អន្តរជាតិ
អ៊ីរ៉ង់គំរាមចាប់ផ្ដើមកម្មវិធីនុយក្លអ៊ែរឡើងវិញ បើរដ្ឋបាល ត្រាំ ហ៊ានអនុវត្តទណ្ឌកម្មថ្មី
× ប្រធានាធិបតីអ៊ីរ៉ង់ ហាសាន់ រូហានី (Hassan Rouhani) បានគំរាមវិលត្រឡប់ទៅរកកម្មវិធីនុយក្លេអ៊ែរម្ដងទៀត បើអាមេរិកហ៊ានអនុវត្តទណ្ឌកម្មថ្មីប្រឆាំងអ៊ីរ៉ង់នោះ។ អ៊ីរ៉ង់មិនសប្បាយចិត្តឡើយ ពេលប្រធានាធិបតី ដូណាល់ ត្រាំ ចុះហត្ថលេខាដាក់ទណ្ឌកម្មលើជនជាតិ និងក្រុមហ៊ុនអ៊ីរ៉ង់ពាក់ព័ន្ធការបាញ់មីស៊ីលកន្លងមក និងបានហៅទង្វើរបស់អាមេរិកជាការបំពានកិច្ចព្រមព្រៀងអន្តរជាតិរវាងអ៊ីរ៉ង់ និងប្រទេសមហាអំណាច៦ទៀត។
«បើអាមេរិកចង់ប្រើប្រាស់វិធីសាស្ត្រចាស់ក្នុងការដាក់ទណ្ឌកម្មលើអ៊ីរ៉ង់ នោះអ៊ីរ៉ង់នឹងត្រឡប់ទៅរកកម្មវិធីនុយក្លេអ៊ែរម្ដងទៀត។» នេះជាសម្ដីព្រមានរបស់ប្រធានាធិបតីអ៊ីរ៉ង់ ហាសាន់ រូហានី ទៅកាន់អាមេរិកដែលទើបចេញច្បាប់ដាក់ទណ្ឌកម្មបន្ថែមលើអ៊ីរ៉ង់។ លោក រូហានី បញ្ជាក់ថា អ៊ីរ៉ង់អាចចាប់ផ្ដើមកម្មវិធីនុយក្លេអ៊ែរឡើងវិញតែប៉ុន្មានម៉ោងប៉ុណ្ណោះ ហើយនៅលើកនេះ អ៊ីរ៉ង់នឹងបង្កើនសមត្ថភាពនុយក្លេអ៊ែររបស់ខ្លួនឲ្យកាន់តែប្រសើរជាងលើកមុនទៅទៀត។
អាមេរិកបានដាក់ទណ្ឌកម្មជាបន្តបន្ទាប់លើអ៊ីរ៉ង់ ដោយចោទអ៊ីរ៉ង់ថាព្យាយាមអភិវឌ្ឍមីស៊ីលបាលីស្ទិក។ នៅខែកក្កដា ក្រសួងរតនាគារអាមេរិកបានដាក់ទណ្ឌកម្មលើក្រុមហ៊ុនចំនួន៦របស់អ៊ីរ៉ង់ដែលជាប់ទាក់ទងការអភិវឌ្ឍមីស៊ីល។ នៅខែសីហា ប្រធានាធិបតី ដូណាល់ ត្រាំ ក៏បានចុះហត្ថលេខាលើច្បាប់មួយ សំដៅដាក់ទណ្ឌកម្មថ្មីទៀតលើបណ្ដាក្រុមហ៊ុន និងជនជាតិអ៊ីរ៉ង់ដែលចូលរួមក្នុងកម្មវិធីមីស៊ីលដដែលនេះ។
យោងតាមទីភ្នាក់ងារព័ត៌មាន Xinhua លោក រូហានី ដែលទើបស្បថចូលកាន់តំណែងអាណត្តិទីពីរ បានថ្លែងក្នុងកិច្ចប្រជុំសភានៅថ្ងៃទី១៥ ខែសីហា ថា ក្រោមការដឹកនាំរបស់លោក ត្រាំ អាមេរិកលែងគោរព និងឲ្យតម្លៃកិច្ចព្រមព្រៀងអន្តរជាតិទៀតហើយ ដូចជាក្បត់ពាក្យសម្ដីដើរចេញពីកិច្ចព្រមព្រៀងប៉ារីសស្ដីពីបម្រែបម្រួលអាកាសធាតុ និងបំពានកិច្ចព្រមព្រៀងជាមួយគុយបាជាដើមផង។ លោកបន្តថា អាមេរិកមិនមែនជាដៃគូល្អ ឬក៏ដៃគូចរចាគួរឲ្យទុកចិត្តឡើយ។
អ៊ីរ៉ង់ បានសម្រេចចិត្តផ្អាកកម្មវិធីនុយក្លេអ៊ែររបស់ខ្លួនក្នុងឆ្នាំ២០១៥ ដោយចុះកិច្ចព្រមព្រៀងជាមួយមហាអំណាចចំនួន៦ មានអាមេរិក ចិន រុស្ស៊ី បារាំង អង់គ្លេស និងអាល្លឺម៉ង់។ ជាថ្នូរត្រឡប់វិញ អន្តរជាតិបានលើកលែង និងលុបចោលទណ្ឌកម្មជាច្រើនលើអ៊ីរ៉ង់។ ប៉ុន្តែអាមេរិកបានអះអាងថា ការសាកល្បងមីស៊ីលប្រើបច្ចេកវិទ្យាបាលីស្ទិករបស់ក្រុងតេហេរ៉ង់ ជាការបំពានសេចក្ដីសម្រេចរបស់ក្រុមប្រឹក្សាសន្តិសុខ។
ក្រៅពីនោះ លោក ត្រាំ ផ្ទាល់ក៏មិនជឿថា អ៊ីរ៉ង់បោះបង់កម្មវិធីនុយក្លេអ៊ែររបស់ខ្លួនដែរ ទោះជាបច្ចុប្បន្នអ៊ីរ៉ង់ផ្អាកកម្មវិធីនេះក្ដី។ ជាញឹកញាប់ លោក ត្រាំ ក៏បានរិះគន់កិច្ចព្រមព្រៀងឆ្នាំ២០១៥ ដែលជាកេរដំណែលរបស់រដ្ឋបាលអតីតប្រធានាធិបតី បារ៉ាក់ អូបាម៉ា និងបានហៅកិច្ចព្រមព្រៀងនេះជារឿងដ៏អាក្រក់ទៀតផង។ ប្រធានាធិបតីអាមេរិករូបនេះ ក៏គំរាមបញ្ចប់កិច្ចព្រមព្រៀង ហើយដាក់ជំនួសកិច្ចព្រមព្រៀងថ្មីដែលល្អជាង៕
Tag:
អ៊ីរ៉ង់
អាមេរិក
Hassan Rouhani
នុយក្លេអ៊ែរ
© រក្សាសិទ្ធិដោយ thmeythmey.com