កីឡាអន្តរជាតិ
អន្តរជាតិ
ឥណ្ឌូណេស៊ី ចង់ដឹកនាំប្រទេសតំបន់អាស៊ាន ប្រជែងធ្វើម្ចាស់ផ្ទះ World Cup ២០៣៤
× ឥណ្ឌូណេស៊ីគ្រោងនឹងដឹកនាំក្រុមនៃបណ្តាប្រទេសអាស៊ីអាគ្នេយ៍ក្នុងបំណងរៀបចំព្រឹត្តិការណ៍បាល់ទាត់ពិភពលោក FIFA World Cup ឆ្នាំ២០៣៤។
លោក Joko Driyono អនុប្រធានសមាគមកីឡាបាល់ទាត់ឥណ្ឌូណេស៊ី PSSI បាននិយាយថាប្រទេសនេះបានស្នើដឹកនាំក្រុមប្រទេសអាស៊ានដើម្បីធ្វើម្ចាស់ផ្ទះ World Cup ២០៣៤ នៅក្នុងកិច្ចប្រជុំក្រុមប្រឹក្សាសហព័ន្ធកីឡាបាល់ទាត់អាស៊ី (AFF) នៅវៀតណាមកាលពីដើមខែនេះ។
លោក Joko Driyono អនុប្រធានសមាគមកីឡាបាល់ទាត់ឥណ្ឌូណេស៊ី
លោក Driyono បានប្រាប់ទីភ្នាក់ងារព័ត៌មាន AFP ថាការស្នើខាងលើនឹងត្រូវគាំទ្រជាផ្លូវការនៅក្នុងកិច្ចប្រជុំក្រុមប្រឹក្សា AFF នៅកោះបាលីប្រទេសឥណ្ឌូនេស៊ី នាខែកញ្ញាខាងមុខនេះ។
លោកអនុប្រធាន PSSI បានបន្ថែមថាការដេញថ្លៃរៀបចំព្រឹត្តិការណ៍បាល់ទាត់ដ៏មានកិត្យានុភាពនេះគឺជាមហិច្ឆតាដ៏ធំសម្រាប់បណ្តាប្រទេសនានាមកពីសមាគមប្រជាជាតិអាស៊ីអាគ្នេយ៍ ខណៈប្រទេសទាំងនេះមានរយៈពេល ១៧ឆ្នាំដើម្បីរៀបចំត្រៀមការប្រកួត។
យ៉ាងណាក៏ដោយ មានតែប្រទេសក្នុងតំបន់អាស៊ាន២ ឬ៣ ប៉ុណ្ណោះក្នុងចំណាមប្រទេសទាំង១០ ដែលមានភូមិសាស្ត្រល្អ និងហេដ្ឋារចនាសម្ព័ន្ធរីកចម្រើនដើម្បីធ្វើម្ចាស់ផ្ទះ World Cup ឆ្នាំ២០៣៤។ នេះជាការបញ្ចាក់បន្ថែមរបស់លោក Driyono៕
Tag:
បាល់ទាត់
FIFA World Cup
ឥណ្ឌូណេស៊ី
© រក្សាសិទ្ធិដោយ thmeythmey.com