រដ្ឋមន្ត្រីកីឡាម៉ាឡេស៊ីសុំអភ័យទោសឥណ្ឌូណេស៊ីរឿងដាក់«ទង់ជាតិ»ត្រឡប់ក្បាលនៅស៊ីហ្គេម

អន្តរជាតិ

រដ្ឋមន្ត្រីកីឡាម៉ាឡេស៊ីសុំអភ័យទោសឥណ្ឌូណេស៊ីរឿងដាក់«ទង់ជាតិ»ត្រឡប់ក្បាលនៅស៊ីហ្គេម

20, Aug 2017 , 1:36 pm

រូបភាព

ដោយ: សៅ ផលនិស្ស័យ (Sao Phal Niseiy)

រដ្ឋមន្ត្រីក្រសួងយុវជន និងកីឡាបានចេញមុខសុំអភ័យទោសសមភាគីឥណ្ឌូណេស៊ី និងប្រជាជនឥណ្ឌូណេស៊ីពាក់ព័ន្ធបញ្ហាបច្ចេកទេសដាក់រូបទង់ជាតិ ឥណ្ឌូណេស៊ី ត្រឡប់ក្បាលក្នុងសៀវភៅព័ត៌មានស្តីពីការប្រកួតកីឡាស៊ីហ្គេមឆ្នាំ ២០១៧ ។ តំណាងរដ្ឋាភិបាលម៉ាឡេស៊ីអះអាងថា វាជាកំហុសអចេតនាសុទ្ធសាធ។

ប្រជាជនឥណ្ឌូណេស៊ីដែលប្រើប្រាស់បណ្តាញទំនាក់ទំនងសង្គមប្រតិកម្មខ្លាំងៗ និងនាំគ្នាចេញមុខរិះគន់ម៉ាឡេស៊ី ក្រោយម៉ាឡេស៊ីរៀបចំសៀវភៅព័ត៌មានស្តីពីការប្រកួតកីឡាស៊ីហ្គេមឆ្នាំ ២០១៧ ដែលមានដាក់ទង់ជាតិឥណ្ឌូណេស៊ីត្រឡប់ក្បាលចុះក្រោម។ ប៉ុន្តែរដ្ឋមន្ត្រីកីឡាម៉ាឡេស៊ីលោក ចេញមុខសុំអភ័យទោសភ្លាមៗ និងសុំការយោគយល់អធ្យាស្រ័យពីឥណ្ឌូណេស៊ីផង។

យោងតាមទូរទស្សន៍សិង្ហបុរី Channel News Asia រដ្ឋមន្ត្រីយុវជន និងកីឡាម៉ាឡេស៊ី Khairy Jamaluddin បានថ្លែងឆ្លើយតបនឹងរដ្ឋមន្ត្រីកីឡាឥណ្ឌូណេស៊ី Imam Nahrawi ក្នុងគណនី twitter ផ្លូវការរបស់ខ្លួនដូច្នេះថា៖ សូមទទួលយកការសុំអភ័យទោសពីខ្ញុំផងចំពោះបញ្ហានេះ។ វាគ្មានការស្អប់ខ្ពើមអ្វីទេ។ វាជាកំហុសអចេតនាសុទ្ធសាធ ហើយខ្ញុំពិតជាសោកស្តាយពន់ពេកដែលកំហុសបែបនេះកើតឡើង។ ខ្ញុំសូមអភ័យទោសផង»។

ពាក់ព័ន្ធបញ្ហាប្រតិកម្មតបកំហុសឆ្គងរបស់ម៉ាឡេស៊ីនេះ សារព័ត៌មានរដ្ឋឥណ្ឌូណេស៊ី Antara បានស្រង់សម្តីរដ្ឋមន្ត្រីយុវជននិងកីឡាឥណ្ឌូណេស៊ី Nahrawi ដូច្នេះថា៖ យើងនឹងតវ៉ា។ យើងរង់ចាំការសុំអភ័យទោសដោយផ្ទាល់ពីរដ្ឋាភិបាលម៉ាឡេស៊ី។ តើហេតុអ្វីរឿងបែបនេះអាចកើតឡើងទៅរួចក្នុងពិធីធំនិងពិសេសបែបនេះទៅកើត?»

លោកបន្តថា៖« វាជារឿងដែលធ្វេសប្រហែសបំផុតមួយ ហើយយើងពិតជាខកចិត្តខ្លាំងណាស់។ វាធ្វើឲ្យយើងឈឺចាប់ក្នុងនាមយើងជាប្រទេសដ៏អស្ចារ្យមួយ។ វាមិនគួរកើតឡើងទេជាពិសេសនៅក្នុងវេទិកាបើកចំហរ ដែលមានមនុស្សរាប់លាននាក់មើល»។

ដោយឡែកគណៈកម្មការស៊ីហ្គេមម៉ាឡេស៊ី បានចេញសេចក្តីថ្លែងការណ៍មួយដើម្បីសុំអភ័យទោសរាល់ប្រជាជនឥណ្ឌូណេស៊ីពាក់ព័ន្ធកំហុសអចេតនានេះនៅថ្ងៃសៅរ៍។ លិខិតចំហរនោះបានបញ្ជាក់ថា រដ្ឋមន្ត្រីកីឡាម៉ាឡេស៊ីនិងជាប្រធានគណៈកម្មការផងនោះនឹងជួបជាមួយរដ្ឋមន្ត្រីកីឡាឥណ្ឌូណេស៊ីដើម្បីសុំអភ័យទោសជាផ្លូវការតំណាងឲ្យគណៈកម្មការទាំងមូលផង៕