អន្តរជាតិ
វេណេស៊ុយអេឡាធ្វើសមយុទ្ធយោធាប្រឆាំង«ចក្រពត្តិអាមេរិក» ខណៈកងទ័ពធ្លាក់ខ្លួនសុំស្បៀងប្រជាជន
× ប្រធានាធិបតីវេណេស៊ុយអេឡា នីកូឡា ម៉ាឌុយរ៉ូ បានស្នើឲ្យមានការរៀបចំលំហាត់យោធាប្រឆាំងចក្រពត្តិនិយមទូទាំងប្រទេស ក្រោយពេលដែលប្រធានាធិបតីអាមេរិក ដូណាល់ ត្រាំ ព្រលយថា អាមេរិកអាចប្រើប្រាស់កម្លាំងអន្តរាគមន៍នៅទីនោះបើចាំបាច់។ យ៉ាងណាក៏ដោយ វេណេហ្ស៊ុយអេឡាកំពុងធ្លាក់ខ្លួនយ៉ាងជ្រៅក្នុងវិបត្តិសេដ្ឋកិច្ច និងអស្ថិរភាពនយោបាយ ហើយពលរដ្ឋកំពុងប្រឈមការអត់ឃ្លានថែមទៀតផង។ ថ្វីបើរដ្ឋាភិបាលហាក់ដូចនៅខ្លាំងក្លាមែន គេឃើញកងទ័ពវេណេស៊ុយអេឡាធ្លាក់ខ្លួនដល់ថ្នាក់ឆ្លងដែនទៅសុំស្បៀងអាហារពីពលរដ្ឋហ្គីយ៉ានដែលស្ថិតនៅជិតខាងថែមទៀត។
ស្ថានភាពនយោបាយ និងសេដ្ឋកិច្ចនៅវេណេស៊ុយអេឡាកាន់តែដុនដាបទៅពីមួយថ្ងៃទៅមួយថ្ងៃ ហើយប្រជាពលរដ្ឋប្រទេសនេះប្រឈមការអត់ឃា្លនថែមទៀតផង។ វេណេស៊ុយអេឡាអាចនឹងធ្លាក់ក្នុងស្ថានភាពក្ស័យធនយ៉ាងឆាប់ ស្របពេលដែលអត្រាអតិផរណាកើនដល់ច្រើនជាង ៦០០ភាគរយនាពេលបច្ចុប្បន្ន។ ចំណែកចលនាបាតុកម្មប្រឆាំងរដ្ឋាភិបាលនៅតែបន្តកើតមានរាប់ចាប់ពីខែមេសាមក ហើយមនុស្សប្រហែលជា ១២០នាក់ហើយបានស្លាប់បាត់បង់ជីវិតក្នុងចលនាតវ៉ានេះ។
ប៉ុន្តែរឿងដែលគួរឲ្យសោកស្តាយ ប្រធានាធិបតិ នីកូឡា ម៉ាឌុយរ៉ូ ហាក់នៅតែប្រឹងប្រែងរកវិធីសាស្ត្រពង្រឹងអំណាចរបស់ខ្លួនឲ្យកាន់តែខ្លាំងថែម ទាំងដែលខ្លួនអសមត្ថភាពដោះស្រាយវិបត្តិប្រទេសជាតិនោះ។ ម៉ាឌុយរ៉ូ ចោទថា អាមេរិកជាអ្នកនៅពីក្រោយចលនាបាតុកម្ម ហើយម្បីបង្កើនអំណាចខ្លួនឯង លោក ក៏បានស្នើឲ្យមានការបង្កើតរដ្ឋធម្មនុញ្ញថ្មី តែលោកអះអាងថា វានឹងជួយដោះស្រាយវិបត្តិនយោបាយដែលកំពុងរួបរឹតរដ្ឋអាមេរិកឡាទីនដែលពឹងផ្អែកលើការនាំប្រេងចេញនេះ។
ចុងខែកក្កដាកន្លងទៅ ប្រធានាធិបតីវេណេស៊ុយអេឡាបានប្រកាសរៀបចំការបោះឆ្នោតមួយដើម្បីឈានទៅជ្រើសរើសសមាជិកសភាធម្មនុញ្ញនិងបង្កើតរដ្ឋធម្មនុញ្ញថ្មីស្របតាមមាត្រា ៣៤៧នៃរដ្ឋធម្មនុញ្ញបច្ចុប្បន្ន។ ក្រោយការបោះឆ្នោតថ្ងៃ ៣០ ខែក្កដា ប្រទេសគុយបា បូលីវី និងនីការ៉ាហ្កាស នាំគ្នាសាទរលទ្ធផលនៃការបោះឆ្នោតកន្លងមក ប៉ុន្តែអាហ្សង់ទីន, កូឡុំប៊ី , ម៉ិកស៊ិក, ប៉េរូ, ប៉ាណាម៉ា និងអេស្បាញបដិសេធទទួលស្គាល់លទ្ធផលបោះឆ្នោតនៅវេណេស៊ុយអេឡា។
