លោក សួង សុភ័ណ្ឌ ស្នើតុលាការចាត់ការរាល់អ្នកប្រើសម្តីគំរាមពលរដ្ឋ ប្រមាថព្រះមហាក្សត្រ និងសាសនា

ជាតិ

លោក សួង សុភ័ណ្ឌ ស្នើតុលាការចាត់ការរាល់អ្នកប្រើសម្តីគំរាមពលរដ្ឋ ប្រមាថព្រះមហាក្សត្រ និងសាសនា

15, Aug 2017 , 2:30 pm

រូបភាព

លោក សួង សុភ័ណ្ឌ ធ្វើសន្និសីទនៅមុខទីស្នាក់ការគណបក្សអំណាចខ្មែរ

ដោយ: រំដួល ចិត្រា (Romdoul Chetra)

ភ្នំពេញ៖ ប្រធានស្តីទីគណបក្សអំណាចខ្មែរ ស្នើឲ្យតុលាការចាត់វិធានការលើមនុស្សចំនួន ៤នាក់ ដែលបានប្រើពាក្យសម្តីគំរាមកំហែងលើពលរដ្ឋ និងប្រមាថព្រះមហាក្សត្រកន្លងមក ដូចលោក សួន សេរីរដ្ឋា ដែរ ដើម្បីបង្ហាញពីភាពអព្យាក្រឹត្យរបស់តុលាការ។

លោក សួង សុភ័ណ្ឌ ដែលទើបទទួលតំណែងជាប្រធានស្តីទីគណបក្សអំណាចខ្មែរ មិនពេញចិត្តចំពោះចំណាត់ការរបស់តុលាការមកលើលោក សួន សេរីរដ្ឋា ឡើយ។ លោកថា ករណីរបស់លោក សួន សេរីរដ្ឋា នេះគឺគ្រាន់តែជាទស្សនៈរបស់បុគ្គលផ្ទាល់ខ្លួនប៉ុណ្ណោះ ហើយវាហាក់មិនមានអ្វីនាំឲ្យប៉ះពាល់ធ្ងន់ធ្ងរដល់សន្តិសុខជាតិ និងបង្កឲ្យមានចលាចលក្នុងសង្គមនោះទេ។

ប៉ុន្តែនិយាយដល់ត្រង់ចំណុចនេះ លោក សួង សុភ័ណ្ឌ ក៏បានរំឮកឈ្មោះមនុស្ស៤នាក់ ដែលប្រព្រឹត្តកំហុសដូចលោក សួន សេរីរដ្ឋា ដោយតម្រូវឲ្យតុលាការចាត់វិធានការលើពួកគេផងដែរ។ អ្នកទាំង៤នាក់ ដែលលោក សួង សុភ័ណ្ឌ ស្នើឲ្យតុលាការមានចំណាត់ការនោះ រួមមានសម្ដេចនាយករដ្ឋមន្ត្រី ហ៊ុន សែន, លោករដ្ឋមន្ត្រីក្រសួងការពារជាតិ ទៀ បាញ់ និងរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង្ស សូត និងលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ។

ថ្លែងនៅក្នុងសន្និសីទកាសែត នៅមុខទីស្នាក់ការគណបក្សអំណាចខ្មែរ លោក សួង សុភ័ណ្ឌ បានបញ្ជាក់ដូច្នេះថា៖«ដូចករណីលោក សួន សេរីរដ្ឋា ដែលត្រូវបានចោទប្រកាន់នេះ វាមិនមែនជាបទល្មើសចោទប្រកាន់ពិតប្រាកដទេ ព្រោះដូចខ្ញុំជម្រាបថា បទល្មើសចោទប្រកាន់នេះ វាមិនខុសអំពីលោក ទៀ បាញ់ ដែលប្រមាថវាយបាក់ធ្មេញពលរដ្ឋខ្មែរ។ វាមិនខុសពីលោក វង្ស សូត ប្រមាថវាយពលរដ្ឋនឹងគល់ឫស្សី វាមិនខុសពីលោក ហ៊ុន សែន ដែលប្រមាថពលរដ្ឋថា ចាញ់ឆ្នោតនឹងមានសង្គ្រាមកើតឡើងនោះទេ។ ដូច្នេះខ្ញុំសុំឲ្យអ្នកទាំង៤នាក់ គ្រាន់តែចេញលិខិតសុំទោសប្រជាពលរដ្ឋខ្មែរទៅ វាមិនអាក្រក់ទេ។ តែបើកាត់ទោសសុំឲ្យកាត់ទោសទាំង៤នាក់…។ ចំណែកអ្នកប្រមាថព្រះមហាក្សត្រ លោក ខឹម វាសនា ម្ដេចតុលាការមិនព្រមបញ្ជាទៅចាប់លោក ខឹម វាសនា ផងទៅ…»។

