិបូណ៌ ចម្ងាយប្រមាណជិត៤០គីឡូម៉ែត្រពីទីរួមខេត្តកំពង់ឆ្នាំង។
ដំណើរកម្សាន្តជាកញ្ចប់ទស្សនកិច្ចសិក្សាបែបស្ថាបត្យកម្មនេះ ក្នុងគោលបំណងទ្រទ្រងសំណង់បុរាណនៃវត្តកំពង់ព្រះ ដែលកំពុងទ្រុឌទ្រោមខ្លាំង ហើយក៏ជាការបង្កើតឱកាសឲ្យយុវជនខ្មែរជំនាន់ក្រោយស្វែងយល់អំពីលក្ខណៈពិសេសនៃស្ថាបត្យកម្មនៃសំណង់ពុទ្ធសាសនាបុរាណដែលត្រូវបានកសាងតាំងពីដើមសតវត្សរ៍ទី២០ និងប្រាសាទកំណើតនៃរចនាបទកំពង់ព្រះសម័យបុរេអង្គរដែលមានអាយុកាលរាប់ពាន់ឆ្នាំ។
យុវជន ស្រ៊ិន សុខមាន វ័យ២៤ឆ្នាំ ស្ថាបនិកទំព័រ Amazing Cambodia ដែលជាអ្នកផ្តួចផ្តើមដំណើរកម្សាន្តបែបសប្បុរសធម៌នេះ បានអះអាងពីសារសំខាន់ក្នុងការសង្គ្រោះវត្តបុរាណ «ទួលព្រះស្រីពិជ័យសូរ្យវង្សកំពង់ព្រះ»។ លោកបានបញ្ជាក់ថា ផ្អែកលើកិច្ចការស្រាវជ្រាវលើប្រធានបទទាំងនេះអស់រយៈពេល៥ឆ្នាំ លោកបានមើលឃើញនូវសក្តានុពលវប្បធម៌ដ៏ប្រពៃនៃតំបន់កំពង់ព្រះដែលជាស្លាកស្នាម ប្រវត្តិសាស្ត្រខ្មែរពីអតីតកាលតាំងពីសម័យចេនឡាសតវត្សរ៍ទី៨មកម្ល៉េះ។
លោក សុខមាន បានលើកឡើងថា៖ «ព្រះវិហារបុរាណ និងប្រាសាទចំនួនពីរនៅ ទីតាំងនោះ ពិតជាមានតម្លៃខាងផ្នែកស្ថាបត្យកម្មដែលកូនខ្មែរគប្បីចំណាយពេលទៅសិក្សាស្វែងយល់បន្ថែម។ ម្យ៉ាងវិញទៀត ជីវភាពរបស់ពុទ្ធបរិស័ទចំណុះជើងវត្តដាច់ស្រយាលនេះក៏នៅមានកម្រិត ហើយព្រះសង្ឃ ក៏មានការខ្វះខាតដោយសារតែវត្តនេះប្រៀបបានដូចជាកូនកោះមួយនៅរដូវវស្សាពិបាកក្នុងការធ្វើដំណើរ»។
យុវជនស្ម័គ្រចិត្តរូបនេះ បន្ថែមថា ព្រះគ្រូចៅអធិការដែលមានព្រះជន្ម៦១ព្រះវស្សា កំពុងដង្ហោយសុំជំនួយថវិកាពីសប្បុរសជនជិតឆ្ងាយដើម្បីសម្រួលដល់ការអភិរក្សសម្បត្តិវប្បធម៌ និង ការអភិវឌ្ឍហេដ្ឋារចនាសម្ព័ន្ធផ្នែកព្រះពុទ្ធសាសនាផ្សេងៗទៀត នៅវត្តរបស់ព្រះអង្គ។ បើតាមសង្ឃដីកាផ្ទាល់របស់ព្រះអង្គក្នុងជំនួបជាមួយក្រុមការងារកាលពីថ្ងៃទី២៨ ខែមិថុនាកន្លងទៅ វត្តកំពុងត្រូវការបច្ច័យប្រមាណជាង២០០០ដុល្លារដើម្បីដំណើរការគម្រោងខាងលើ។
គម្រោងកម្មវិធីនេះមិនត្រឹមតែជួយដល់វត្តកំពង់ព្រះនោះទេ តែវាជាក្តីស្រមៃរបស់និស្សិតផ្នែកស្ថាបត្យកម្ម បុរាណវិទ្យា ទេសចរណ៍ និង មុខវិជ្ជាដែលពាក់ព័ន្ធ។ មិនត្រឹមតែប៉ុណ្ណោះ វាក៏នឹងចូលរួមចំណែកក្នុងការផ្សព្វផ្សាយសក្តានុពលទេសចរណ៍របស់ខេត្តកំពង់ឆ្នាំង ព្រមទាំងបង្កើតជាវេទិកាសាធារណៈសម្រាប់ប្រជាសហគមន៍បង្ហាញអំពីស្ថានភាពទូទៅ សេចក្តីត្រូវការជាក់ស្តែង និង ការរំពឹងទុកចំពោះសហគមន៍របស់ពួកគេថែមទៀតផង។
