ជាតិ
វៀតណាម ផ្តល់ជំនួយ៣លានដុល្លារដល់កម្ពុជា ជួយសង់មណ្ឌលបន្សាបគ្រឿងញៀន
× រដ្ឋាភិបាល វៀតណាមសម្រេចផ្តល់ជំនួយចំនួន៣លានដុល្លារ ជួយសង់មណ្ឌលបន្សាបគ្រឿងញៀននៅក្នុងខេត្តព្រះសីហនុ។ ជំនួយឥតសំណងនេះ គឺជាការអនុវត្តតាមកិច្ចព្រមព្រៀង នៃកិច្ចសហប្រតិ បត្តិប្រយុទ្ធប្រឆាំងគ្រឿងញៀនរវាងរាជរដ្ឋាភិបាលកម្ពុជា និងវៀតណាម។
រដ្ឋាភិបាលវៀតណាម បានផ្តល់ជំនួយឥតសំណងចំនួន៣លានដុល្លារអាមេរិក ចូលរួមជួយសាងសង់មណ្ឌលបន្សាបគ្រឿងញៀន នៅក្នុងខេត្តព្រះសីហនុ។ ការសម្រេចផ្តល់ជំនួយនេះ ធ្វើឡើងក្នុងជំនួបទ្វេ ភាគី រវាង លោក កែ គឹមយ៉ាន ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន និងលោក ង្វៀន ជុងដាម (Nguyen Trong Dam) អនុរដ្ឋមន្ត្រីក្រសួងការងារ ជនពិការ និងសង្គមកិច្ច នៅថ្ងៃទី៩ ខែសីហា។ នេះបើតាមទីភ្នាក់ងារសារព័ត៌មានកម្ពុជា(AKP)។
បើតាម លោក កែ គឹមយ៉ាន ដែល AKPបានស្រង់សម្តី ជំនួយឥតសំណងនេះ គឺជាការអនុវត្តតាមកិច្ចព្រមព្រៀង នៃកិច្ចសហប្រតិបត្តិប្រយុទ្ធប្រឆាំងគ្រឿងញៀនរវាងរាជរដ្ឋាភិបាលកម្ពុជា និងវៀតណាម។ រាជរដ្ឋាភិបាលកម្ពុជា គ្រោងចំណាយប្រាក់ ៦លានដុល្លារ សង់មជ្ឈមណ្ឌលជាតិ ស្តារនីតិសម្បទា និងបណ្តុះបណ្តាលវិជ្ជាជីវៈ លើផ្ទៃដីជាង២០ហិកតា នៅខេត្តព្រះសីហនុ ដើម្បីប្រមូលជនរងគ្រោះដោយសារគ្រឿងញៀន ទៅបន្សាបសារជាតិញៀន ធ្វើការអប់រំ និងបណ្តុះបណ្តាលជំនាញវិជ្ជាជីវៈ។
សូមបញ្ជាក់ថា បច្ចុប្បន្នកម្ពុជាមានមណ្ឌលបន្សាបគ្រឿងញៀន ដែលស្ថិតក្រោមការគ្រប់គ្រងរបស់រដ្ឋ ចំនួន៧កន្លែង និងចំនួន៣កន្លែងទៀត គ្រប់គ្រងដោយអង្គការសមាគម។ មណ្ឌលបន្សាបគ្រឿងញៀនគ្រប់គ្រង់ដោយរដ្ឋ មាននៅភ្នំពេញ១កន្លែង ខេត្តបន្ទាយមានជ័យ២កន្លែង ខេត្តបាត់ដំបង២កន្លែង ខេត្តសៀមរាប១កន្លែង និងខេត្តព្រះសីហនុ១កន្លែង។
សូមជម្រាបដែរថា ក្នុងពេលមួយឆមាស ឆ្នាំ២០១៧នេះ មានអ្នកញៀនគ្រឿងញៀនជាង៧ពាន់នាក់ បានទៅទទួលសេវាបន្សាបសារជាតិញៀន និងទទួលការអប់រំ បណ្តុះបណ្តាលជំនាញវិជ្ជាជីវៈ៕
Tag:
ជំនួយ
គ្រឿងញៀន
កម្ពុជា-វៀតណាម
© រក្សាសិទ្ធិដោយ thmeythmey.com