ក្រសួងកសិកម្ម ថា គ្មានការអនុញ្ញាតឲ្យក្រុមហ៊ុន ដួង ស្រួច កាប់បំផ្លាញព្រៃឈើ នៅខេត្តរតនគិរីឡើយ

ជាតិ

ក្រសួងកសិកម្ម ថា គ្មានការអនុញ្ញាតឲ្យក្រុមហ៊ុន ដួង ស្រួច កាប់បំផ្លាញព្រៃឈើ នៅខេត្តរតនគិរីឡើយ

12, Jul 2017 , 9:19 pm

រូបភាព

ដោយ: ថ្មីៗ

ភ្នំពេញ៖ ក្រសួងកសិកម្មរុក្ខា ប្រមាញ់ និងនេសាទ បានបដិសេធថា ក្រសួងមិនមានការអនុញ្ញាតឲ្យក្រុមហ៊ុន ដួង ស្រួច កាប់បំផ្លាញព្រៃឈើ នៅខេត្តរតនគិរីឡើយ។ ការបដិសេធរបស់ក្រសួងកសិកម្មនេះ ធ្វើឡើងក្រោយពីមានការផ្សព្វផ្សាយថា ក្រុមហ៊ុន ដួង ស្រួច កំពុងកាប់បំផ្លាញព្រៃឈើយ៉ាងសកម្ម ដោយមានការអនុញ្ញាតពីក្រសួង។

ក្រសួងកសិកម្ម បានពន្យល់ថា ក្រុមហ៊ុន ដួង ស្រួច ពិតជាបានមកស្នើសុំការអនុញាតប្រមូលផល អនុផលព្រៃឈើនៅតំបន់សម្បទានសង្គមកិច្ចក្នុងខេត្តរតនគិរីកន្លងមកមែន ប៉ុន្តែក្រសួងបានតម្រូវឲ្យក្រុមហ៊ុនទាក់ទងជាមួយអភិបាលខេត្តរតនគិរី និងសហការជាមួយរដ្ឋបាលព្រៃឈើ ឲ្យបានសមស្របតាមនីតិវិធីជាមុនសិន។ ក្រសួងកសិកម្ម អះអាងថា មកដល់ពេលនេះមិនទាន់មានការអនុញ្ញាតឲ្យក្រុមហ៊ុនមួយនេះ កាប់បំផ្លាញព្រៃឈើតំបន់នោះដែរ។

សេចក្តីប្រកាសព័ត៌មានរបស់ក្រសួងកសិកម្ម ចុះថ្ងៃទី១១ កក្កដា បានបញ្ជាក់ដូច្នេះថា៖«កាលពីថ្ងៃទី៥ កក្កដា ឆ្នាំ២០១៧ ក្រុមហ៊ុន ដួង ស្រួច គ្រុប បានជួបពិភាក្សាជាមួយឯកឧត្តមអភិបាលខេត្តនៃគណៈអភិបាលខេត្តរតនគិរី ពីដំណើរការដីសម្បទានសង្គមកិច្ចនេះ។ ពេលនោះឯកឧត្តមអភិបាលខេត្ត បានឲ្យក្រុមហ៊ុនបង្ហាញពីទីតាំងដីនោះ ដើម្បីឲ្យក្រុមការងារថ្នាក់ខេត្តចុះពិនិត្យជាក់ស្ដែង និងហាមឃាត់ដាច់ខាត មិនឲ្យក្រុមហ៊ុនធ្វើសកម្មភាពអ្វីខុសពីនីតិវិធីទេ»។

ជាមួយគ្នានេះក្រសួងកសិកម្ម ក៏ស្នើឲ្យប្រព័ន្ធផ្សព្វផ្សាយ សហការជាមួយក្រសួង ដើម្បីបំពេញភារកិច្ចឲ្យបានប្រសើរឡើង ដែលជាប្រយោជន៍ ក្នុងការចូលរួមដល់ការគ្រប់គ្រង និងការពារធនធានធម្មជាតិកម្ពុជា៕