អន្តរជាតិ
ប្រមុខការទូតអាមេរិកថា លោកគ្មានបំណងលាលែងពីតំណែងដូចពាក្យចចាមអារ៉ាមឡើយ
× ប្រមុខការទូតអាមេរិកលោក រិច ធីល័រសិន (Rex Tillerson) បានទាត់ចោលព័ត៌មានដែលថា លោកត្រៀមខ្លួនលាលែងពីតំណែងជារដ្ឋមន្ត្រីការបរទេសអាមេរិកដោយសារមិនចុះសម្រុងជាមួយប្រធានាធិបតី ដូណាល់ ត្រាំ។ លោកបានបញ្ជាក់ថា លោកនឹងបន្តកាន់តំណែង ដរាបណាប្រធានាធិបតីនៅតែទុកចិត្តនិងផ្តល់ឱកាសឲ្យលោកបន្តការងារនោះ។
«ខ្ញុំមិនទៅណាទេ»។ នេះជាសម្តីរបស់រដ្ឋមន្ត្រីការបរទេសអាមេរិកលោក រិច ធីល័រសិន ឆ្លើយតបនឹងសំណួរបស់ក្រុមអ្នកសារព័ត៌មានពាក់ព័ន្ធសំណួរដែលថាលោកគ្រោងលាលែងពីតំណែង ដោយសារតែលោកមិនត្រូវរ៉ូវជាមួយប្រធានាធិបតី ដូណាល់ ត្រាំ។
លោក រិច ធីល័រសិន បានឆ្លើយតបអ្នកសារព័ត៌មាន ស្របពេលដែលលោកទទួលជួបជាមួយរដ្ឋមន្ត្រីការបរទេសកាតា Sheikh Mohammed bin Abdulrahman Al-Thani នៅថ្ងៃពុធទី ២៦ ខែកក្កដា។
ពាក់ព័ន្ធទំនាក់ទំនងជាមួយលោក ដូណាល់ ត្រាំ លោក ធីល័រសិន បានបកស្រាយថា វាគ្មានបញ្ហាអ្វីដែលកើតឡើងក្នុងទំនាក់ទំនងរវាងលោក និងប្រធានាធិបតី ត្រាំ។ លោកក៏សង្កត់ធ្ងន់ថា លោកនឹងបន្តធ្វើការងារជារដ្ឋមន្ត្រីការបរទេស ដរាបណាប្រធានាធិបតីនៅតែទុកចិត្តនិងអនុញ្ញាតឲ្យលោកបន្តធ្វើការងារនោះ។
ព័ត៌មានពាក់ព័ន្ធការចាកចេញរបស់លោក ធីល័រសិន រីកសាយភាពក្រោយពេលដែលសារព័ត៌មាន CNN ចុះផ្សាយថា ការខ្វែងគំនិតគ្នារវាងសេតវិមាន និងលោក ធីល័រសិន ផ្ទាល់ ពាក់ព័ន្ធគោលនយោបាយការបរទេសជាពិសេសគោលនយោបាយចំពោះអ៊ីរ៉ង់កាន់តែកើនឡើង។ ហើយប្រព័ន្ធផ្សព្វផ្សាយនេះថែមទាំងបានស្រង់សម្តីប្រភពអនាមិកដែលនិយាយថា លោក ធីល័រសិនបានប្រាប់អ្នកស្និទ្ធលោកពីគម្រោងលាលែងចេញពីតំណែងនៅចុងឆ្នាំនេះ។
អ្នកនាំពាក្យក្រសួងការបរទេសអាមេរិកអ្នកស្រី Heather Nauert បានច្រានចោលព័ត៌មានពាក់ព័ន្ធការចាកចេញពីតំណែងរបស់លោក ធីល័រសិន កាលពីថ្ងៃអង្គារ ទី ២៥ កក្កដា។ អ្នកស្រីបានបញ្ជាក់លោក ធីល័រសិនគ្រាន់តែជាប់រវល់បំពេញទស្សនកិច្ចនៅកាន់រដ្ឋឈូងសមុទ្រដើម្បីសម្រុះសម្រួលនិងបញ្ចប់ជម្លោះរវាងកាតា និងបណ្តាបក្សពួកអារ៉ាប៊ីសាអូឌីតប៉ុណ្ណោះ។
គួរឲ្យកត់សម្គាល់ផងដែរថា ក្រោយពេលលោក ធីល័រសិន ត្រឡប់មកពីរដ្ឋឈូងសមុទ្រវិញកាលពីថ្ងៃ ១៣ ខែកក្កដា លោកបានព្រលយពាក្យថាលោកហត់នឿយចំពោះការងារបច្ចុប្បន្ន។លោកក៏បន្ថែមថា ការងារមនុស្សរបស់លោកជាប្រធានក្រុមហ៊ុនប្រេង ExxonMobil ពីឆ្នាំ ២០០៦ ដល់ឆ្នាំ២០១៦ វាងាយស្រួលជាការងារបច្ចុប្បន្នដោយសារការងារនោះលោកមានសិទ្ធិសម្រេចចិត្តចុងក្រោយក្នុងប្រព័ន្ធគ្រប់គ្រងនិងដឹកនាំក្នុងក្រុមហ៊ុនមានបែបបទនិងវិន័យត្រឹមត្រូវល្អ។
«វាមិនមែនជាការរិះគន់ទេ ប៉ុន្តែវាជាការសង្កេតរបស់ខ្ញុំផ្ទាល់។ វាមិនស័ក្តិសមជាស្ថាប័នដែលមានរបៀបរយខ្ពស់ របៀបរបបនិងនីតិវិធីនៃការសម្រេចចិត្តក៏បែកខ្ញែកគ្នា ហើយពេលខ្លះគ្មានអ្នកចង់សម្រេចចិត្តទៀត»។ នេះជាការលើកឡើងរបស់លោក ធីល័រសិន៕
Tag:
រិច ធីល័រសិន
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com