សូមស្ដាប់សំឡេង៖

ជុំវិញការលើកឡើងរបស់លោក សួង សុភ័ណ្ឌ នេះ សម្ដេចនាយករដ្ឋមន្ត្រី ហ៊ុន សែន ធ្លាប់បញ្ជាក់កន្លងមកថា មូលហេតុដែលសង្គ្រាមអាចកើតឡើង បើគណបក្សប្រជាជនមិនឈ្នះឆ្នោត ដោយសារតែក្រុមកងកម្លាំងប្រដាប់អាវុធ អាជ្ញាធរ និងក្រុមឧកញ្ញា ឬអ្នកមានទ្រព្យសម្បត្តិស្តុកស្តម្ភមួយចំនួន បានក្លាយជាមុខសញ្ញាកម្ចាត់ចោលរបស់ក្រុមប្រឆាំង។ ត្រង់ចំណុចនេះប្រមុខរដ្ឋាភិបាល អះអាងថា បើទោះជាគណបក្សប្រឆាំងគ្មានអាវុធ ក៏អាចកើតមានសង្គ្រាមបានដែរ។

ចំណែកករណីលោក ទៀ បាញ់ និងលោក វង្ស សូត ដែលព្រមានវាយបាក់ធ្មេញ និងប្រើគល់ឫស្សី វាយពលរដ្ឋតវ៉ាការបោះឆ្នោតនេះ ត្រូវបានសម្ដេច ហ៊ុន សែន បកស្រាយការពារថា គ្រាន់តែជាពាក្យសម្តីការពាររដ្ឋាភិបាលស្របច្បាប់ប៉ុណ្ណោះ ដែលមិនមានបញ្ហាអ្វីធ្ងន់ធ្ងរឡើយ។

ចំពោះការលើកឡើងទាំងនេះ តុលាការក៏មិនទាន់ចំណាត់ការអ្វីដែរ មកដល់ពេលនេះ។ ប៉ុន្តែយ៉ាងណាសម្រាប់សង្គមស៊ីវិល និងអ្នកវិភាគ ចាត់ទុកពាក្យសម្តីរបស់ថ្នាក់ដឹកនាំរដ្ឋាភិបាលខាងលើនេះ ជាការគំរាមកំហែងដល់សិទ្ធិបញ្ចេញមតិរបស់ប្រជាពលរដ្ឋ។

សូមបញ្ជាក់ថា លោក សួន សេរីរដ្ឋា ប្រធានគណបក្សអំណាចខ្មែរ ត្រូវបានសមត្ថកិច្ចចាប់ខ្លួន ពាក់ព័ន្ធនឹងការរិះគន់លើកងកម្លាំងប្រដាប់អាវុធ លើបណ្ដាញសង្គមហ្វេសប៊ុក កាលពីថ្ងៃទី១៣ សីហា ។ តុលាការសម្រេចចោទប្រកាន់លោក សួន សេរីរដ្ឋា ពីបទញុះញង់កុំឲ្យយោធិនស្ដាប់បង្គាប់ តាមបញ្ញត្តិមាត្រា ៤៧១ នៃក្រមព្រហ្មទណ្ឌ ,បទល្មើស ធ្វើឱ្យខូចទឹកចិត្តកងទ័ព តាមបញ្ញត្តិមាត្រា ៤៧២ នៃក្រមព្រហ្មទណ្ឌ និងបទ ញុះញង់ឱ្យប្រព្រឹត្តបទឧក្រិដ្ឋជាអាទិ៍ តាមបញ្ញត្តិមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។ លោក សួន សេរីរដ្ឋា បានសម្រេចលាលែងពីគណបក្សអំណាចខ្មែរ ដោយប្រគល់តួនាទីប្រធានស្តីទីដល់លោក សួង សុភ័ណ្ឌ ជាអ្នកដឹកនាំគណបក្ស៕