យុវជន រឿន វីរៈ សហស្ថាបនិកគម្រោងមូលនិធិ និង ជាមគ្គុទ្ទេសក៍ជំនាញនៃក្រុមដំណើរកម្សាន្តស្ថាបត្យកម្មខ្មែរ (KA Tour) ក៏បានពន្យល់ដែរថា៖ «ពួកខ្ញុំជឿជាក់ថានេះគឺជាផ្លូវដ៏ត្រឹមត្រូវក្នុងការរួមចំណែកធ្វើដើម្បីប្រទេសជាតិដែលខ្ញុំកំពុងរស់នៅ។ ថវិកាជាតិនៅមានកម្រិតសម្រាប់ការជួសជុសកែលម្អព្រះវិហារបុរាណ ដូច្នេះពិតជាមានចន្លោះដែលពួកយើងអាចជួយបំពេញបន្ថែម»។
ដំណើរកម្សាន្តដែលគ្រោងរៀបចំនៅថ្ងៃទី១៣ ខែសីហា ខាងមុខ នឹងមានការចូលរួម និងទទួលស្វាគមន៍ផងដែរពីអាជ្ញាធរដែនដីមូលដ្ឋាន មន្ត្រី ជំនាញនៃមន្ទីរវប្បធម៌និងវិចិត្រសិល្បៈខេត្តកំពង់ឆ្នាំង គណៈកម្មការវត្ត ក្រុមនិស្សិតពីសាកលវិទ្យាល័យនានា ពីរាជធានីភ្នំពេញ ក្រុមយុវជនស្ម័គ្រចិត្តខេត្តកំពង់ឆ្នាំង និង ប្រជាពលរដ្ឋសហគមន៍កំពង់ព្រះ។
ក្រោមពាក្យស្លោកថា «សិក្ខាកាមម្នាក់ដើម្បីវិភាគទានមួយចំណែក» អ្នកចូលរួមម្នាក់ៗត្រូវបង់ វិភាគទានចំនួន៣០ដុល្លារអាមេរិក ដើម្បីទៅលើការចំណាយគ្រប់ប្រភេទក្នុងដំណើរទស្សនកិច្ច និង មូលនិធិទ្រទ្រង់វត្ត ដោយសកម្មភាពសំខាន់ៗរួមមាន ការដើរទស្សនាព្រះវិហារបុរាណនិងប្រាសាទជាមួយក្រុមមគ្គុទ្ទេសក៍ ការចូលរួម ប្រឡងប្រជែងដាល់អំបុកតាមបុរាណខ្មែរ ការទទួលទាននំបញ្ចុកសាមគ្គីឥតដែនកំណត់ ការស្រង់ទឹកជូន មត៌កមនុស្សរស់ ការចែកអំណោយដល់កុមារក្រីក្រ ការជិះទូកទស្សនាភូមិបណ្តែតទឹក ការស្វែងយល់អំពី សិប្បកម្មផលិតក្អមឆ្នាំងរបស់អ្នកភូមិអណ្តូងប្ញស្សី និង ការទស្សនារបាំប្រពៃណីតំណាងខេត្តកំពង់ឆ្នាំង សម្ដែងដោយក្រុមយុវសិស្សសិល្បៈខេត្តផ្ទាល់៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
វត្តបុរាណ
Amazing Cambodia
© រក្សាសិទ្ធិដោយ thmeythmey.com
អត្ថបទពេញនិយម
«មជ្ឈការ»មានន័យខុសពី«វិមជ្ឈការ»ដូចម្តេច?
6 ថ្ងៃ
ដំណឹងបឋម៖ ករណីផ្ទុះឃ្លាំងគ្រាប់នៅបន្ទាយភូមិភាគ៣ ក្រុងច្បារមន មានអ្នកស្លាប់ និងរបួសច្រើននាក ...
18 ម៉ោង
«ប្រេសិត»មានន័យដូចម្តេច?
1 សប្តាហ៍
គ្រឿងឥស្សរិយាភរណៈ គឺ «មេដាយ» មិនមែន «មេដៃ» ឡើយ
3 ថ្ងៃ
តើពាក្យ «ដុតដៃដុតជើង» មានន័យដូចម្តេច?
2 ថ្ងៃ
អត្ថបទពេញនិយមបន្ថែម