យ៉ាងណាមិញ នៅដើមខែសីហាកន្លងមកនេះ សភាធម្មនុញ្ញដែលជាស្ថាប័នកំពូលមួយដែលមានសមាជិក ៥៤៥ នោះនៅតែត្រូវគេបង្កើតឡើងដើម្បីគ្រប់គ្រងអំណាចនីតិបញ្ញត្តិដែរ។
សហរដ្ឋអាមេរិកដែលជាមិត្តជិតខាងវេណេស៊ុយអេឡានោះ បានថ្កោលទោសរដ្ឋាភិបាលក្រុងការ៉ាកាស ហើយក៏សម្រេចដាក់ទណ្ឌកម្មប្រឆាំងក្រុមភាគីពាក់ព័ន្ធជាពិសេសមន្ត្រីជានខ្ពស់ក្នុងរដ្ឋាភិបាលលោក នីកូឡា ម៉ាឌុយរ៉ូ ផងដែរ។ ប៉ុន្តែដោយសារស្ថានការណ៍មិនមានភាពធូរស្រាលនោះ នៅថ្ងៃ ១១ ខែសីហា លោក ដូណាល់ ត្រាំ បានព្រលយថា អាមេរិកមានចំណាត់ការច្រើនក្នុងការដោះស្រាយវិបត្តិវេណេស៊ុយអេឡាក្នុងនោះមានទាំងការប្រើប្រាស់អន្តរាគមន៍យោធាផង។
លោកបានហៅ ម៉ាឌុយរ៉ូ ជាជនផ្តាច់ការ ហើយលោកសង្កត់ធ្ងន់ថា ប្រជាពលរដ្ឋវេណេស៊ុយអេឡាកំពុងរងគ្រោះ រងទុក្ខវេទនា និងស្លាប់បាត់បង់ជីវិតដោយសាររដ្ឋាភិបាលដែលគិតតែរឿងប្រមូលផ្តុំអំណាចផ្ទាល់ខ្លួននោះ។ ត្រាំ បានអះអាងថា អាមេរិកមិនរារែកនឹងប្រើកម្លាំងទ័ពចូលអន្តរាគមន៍ឡើយ បើសិនជាកាលៈទេសៈចាំបាច់ខ្លាំងនោះ។
ក្រោយលឺប្រធានាធិបតីអាមេរិកលើកឡើងដូច្នេះ ប្រជាជនវេណេស៊ុយអេឡាដែលជាអ្នកគាំទ្រលោក នីកូឡា ម៉ាឌុយរ៉ូ បាននាំគ្នាបាតុកម្មនិងថ្កោលទោសរដ្ឋបាលក្រុងវ៉ាស៊ីនតោនមិនសំចៃមាត់ផងដែរ។
យោធាម្នាក់ដែលបានចូលរួមក្នុងចលនាបាតុកម្មដែរនោះបានអះអាងដូច្នេះថា៖« យើងនឹងការពារប្រទេសយើងរាល់ពេលដែលចក្រពត្តិអាមេរិកចង់ឈ្លានពានទឹកដីយើង។ យើងត្រៀមប្រយុទ្ធការពារប្រទេសយើងដោយបូជាសាច់ស្រស់ឈាមស្រស់»។
ចំណែក រដ្ឋាភិបាលក្រុងការ៉ាកាសសម្រេចបញ្ជាឲ្យទ័ពប្រមូលផ្តុំកម្លាំងធ្វើសមយុទ្ធត្រៀមតបតអាមេរិកភ្លាម។ លោក ម៉ាឌុយរ៉ូ ហៅការធ្វើសមយុទ្ធនោះជាការត្រៀមលក្ខណៈតបតនឹងកម្លាំងចក្រពត្តិអាមេរិកថែមទៀត។ យោងតាមទីភ្នាក់ងារព័ត៌មាន AFP លោកបានលើកឡើងដូច្នេះ៖ «ខ្ញុំបានដាក់បញ្ជាដល់នាយសេនាធិការចម្រុះដើម្បីណែនាំឲ្យកងកម្លាំងប្រដាប់អាវុធយើងទាំងអស់ត្រៀមខ្លួនធ្វើសមយុទ្ធយោធាទូទាំងប្រទេស»។លំហាត់យោធាទូទាំងប្រទេសដើម្បីទប់ទល់ការគំរាមកំហែងពីខាងក្រៅនេះនឹងត្រូវរៀបចំឡើងនៅចាប់ពីថ្ងៃ ២៦ ដល់ថ្ងៃ ២៧ ខែសីហាខាងមុខ។
