ជាតិ
នយោបាយជាតិ
ក្រសួងមហាផ្ទៃប្រាប់ឲ្យបន្ទប់ស្ថានការណ៍បញ្ឈប់សកម្មភាពរបស់ខ្លួន
× ក្រសួងមហាផ្ទៃ បានប្រាប់ឲ្យ ខុមហ្វ្រែល និង NICFEC បញ្ឈប់សកម្មភាពរបស់បន្ទប់ស្ថានការណ៍ និងត្រូវអនុវត្តសកម្មភាពរបស់ខ្លួន ឲ្យត្រឹមត្រូវតាមច្បាប់ស្តីពីសមាគម និងអង្គការមិនមែនរដ្ឋាភិបាល គោរពច្បាប់ និងលិខិតបទដ្ឋានគតិយុត្តនានា។ ក្រសួងមហាផ្ទៃចាត់ទុកសកម្មភាពរបស់បន្ទប់ស្ថានការណ៍ ជាសកម្មភាពខុសនឹងបទប្បញ្ញត្តិនៃច្បាប់ស្តីពីសមាគម និងអង្គការមិនមែនរដ្ឋាភិបាល។
ក្រសួងមហាផ្ទៃ នៅថ្ងៃទី៤ ខែកក្កដា បានផ្ញើលិខិត២ដោយឡែកពីគ្នា ទៅកាន់អង្គការឃ្លាំមើលការបោះឆ្នោតនៅកម្ពុជា (ខុមហ្វ្រែល) និងគណៈកម្មាធិការបោះឆ្នោតដោយសេរី និងយុត្តិធម៌នៅកម្ពុជា (NICFEC) អំពីករណីបន្ទប់ស្ថានការណ៍ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០១៧ ។
លិខិតនោះមានខ្លឹមសារដូចគ្នា ដោយបានបញ្ជាក់ប្រាប់ ខុមហ្វ្រែល និង NICFECថា ការបង្កើតបន្ទប់ស្ថានការណ៍ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០១៧ ដោយមានអង្គការ និងសមាគមប្រមាណ៤០ ជាសមាជិក គឺផ្ទុយនឹងបទប្បញ្ញត្តិនៃច្បាប់ស្តីពីសមាគម និងអង្គការមិនមែនរដ្ឋាភិបាល។
សេចក្តីថ្លែងការណ៍របស់បន្ទប់ស្ថានការណ៍ គ្មានតម្លៃគតិយុត្ត និងមិនបានឆ្លុះបញ្ជាំងពីអព្យាក្រឹត្យភាពដូចមានចែងក្នុងមាត្រា២៤ នៃច្បាប់ស្តីសមាគម និងអង្គការមិនមែនរដ្ឋាភិបាល។ នេះបើតាមក្រសួងមហាផ្ទៃ ដែលបន្តបញ្ជាក់ប្រាប់អង្គការខុមហ្វ្រែល និង NICFEC ឲ្យបញ្ឈប់សកម្មភាពខុសច្បាប់របស់បន្ទប់ស្ថានការណ៍ និងត្រូវអនុវត្តសកម្មភាពរបស់ខ្លួនឲ្យបានត្រឹមត្រូវ ស្របតាមច្បាប់ស្តីពីសមាគម និងអង្គការមិនមែនរដ្ឋាភិបាល ច្បាប់ និងលិខិតបទដ្ឋានគតិយុត្តនានា។
សូមបញ្ជាក់ថា សម្ដេចនាយករដ្ឋមន្ត្រី ហ៊ុន សែន នៅថ្ងៃទី២៨ ខែមិថុនា ពីពិធីរំឮកខួបអនុស្សាវរីយ៍៦៦ឆ្នាំ នៃថ្ងៃកំណើតគណបក្សប្រជាជនកម្ពុជា នាយករដ្ឋមន្ត្រី ហ៊ុន សែន បានបញ្ជាឲ្យក្រសួងមហាផ្ទៃ ត្រួតពិនិត្យតាមផ្លូវច្បាប់ទៅលើ បន្ទប់ស្ថានការណ៍។ មូលហេតុដែលសម្ដេច ហ៊ុន សែន ស្នើឲ្យត្រួតពិនិត្យលើស្ថាប័នមួយនេះ គឺចង់សំដៅទៅលើភាពស្របច្បាប់របស់បន្ទប់ស្ថានការណ៍ ក្នុងបញ្ជីឈ្មោះរបស់ក្រសួងមហាផ្ទៃ។
ការបញ្ជាឲ្យពិនិត្យលើសកម្មភាពបន្ទប់ស្ថានការណ៍កើតឡើង បន្ទាប់ដែលមានអង្គការ និងសមាគមប្រមាណ៤០ ជាសមាជិកនេះ វាយតម្លៃថាការបោះឆ្នោតជ្រើសរើសក្រុមប្រឹក្សាឃុំសង្កាត់មានភាពល្អប្រសើរ ប៉ុន្តែនៅតែកង្វះយុត្តិធម៌ និងសេរីភាពត្រូវបានរឹតត្បិត។ ប្រមុខរដ្ឋាភិបាល ចាត់ទុកការវាយតម្លៃរបស់ក្រុមអង្គការសង្គមស៊ីវិលទាំងនេះ ជាការបង្កឲ្យមានភាពអាប់អួក្នុងដំណើរការបោះឆ្នោត៕
Tag:
មហាផ្ទៃ
បន្ទប់ស្ថានការណ៍
ខុមហ្វ្រែល
NICFEC
© រក្សាសិទ្ធិដោយ thmeythmey.com