យ៉ាងណាមិញ អនុប្រធានាធិបតីអាមេរិកលោក Mike Pence បានបញ្ជាក់នៅដើមសប្តាហ៍នេះថា អាមេរិកមិនបានត្រៀមលក្ខណៈក្នុងការប្រើប្រាស់អន្តរាគមន៍យោធានៅវេណេស៊ុយអេឡាឡើយ ប៉ុន្តែអាមេរិកក៏មិនទ្រាំឈរមើលវេណេស៊ុយអេឡាធ្លាក់ខ្លួនក្លាយជាប្រទេសដឹកនាំដោយរបបផ្តាច់ការដែរ។
១.របបបដឹកនាំម៉ាឌុយរ៉ូ នៅតែខ្លាំង តែទាហានបាក់ស្បាតដើរសុំចំណីអាហារប្រជាជន
មកដល់ពេលបច្ចុប្បន្ន រដ្ឋាភិបាលលោក នីកូឡា ម៉ាឌុយរ៉ូ នៅតែបន្តមហិច្ឆតាពង្រឹងអំណាចរបស់ខ្លួន មិនខ្វាយខ្វល់ពីបញ្ហាដែលកំពុងកើតមានឡើងនៅក្នុងប្រទេសប៉ុន្មានឡើយ។ លោកសម្អាងលើកងទ័ពដែលតែងតែគាំទ្ររបបដឹកនាំរបស់លោកកន្លងមកពេញទំហឹង ហើយកងទ័ពនេះដើរតួនាទីសំខាន់ក្នុងការការពាររបបដឹកនាំនេះផងដែរ។
យ៉ាងណាមិញ គេឃើញមានកងទ័ពវេណេស៊ុយអេឡាមួយចំនួនធ្លាក់ខ្លួនសុំស្បៀងអាហារពីប្រជាជន និងមានព័ត៌មានខ្លះថា កងទ័ពគំរាមកំហែងប្រជាជនដើម្បីប្លន់យកចំណីអាហារថែមទៀតផង។ ចំណែក កងទ័ពមួយចំនួនចាប់ផ្តើមចេញមុខប្រឆាំងរដ្ឋាភិបាលក្រុងការ៉ាកាសផងដែរកន្លងមក។ សារព័ត៌មាន Miami Herald បានផ្សាយថា កងទ័ពវេណេស៊ុអេឡាជាច្រើននាក់មានប្រដាប់ដោយអាវុធ និងស្ថិតក្នុងឯកសណ្ឋានយោធាផងនោះ បានឆ្លងដែនទៅកាន់ប្រទេសហ្គីយ៉ានដែលជាមិត្តជិតខាងវេណេស៊ុយអេឡាដើម្បីសុំស្បៀងអាហារបរិភោគ។
សារព័ត៌មានដដែលនោះបានស្រង់សម្តីស្នងការប៉ូលិសហ្គីយ៉ានលោក Christopher Humphrey ដែលបានចុះទៅកាន់ព្រំដែនផ្ទាល់ និងជួបជាមួយទាហានវេណេស៊ុយអេឡាផងដែរ។ លោកបានអះអាងថា ទាហានដែលឆ្លងដែនមកពីវេណេស៊ុយអេឡានិងមានកាន់អាវុធក្នុងដៃផងនោះប្រាប់លោកថា ពួកគេគ្រាន់តែមកសុំចំណីអាហារបរិភោគប៉ុណ្ណោះ ហើយពួកគេមិនបានធ្វើបាបនរណាម្នាក់ឡើយ។ អ្នកទាំងនោះបានទទួលស្បៀងអាហារសម្រាប់បរិភោគ មុននឹងត្រូវគេបញ្ជូនទៅកាន់វេណេស៊ុយអេឡាវិញ។
យ៉ាងណាក៏ដោយបណ្តាទាហានដែលស្ថិតរបបដឹកនាំលោក ម៉ាឌុយរ៉ូ ដែលស្ថិតនៅទីក្រុងមិនខ្វះខាតរបស់ប្រើប្រាស់ឬស្បៀងអាហាឡើយ ប៉ុន្តែទាហានដែលអត់ឃ្លាននិងសុំអាហារប្រជាជននេះបម្រើការងារនៅតាមព្រំដែន។ ពួកគេចៀសមិនផុតពីប្រឈមបញ្ហាអត់ឃ្លាន ស្របពេលដែលស្រុកទេសចលាចល ហើយសេដ្ឋកិច្ចជិតក្ស័យធនឡើយ៕
Tag:
វេណេស៊ុយអេឡា
នីកូឡា ម៉ាឌុយរ៉ូ
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com